ກວຕ ປະກາດການຈັດຕັ້ງພາຍໃນຕຳແໜ່ງບໍລິຫານປະເພດ 4 ແລະ ປະເພດ 5

459

ໃນວັນທີ 24 ມັງກອນ 2020 ທີ່ຜ່ານມາ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດຕັ້ງພິທີເຊື່ອມຊຶມມະຕິຄົບຄະນະ ຄັ້ງທີ 9 ສະໄໝທີ X ຂອງຄະນະບໍລິຫານງານສູນກາງພັກ ໂດຍການເຜີຍແຜ່ຂອງສະຫາຍ ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກວຕ, ມີບັນດາຄະນະພັກ-ຄະນະນຳກະຊວງ, ບັນດາສະຫາຍສະມາຊິກພັກ ແລະ ພະນັກງານຫຼັກແຫຼ່ງຂອງກະຊວງເຂົ້າຮ່ວມ.

 

ໂອກາດດັ່ງກ່າວສະຫາຍ ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກວຕ ໄດ້ຍົກໃຫ້ເຫັນວ່າ: ກອງປະຊຸມຄົບຄະນະຄັ້ງທີ 9 ຂອງຄະນະບໍລິຫານງານສູນກາງພັກສະໄໝທີ X ໄດ້ດຳເນີນຢ່າງເປັນທາງການແຕ່ວັນທີ 14-23 ຕຸລາ 2019 ຜ່ານມາ, ພາຍໃຕ້ການເປັນປະທານຂອງສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ ຊຶ່ງກອງປະຊຸມໄດ້ຮັບຟັງການລາຍງານ, ການຄົ້ນຄ້ວາພິຈາລະນາ, ປຶກສາຫາລື ແລະ ໃຫ້ທິດຊີ້ນຳຕໍ່ບັນຫາສຳຄັນຈຳນວນໜຶ່ງ ໃນຂົງເຂດເສດຖະກິດ-ສັງຄົມ, ຂົງເຂດຄວາມໝັ້ນຄົງ, ວຽກງານແນວໂຮມ ແລະ ມະຫາຊົນຂອງພັກ ເພື່ອການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ ແລະ ການກະກຽມເນື້ອໃນກອງປະຊຸມໃຫຍ່ ຄັ້ງທີ XI ຂອງພັກ.

ນອກນັ້ນ ຄະນະບໍລິຫານງານສູນກາງພັກ ຍັງໄດ້ດຳເນີນຊີວິດການເມືອງ, ສຳຫຼວດລວມໝູ່ ແລະ ຂອງສະຫາຍກຳມະການສູນກາງພັກປະຈຳປີ 2019, ຄະນະບໍລິຫານງານສູນກາງພັກມີຄວາມເປັນເອກກະພາບກັນວ່າ ປີ 2020 ເປັນປີທີ່ມີຄວາມໝາຍສຳຄັນສຳລັບປະເທດພວກເຮົາ ຊຶ່ງເປັນປີສຸດທ້າຍໃນການຈັດຕັ້ງປະຕິບັດຄາດໝາຍສູ້ຊົນຕ່າງໆໃນສະໄໝທີ X ກໍ່ຄືການປົກປັກຮັກສາ ແລະ ສ້າງສາພັດທະນາປະເທດຊາດກ້າວຂຶ້ນສູ່ຈຸດໝາຍທີ່ວາງໄວ້.

ຊຶ່ງສູນກາງພັກໄດ້ຮຽກຮ້ອງມາຍັງຄະນະພັກ, ອົງການປົກຄອງແຕ່ລະຂັ້ນ, ສະມາຊິກພັກ, ພະນັກງານ ແລະ ປະຊາຊົນລາວບັນດາເຜົ່າຈົ່ງໄດ້ເພິ່ມທະວີຄວາມສາມັກຄີເປັນປຶກແຜ່ນພ້ອມກັນເຊີດຊູນ້ຳໃຈຮັກຊາດ ແລະ ເປັນເຈົ້າການຕັດສິນໃຈພ້ອມກັນບຸກບືນໃນການຍູ້ຂະບວນການສ້າງສາພັດທະນາ, ແກ້ໄຂຄວາມຫຍຸ້ງຍາກ, ບັນລຸຜ່ານຜ່າບັນດາອຸປະສັກ ແລະ ສິ່ງທ້າທາຍຕ່າງໆຢ່າງໜ້າ ແລະ ເລິກເຊິ່ງ ເພື່ອສ້າງຜົນງານກ້າວເຂົາສູ່ກອງປະຊຸມໃຫຍ່ ຄັ້ງທີ XI ຂອງພັກຢ່າງໜັກແໜ້ນ.

ໃນວັນດຽວກັນ, ກວຕ ກໍ່ໄດ້ປະກາດການຈັດຕັ້ງພາຍໃນກະຊວງ ໃນຕຳແໜ່ງບໍລິຫານປະເພດ 4 ແລະ ປະເພດ 5 ຂັ້ນຫົວໜ້າພະແນກ, ຫົວໜ້າສູນ ແລະ ຮອງຫົວໜ້າພະແນກ, ຮອງຫົວໜ້າສູນຂອງ ຫ້ອງການ, ກົມ ແລະ ສະຖາບັນຕ່າງໆນຳອີກ.