ນາຍົກລົດຖະມົນຕີ ຮຽກຮ້ອງໃຫ້ອົງການກວດກາພັກ-ລັດ ເພີ່ມທະວີຄວາມຮັບຜິດຊອບກວດກາ, ສະກັດກັ້ນຕ້ານການສໍ້ລາດບັງຫຼວງໃຫ້ສູງຂຶ້ນ

678

ວັນທີ 18 ກຸມພາ 2020 ທີ່ນະຄອນຫລວງວຽງຈັນ, ທ່ານ ທອງລຸນ ສີສຸລິດ ນາຍົກ ລັດຖະມົນຕີ ແຫ່ງ ສປປ ລາວ ໄດ້ຮຽກຮ້ອງໃຫ້ ບັນດາຄະນະກວດກາສູນກາງພັກ, ອົງການກວດກາລັດຖະບານ ແລະ ບັນດາພະນັກງານກວດກາ ຕ້ອງເພີ່ມທະວີຄວາມຮັບຜິດຊອບ, ບຸກບືນສູ້ຊົນ, ປະຕິບັດວຽກງານດັ່ງກ່າວ ໃຫ້ແຂງແຮງກວ່າເກົ່າ ໃນການເຮັດພາລະບົດ ບາດເປັນເສນາທິ ການໃຫ້ສູນກາງພັກ ແລະ ລັດຖະບານໃນການຕິດຕາມກວດກາ, ສະກັດກັ້ນ ແລະ ຕ້ານການສໍ້ລາດ ບັງຫລວງ ເນື່ອງໃນໂອກາດເຂົ້າຮ່ວມ ສະເຫລີມສະລອງວັນສ້າງຕັ້ງ ອົງການກວດກາພັກ-ລັດ ຄົບຮອບ 38 ປີ.

ໂອກາດດຽວກັນນີ້, ທ່ານນາຍົກລັດຖະມົນຕີ ຍັງໄດ້ສະເໜີ ໃຫ້ພາກສ່ວນກ່ຽວຂ້ອງ ນັບແຕ່ສູນກາງລົງຮອດທ້ອງຖິ່ນ ເອົາໃຈໃສ່ບາງບັນຫາເປັນຕົ້ນ ຄົ້ນຄວ້າກໍາແໜ້ນມະຕິ, ຄໍາສັ່ງ, ຂໍ້ກໍານົດ, ກົດລະບຽບຂອງພັກ, ນະໂຍບາຍ, ກົດໝາຍ, ລະບຽບການ, ແຜນພັດທະນາ ເສດຖະກິດ-ສັງຄົມ ຂອງລັດໃນແຕ່ລະໄລຍະ ແລ້ວຜັນຂະຫຍາຍ, ຫັນເປັນນິຕິກຳ, ກົນໄກ, ລະບຽບການ ອັນລະອຽດກ່ຽວກັບວຽກກວດກາ ແລະ ຕິດຕາມກວດກາເລີມແຕ່ຫົວທີ ຕໍ່ການຈັດຕັ້ງປະຕິບັດຂອງການຈັດຕັ້ງ ແລະ ພະນັກງານ, ກໍາໃຫ້ໄດ້ສະພາບຢູ່ແຕ່ລະການຈັດຕັ້ງ ເພື່ອຊ່ວຍໃຫ້ຄະນະພັກ, ການນໍາຢູ່ບ່ອນນັ້ນ ສະກັດກັ້ນ ແລະ ແກ້ໄຂປະກົດ ການຫຍໍ້ທໍ້ແຕ່ຫົວທີ, ບໍ່ໃຫ້ກາຍເປັນການລະເມີດທີ່ຕ້ອງລົງວິໄນໃສ່ໂທດ. ພ້ອມກັນນີ້, ກໍ່ຕ້ອງຄົ້ນຄວ້າກ່ຽວ ກັບນະໂຍບາຍ ໃຫ້ແກ່ຄະນະກວດກາ ແລະ ພະນັກງານເຮັດວຽກ ກວດການໍາສະເໜີຂັ້ນເທິງ ທີ່ມີສິດຮັບຮອງປະກາດໃຊ້ໃຫ້ໄວ ເພື່ອເຮັດໃຫ້ມີການເຄື່ອນໄຫວ ວຽກງານກວດກາ ແຂງແຮງຕໍ່ເນື່ອງ ແລະ ມີປະສິດທິຜົນ. ພ້ອມກັນຈັດຕັ້ງການໂຄສະນາ ເຜີຍແຜ່ຢ່າງແຂງແຮງ, ກວ້າງຂວາງ ໃຊ້ຫລາຍຮູບການ, ຫລາຍວິທີການໃຫ້ທຸກການຈັດຕັ້ງພັກ-ລັດ, ການຈັດຕັ້ງ ເສດຖະກິດ-ສັງຄົມ, ສະມາຊິກພັກ, ພະນັກງານ, ທະຫານ, ຕຳຫລວດ ແລະ ພົນລະເມືອງ ຮັບຮູ້ເຂົ້າ ໃຈຜົນຮ້າຍ ແລະ ໄພອັນຕະລາຍ ຂອງພະຍາດອາດຍາສິດ, ແນວຄິດເອກກະຊົນ, ການສໍ້ລາດບັງຫລວງ ແລະ ປະກົດການຫຍໍ້ທໍ້ຕ່າງໆ ເພື່ອສ້າງສະຕິ ເປັນເຈົ້າເຂົ້າຮ່ວມ ເຮັດວຽກງານກວດກາ, ສ່ອງແສງສະພາບ ປະກົດການຫຍໍ້ທໍ້ ໃຫ້ແກ່ອົງການກວດກາຮູ້ໄວ ເພື່ອຕິດຕາມກໍາໄດ້ ແລະ ສະເໜີຕໍ່ພາກ ສ່ວນກ່ຽວຂ້ອງທີ່ມີສິດແກ້ໄຂ ແລະ ຕ້ອງໄດ້ເອົາໃຈໃສ່ ປັບປຸງກົງຈັກການຈັດຕັ້ງ ຄະນະກວດກາແຕ່ ລະຂັ້ນໃຫ້ມີຄວາມປອດໃສ, ໜັກແໜ້ນ, ເຂັ້ມແຂງ ສົມຄູ່ກັບຄວາມຮັບຜິດຊອບການເມືອງ, ເພີ່ມທະວີການ ກໍ່ສ້າງ-ບໍາລຸງພະນັກງານ ກວດກາດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຈັນຍາບັນ, ຄວາມຮູ້ດ້ານວິຊາການ ແລະ ຄວາມສາມາດໃນການ ກວດກາຕົວຈິງ; ການກວດກາຕ້ອງຮັບປະ ກັນຄວາມຖືກຕ້ອງ, ຊັດເຈນ, ທ່ຽງທໍາ, ພາວະວິໄສ, ມີໄຫວພິບ, ຄ່ອງແຄ້ວ, ນີ້ມນວນ, ທັນເວລາ ແລະ ມີຄວາມສັກສິດ.

