ຊາວໜຸ່ມກະຊວງ ກວຕ ມອບເຄື່ອງໃຫ້ກອງບັນຊາການ ປກສ-ປກຊ ເມືອງສັງທອງ  

541

ເພື່ອເປັນການສ້າງຂະບວນການຄໍານັບຮັບຕ້ອນກອງປະຊຸມໃຫຍ່ຄັ້ງທີ II ຂອງອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ, ທັງເປັນການປະກອບສ່ວນສ້າງຂະບວນການຄໍານັບຮັບຕ້ອນກອງປະຊຸມໃຫຍ່ອົງຄະນະພັກເມືອງສັງທອງ ແລະ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 71 ປີ (20 ມັງກອນ 1949–20 ມັງກອນ 2020) ທີ່ຫາກໍຜ່ານພົ້ນໄປ.

ຫຼ້າສຸດ, ໃນວັນທີ 29 ມັງກອນ 2020 ຜ່ານມາ, ຄະນະບໍລິຫານງານຊາວໜຸມປະຊາຊົນປະຕິວັດລາວ ກະຊວງວິທະຍາສາດ ແລະ ເຕັກໂນໂລຊີ (ຄຊປປລ ກວຕ) ຊຶ່ງນຳໂດຍທ່ານ ພຸດທະສັກ ວິຈິດຕຣາ, ເລຂາ ຄຊປປລ ກວຕ ພ້ອມດ້ວຍຄະນະ ໄດ້ເດີນທາງໄປອວຍພອນ ແລະ ມອບເຄື່ອງໃຫ້ແກ່ກອງບັນຊາການ ປກສ-ປກຊ ເມືອງສັງທອງໂດຍໃຫ້ກຽດຕ້ອນຮັບຂອງທ່ານ ດາວເພັດ ອາລຸນ, ເຈົ້າເມືອງສັງທອງ ພ້ອມດ້ວຍຄະນະ.

ໂອກາດນີ້, ທ່ານ ພຸດທະສັກ ວິຈິດຕຣາ ໄດ້ຕາງໜ້າໃຫ້ແກ່ບັນດາສະມາຊິກຊາວໜຸ່ມທົ່ວກະຊວງ ກ່າວຍ້ອງຍໍຊົມເຊີຍຄະນະບັນຊາການ ປກສ-ປກຊ ເມືອງສັງທອງ ທີ່ຍາມໃດກໍໄດ້ສຸມສະຕິປັນຍາເພື່ອຊີ້ນຳ-ນຳພາບັນດາກົມກອງ, ເຮັດໜ້າທີ່ການປະຕິບັດວຽກງານປ້ອງກັນຊາດປ້ອງກັນຄວາມສະຫງົບດ້ວຍດີຕະຫຼອດມາ ອັນໄດ້ເຮັດໃຫ້ສະພາບການຮອບດ້ານຂອງເມືອງສັງທອງມີຄວາມສະຫງົບປອດໄພ.

ພ້ອມນັ້ນ, ຍັງໄດ້ມອບວັດຖຸປັດໄຈຈຳນວນໜຶ່ງໃຫ້ແກ່ກອງບັນຊາການ ປກສ-ປກຊ ເມືອງສັງທອງ ປະກອບມີ: ຊຸດດອກໄຟທີ່ນຳໃຊ້ພະລັງງານແສງຕາເວັນຂະໜາດ 50 ວັດ ຈຳນວນ 10 ຊຸດ, ຕູ້ເຢັນ 2 ໜ່ວຍ ແລະ ອຸປະກອນເຄື່ອງຫຼິ້ນກິລາຈຳນວນໜຶ່ງ ລວມມູນຄ່າທັງໝົດ 8 ລ້ານກີບ ໂດຍຕາງໜ້າຮັບແມ່ນ ພັນໂທ ສີວິໄລ ພູມນະວົງ, ຫົວໜ້າກອງບັນຊາການ ປກສ ເມືອງສັງທອງ ແລະ ພັນໂທ ບົວລອຍ ໄຊຈະເລີນສຸກ, ຫົວໜ້າການທະຫານເມືອງສັງທອງ ໂດຍມີທ່ານ ດາວເພັດ ອາລຸນ ພ້ອມດ້ວຍພາກສ່ວນກ່ຽວຂ້ອງເຂົ້໋າຮ່ວມເປັນສັກຂີພິຍານ.

   

ໂອກາດເດີນທາງຄັ້ງນີ້ ຄະນະ ຄຊປປລ ກວຕ  ຍັງໄດ້ຢ້ຽມຊົມສວນສີວິໄລກະສິກຳອິນຊີ ຕັ້ງຢູ່ບ້ານຫ້ວຍນາໝໍ້ ເມືອງສັງທອງ ເຊິ່ງສວນດັ່ງກ່າວເປັນສວນກະສິກຳຕົ້ນແບບທີ່ສຳເລັດການທົດລອງປູກຈົນສາມາດສົ່ງອອກເປັນສິນຄ້າໄດ້ ເຊິ່ງມີພືດຜັກ ແລະ ໝາກໄມ້ຫຼາຍຊະນິດທີ່ປູກແບບປະສົມປະສານ ເຊັ່ນ: ໝາກຫຸ່ງ, ໝາກສີດາ, ໝາກນາວ, ຜັກສະຫຼັດ, ຜັກບົ້ງ, ຫອມປະເພດຕ່າງໆ, ໄມ້ໄຜ່ ແລະ ອື່ນໆ.