ກະສິກຳແຂວງບໍ່ແກ້ວ ສົ່ງເສີມປູກພັກປອດສານພິດໃຫ້ເປັນສິນຄ້າ

525

ໃນວັນທີ 20 ກຸມພາ 2020 ພະແນກກະສິກຳ ແລະ ປ່າໄມ້ແຂວງບໍ່ແກ້ວ ຈັດພິທີເປີດຕະຫຼາດນັດສິນຄ້າປອດສານພິດ ເຊິ່ງໃຫ້ກຽດເຂົ້າຮ່ວມຂອງ ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ, ມີການນໍາແຂວງ, ເມືອງ, ຫົວຫນ້າພະແນກ, ຮອງຫົວຫນ້າພະແນກ, ຜູ້ອໍານວຍການໂຮງຮຽນ, ທະນາຄານ, ບັນດາບ້ານໃນເທດສະບານເມືອງຫ້ວຍຊາຍ ຕະຫຼອດຮອດຊາວກະສິກອນກຸ່ມຜະລິດພຶດຜັກ ແລະ ແຂກເຂົ້າຮ່ວມ.

ໂອກາດນີ້, ທ່ານ ຄຳຊອນ ແກ້ວປະເສີດ ຫົວໜ້າພະແນກກະສິກຳ ແລະ ປ່າໄມ້ແຂວງໃຫ້ຮູ້ວ່າ: ການປູກຜັດປອດສານພິດກໍ່ເພື່ອສະໜອງໃຫ້ແກ່ຕະຫຼາດໃນເມືອງຫ້ວຍຊາຍ ທີ່ໄດ້ເລີ່ມຈັດຕັ້ງປະຕິບັດແຕ່ປີ 2019 ເປັນຕົ້ນມາ ເຊິ່ງໃນເບື້ອງຕົ້ນແມ່ນມີພຽງແຕ່ 4 ກຸ່ມຜະລິດເທົ່ານັ້ນ, ແຕ່ດ້ວຍຄວາມເອົາໃຈໃສ່ຊີ້ນໍາ – ນໍາພາຂອງການນໍາທຸກຂັ້ນ ແລະ ກຸ່ມຜະລິດ ຮອດປັດຈຸບັນ ຖືວ່ການປູກພືດຜັກສະອາດແມ່ນໄດ້ມີການເຕີບໄຫຍ່ຂະຫຍາຍຕົວເປັນລໍາດັບຈາກ 4 ກຸ່ມຜະລິດໃນເມື່ອກ່ອນໄດ້ກາຍມາເປັນ 8 ກຸ່ມຜະລິດໃນປີ 2020.

ໃນນີ້, ປະກອບມີ: ກຸ່ມປູກພືດຜັກບ້ານນໍ້າຄໍາ, ບ້ານນໍ້າຍອນ, ບ້ານປາກງາວ, ບ້ານໜອງຊາຍ, ບ້ານຕີນທາດ, ບ້ານດອນ, ບ້ານໂພນສະຫວ່າງ ແລະ ບ້ານປຸງ ລວມທັງໝົດມີ 153 ຄົວເຮືອນ ແລະ ນໍາໃຊ້ເນື້ອທີ່ປູກພຶດຜັກຫຼາຍກວ່າ 18 ເຮັກຕາ, ສາມາດສະໜອງຜົນຜະລິດປ້ອນຕະຫຼາດເທດສະບານເມືອງຫ້ວຍຊາຍ 7 ພັນກິໂລກຣາມ/ອາທິດ ທີ່ຂາຍໃນຕະຫຼາດສີດອນມີ, ຕະຫຼາດມ່ວງແກ້ວ ແລະ ຕະຫຼາດຂອນແກ້ວ ສາມາດສ້າງລາຍຮັບໃຫ້ແກ່ຊາວກະສິກອນຫຼາຍກວ່າ 56 ລ້ານກີບຕໍ່/ອາທິດ; ຖ້າຫາກສະເລ່ຍໃສ່ຄອບຄົວໜຶ່ງມີລາຍຮັບຈາກການຂາຍຜົນຜະລິດເກືອບ 4 ແສນກີບ/ອາທິດ.

ສໍາລັບແຜນໃນຕໍ່ໜ້າ, ພະແນກກະສິກໍາ ແລະ ປ່າໄມ້ແຂວງ ຈະໄດ້ສືບຕໍ່ໃນການວາງແຜນກະກຽມ, ສະໜອງປັດໃຈການຜະລິດໃຫ້ແກ່ກຸ່ມຜະລິດ ເພື່ອໃຫ້ສາມາດສະໜອງພຶດຜັກປ້ອນຕະຫຼາດ ໃນເທດສະບານເມືອງຫ້ວຍຊາຍໃຫ້ໄດ້ຕະຫຼອດທັງປີ ໂດຍເລັ່ງໃສ່ການປູກພືດຜັກບໍລິໂພກປະຈໍາວັນເປັນຕົ້ນ: ຜັກກາດ, ຜັກສະຫຼັດ, ຜັກຫອມ, ໝາກເຜັດ, ໝາກເຂືອ, ໝາກອຶ ແລະ ອື່ນໆ.

ນອກນັ້ນ, ຍັງຈະສືບຕໍ່ເປີດຕະຫຼາດກະສິກໍາສະອາດທຸກໆວັນພຸດຢູ່ພະແນກກະສິກໍາ ແລະ ປ່າໄມ້ແຂວງ ແລະ ຂະຫຍາຍໄປຕາມສະຖານທີ່ຕ່າງໆທີ່ເຫັນວ່າເຫມາະສົມ; ກະກຽມສໍາຫຼວດແລວໄຟຟ້າ ແລະ ຕິດຕັ້ງລະບົບໄຟຟ້າເຂົ້າຫາເນື້ອທີ່ກຸ່ມຜະລິດໃຫ້ເປັນລະບົບມາດຕະຖານຄວາມປອດໄພ ຈໍານວນ 4 ກຸ່ມ; ສືບຕໍ່ຕິດຕັ້ງ ແລະ ປັບປຸງລະບົບເຮືອນຮົ່ມໃຫ້ໄດ້ມາດຕະຖານຕາມຫຼັກການປູກພືດ ກະສິກໍາສະອາດ ຈໍານວນ 2 ຫຼັງ.