ກ່ຽວກັບການກວດກາໃນຕໍ່ໜ້າ ໃຫ້ສຸມໃສ່ການກະກຽມ ແລະ ການດຳເນີນກອງປະຊຸມໃຫຍ່ຄັ້ງທີ XI ຂອງພັກ, ກອງປະຊຸມໃຫຍ່ ພັກຂັ້ນແຂວງ ແລະ ກະຊວງ-ອົງການ, ໃນນັ້ນໃຫ້ເອົາໃຈໃສ່ກວດກາ ເກັບກໍາຂໍ້ມູນຄະນະ ພັກແຕ່ລະຂັ້ນ ເພື່ອຮັບໃຊ້ດໍາເນີນຊີວິດ ການເມືອງໃຫ້ເລິກເຊິ່ງ ແລະ ກຳແໜ້ນ ບຸກຄະລາກອນຈະສະ ໝັກຄະນະພັກຊຸດໃໝ່ ໃຫ້ຮັບປະກັນ ຕາມມາດຖານ, ເງື່ອນໄຂທີ່ສູນກາງໄດ້ກໍານົດໄວ້, ສືບຕໍ່ສຸມໃສ່ກວດກາ ໂຄງການລົງທຶນຂອງລັດ ເລີ່ມແຕ່ຫົວທີ, ໂຄງການ ກໍ່ສ້າງທາງລົດໄຟ ລາວ-ຈີນ, ບັນດາໂຄງການລົງທຶນຂອງລັດ ທີ່ບໍ່ຖືກຕ້ອງຕາມລະບຽບກົດໝາຍ ແລະ ບັນດາເປົ້າໝາຍ ທີ່ພວມດໍາເນີນກວດກາ ຜ່ານມາທີ່ຍັງບໍ່ທັນສໍາເລັດ, ກວດກາພຶດຕິກຳເປັນການສໍ້ລາດບັງຫລວງ ຢູ່ໃນກົງຈັກການຈັດຕັ້ງລັດ ແລະ ບັນດາລັດວິສາຫະກິດ, ການກວດກາ ຕ້ອງຊອກໃຫ້ເຫັນບັນດາປັດໄຈ ທີ່ພາໃຫ້ເກີດ ປະກົດການຫຍໍ້ທໍ້ ແມ່ນຍ້ອນ ສາເຫດອັນໃດ, ແມ່ນຄວາມຮັບຜິດຊອບຂອງໃຜ, ຈະແກ້ໄຂແນວໃດ, ອັນໃດຄວນແກ້ໄຂ ທາງບໍລິຫານ, ອັນໃດຄວນດໍາເນີນ ຄະດີຕາມກົດໝາຍ ໃຫ້ສັກສິດ ແລະ ເຂັ້ມງວດ.

ພ້ອມນີ້, ຕ້ອງເປັນເຈົ້າການພົວພັນຮ່ວມມື ກັບອົງການກວດກາພັກ, ກວດ ກາລັດ ແລະ ອົງການຕ້ານການສໍ້ລາດບັງຫລວງ ຂອງບັນດາປະເທດເພື່ອນມິດ ແລະ ການຈັດຕັ້ງສາກົນ ໃຫ້ເປັນປົກກະຕິ, ໂດຍສະເພາະແມ່ນຊອກຮູ້ບົດຮຽນ ກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫລວງ ຂອງສະຫາຍຈີນ ແລະ ສະຫາຍຫວຽດນາມ ເພື່ອມາໝູນໃຊ້ເຂົ້າໃນການປະຕິບັດວຽກງານກວດກາ ຢູ່ປະເທດພວກເຮົາ, ອອກແຮງໂຄສະນາເຜີຍແຜ່ ໃຫ້ອົງການສາກົນ ແລະ ປະເທດເພື່ອນມິດຮັບຮູ້ ເຂົ້າໃຈແນວທາງ, ນະໂຍບາຍ ໃນການສະກັດກັ້ນ ແລະ ຕ້ານການສໍ້ລາດບັງ ຫລວງຂອງພັກ ແລະ ລັດເຮົາ.
ຂ່າວ: ມະນີທອນ, ພາບ: ອ່າຍຄຳ