ລັດຖະບານ ມອບຫຼຽນໄຊ-ໃບຍ້ອງຍໍ ໃຫ້ພະນັກງານກົມຄຸ້ມຄອງຊັບສິນຂອງລັດ

517

ກົມຄຸ້ມຄອງຊັບສິນຂອງລັດ ກະຊວງການເງິນ ໄດ້ຈັດພິທີມອບຫຼຽນໄຊແຮງງານຊັ້ນ III, ຫຼຽນກາແຮງງານ ແລະ ໃບຍອງຍໍຂັ້ນລັດຖະບານໃຫ້ແກ່ພະນັກງານ–ລັດຖະກອນພາຍໃນກົມຄຸ້ມຄອງຊັບສິນຂອງລັດ ຜູ້ທີ່ມີຄຸນງາມຄວາມດີປະກອບສ່ວນດ້ານເຫື່ອແຮງ, ສະຕິປັນຍາເຂົ້າໃນວຽກງານວິຊາສະເພາະຕະຫຼອດໄລຍະເວລາ 5 ປີ ຜ່ານມາ (2013–2018) ຊຶ່ງຜົນງານດັ່ງກ່າວເປັນການປະກອບສ່ວນອັນສໍາຄັນໃນການພັດທະນາປະເທດຊາດ.

ໂດຍໃຫ້ກຽດມອບຂອງທ່ານ ນາງ ກະເສີມສີ ພົມມະວົງສາ ຫົວໜ້າກົມຄຸ້ມຄອງຊັບສິນຂອງລັດ ກະຊວງການເງິນ, ມີອະດີດຫົວໜ້າກົມຄຸ້ມຄອງຊັບສິນຂອງລັດ, ມີຮອງຫົວໜ້າກົມ, ພ້ອມດ້ວຍພະນັກ–ລັດຖະກອນພາຍໃນກົມຄຸ້ມຄອງຊັບສິນຂອງລັດເຂົ້າຮ່ວມ. ໃນພິທີຍັງໄດ້ມອບ–ຫຼຽນໄຊແຮງງານຊັ້ນ III, ຫຼຽນກາແຮງງານ ແລະ ໃບຍອງຍໍຂັ້ນລັດຖະບານຈໍານວນໜຶ່ງ ເຊິ່ງໃນນັ້ນ, ໄດ້ຮັບຫຼຽນໄຊແຮງງານຊັ້ນ III ຈຳນວນ 7 ທ່ານ, ຫຼຽນກາແຮງງານຈຳນວນ 03 ທ່ານ, ໃບຍ້ອງຍໍຂັ້ນລັດຖະບານຈຳນວນ 24 ທ່ານ.

ໂອກາດດຽວກັນ, ທ່ານ ນາງ ກະເສີມສີ ພົມມະວົງສາ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພະນັກງານ–ລັດຖະກອນກົມຄຸ້ມຄອງຊັບສິນຂອງລັດ ທີ່ສາມາດຍາດມາໄດ້ເປັນຜົນງານອັນເອກອ້າງ ແລະ ຍັງໄດ້ເນັ້ນໃຫ້ຜູ້ທີ່ໄດ້ຮັບການຍ້ອງຍໍຄັ້ງນີ້ ທຸກຄົນຕ້ອງມີລະບຽບວິໄນທີ່ເຂັ້ມງວດໃນໜ້າທີ່ວຽກງານຕ່າງໆ, ມີແບບແຜນວິທີ່ເຮັດວຽກ, ຖືກຕ້ອງສອດຄ່ອງຕາມລະບຽບກົດໝາຍຂອງພັກ ແລະ ລັດໃນການແກ້ໄຂບັນດາວຽກງານຕ່າງໆໃຫ້ທັນການ, ປະສານສົມທົບກັບຂະແໜງການກ່ຽວຂ້ອງ, ຕິດຕາມກວດກາວຽກງານໃຫ້ຖືກຕ້ອງຕາມລະບຽບວີໄນທີ່ຂັ້ນເທິ່ງມອບໝາຍໃຫ້ດີຂື້ນເທື່ອລະກ້າວ.