ລັດຖະມົນຕີກະຊວງການເງິນ ໂອ້ລົມ ແລະ ໃຫ້ທິດຊີ້ນໍາວຽກງານຂະແໜງພາສີ

549

ໃນກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະປະຈຳປີ 2019 ແລະ ກຳນົດທິດທາງແຜນການ, ມາດຕະການປີ 2020 ຂອງຂະແໜງພາສີທົ່ວປະເທດ; ທີ່ໄດ້ຈັດຂຶ້ນໃນວັນທີ 21 ມັງກອນ 2020 ທີ່ສູນຝຶກອົບຮົມພາສີ (ບ້ານທ່າເດື່ອ) ນະຄອນຫຼວງວຽງຈັນ.

   

ໂດຍທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ໃຫ້ການໂອ້ລົມ ແລະ ໃຫ້ທິດຊີ້ນຳຄະນະກົມພາສີ, ຫົວໜ້າກອງຄຸ້ມຄອງພາສີ I-VII, ຄະນະກອງກວດກາພາສີປະຈໍາແຂວງ, ຄະນະດ່ານພາສີສາກົນ, ຄະນະດ່ານພາສີທ້ອງຖິ່ນ ແລະ ວຽກງານຂະແໜງພາສີໃນຂອບເຂດທົ່ວປະເທດ, ຕ້ອງໄດ້ເປັນເຈົ້າການ, ແກ້ໄຂບັນຫາໃນຕໍ່ໜ້າເປັນຕົ້ນ:ການຕິດຕາມ, ກວດກາ-ກວດການ,ການປະຕິບັດໜ້າທີ່ຂອງພະນັກງານ-ລັດຖະກອນ-ເຈົ້າໜ້າທີ່ພາສີ, ເຂັ້ມງວດການປາບປາມຕ້ານ ແລະ ສະກັດກັ້ນການລັກລອບໜີພາສີ, ການຄຸ້ມຄອງການນຳເຂົ້ານຳມັນເຊື້ອໄຟ, ການແກ້ໄຂລົດນຳເຂົ້າບໍ່ຖືກຕ້ອງ, ວຽກງານການຫັນເປັນທັນສະໄໝ ແລະ ອື່ນໆ.

ທ່ານຮອງນາຍົກລັດຖະມົນຕີ ເນັ້ນຕື່ມອີກວ່າ: ວຽກງານຂະແໜງພາສີໃນໄລຍະຜ່ານມາເຫັນວ່າມີຫຼາຍອັນພົ້ນເດັ່ນເຊັັ່ນ: ການຈັດເກັບລາຍຮັບເຂົ້າງົບປະມານຂອງຂະແໜງພາສີໄດ້ທັງໝົດ 6.889 ຕື້ກີບເທົ່າກັບ 91,61% ຂອງແຜນການປີຖ້າທຽບໃສ່ໄລຍະດຽວກັນເພີ່ມຂຶ້ນ 3,80% ຄິດເປັນເງິນປະມານ 251,98 ຕື້ກີບ, ວຽກງານພາສີໃຫ້ເປັນທັນສະໄໝມີຫຼາຍໜ້າວຽກທີ່ໄດ້ຮັບການພັດທະນາເປັນຕົ້ນ:ລະບົບການແຈ້ງພາສີແບບອີເລັກໂຕຣນິກອາຊີກູ ດາ, ການຈັດເກັບຄ່າພາສີ-ອາກອນ ແລະ ພັນທະອື່ນຜ່ານລະບົບທະນາຄານ, ສະມາດແທັກ (Smart Tax).

ການນໍາໃຊ້ລະບົບການແຈ້ງພາສີປະຕູດຽວແຫ່ງຊາດ (National Single Window), ການຄຸ້ມຄອງ, ຕິດຕາມການນໍາເຂົ້າພາຫະນະທ່ອງທ່ຽວຢ້ຽມຢາມ ບ53, ການຈັດເກັບຄ່າທໍານາມພາຫະນະ ແລະ ຜູ້ໂດຍສານຜ່ານເຂົ້າ-ອອກດ່ານດ້ວຍລະບົບຕູອີເລັກໂຕຣນິກ KIOSK ແລະ ລະບົບອື່ນໆ; ການປັບປຸງກົງຈັກການຈັັດຕັ້ງເປັນຕົ້ນ: ການປັບປຸງພະແນກຕ້ານ ແລະ ສະກັ້ນການລັກລອບໜີພາສີເປັນພະແນກສືບສວນ-ສອບສວນ ແລະ ປາບປາມການລັກລອບໜີພາສີ, ເພື່ອຫັນວຽກງານດັ່ງກ່າວໃນຂອບເຂດທົ່ວປະເທດໃຫ້ຂຶ້ນບັນຊາໂດຍກົງກັບສູນກາງ ແລະ ການປັບປຸງບັນດານິຕິກໍາຕ່າງໆໄດ້ຢ່າງຕັ້ງໜ້າ.

ຄຽງຄູ່ກັນນີ້, ວຽກງານຂອງຂະແໜງພາສີເຫັນວ່າຍັງມີບາງດ້ານຕ້ອງໄດ້ເປັນເຈົ້າການ ແລະ ແກ້ໄຂໃນຕໍ່ໜ້າເຊັ່ນ: ວຽກງານການເມືອງ-ແນວຄິດ, ການຕິດຕາມ, ກວດກາ-ກວດການການປະຕິບັດໜ້າທີ່ວຽກງານຂອງພະນັກງານ-ລັດຖະ ກອນ-ເຈົ້າໜ້າທີ່ທີ່ຢູ່ໃນຄວາມຮັບຜິດຊອບຢູ່ຂັ້ນສູນກາງ ແລະ ທ້ອງຖິ່ນ, ວຽກງານມູນຄ່າແຈ້ງພາສີກົມພາສີປັບກົນໄກ ແລະ ວິທີການ ເພື່ອເຮັດໃຫ້ບັນດາຜູ້ປະກອບການ ແລະ ບັນດາດ່ານພາສີຊາຍແດນແຈ້ງພາສີມີຄວາມເປັນເອກະພາບ, ກວດຄືນການແຈ້ງພາສີ, ເພື່ອສ້າງຄວາມເຂັ້ມແຂງໃຫ້ແກ່ວຽກງານພາສີ, ວຽກງານການສືບສວນ-ສອບສວນ ແລະ ປາບປາມການລັກລອບໜີພາສີ, ພາຍຫຼັງມີການປັບປຸງໂຄງປະກອບການຈັດຕັ້ງໃໝ່ໃນກາງປີ 2019 ເຫັນວ່າໄດ້ມີການເຄື່ອນ ໄຫວຢ່າງຕັ້ງໜ້າ,ການຄຸ້ມຄອງການນໍາເຂົ້າສິນຄ້າປະເພດນໍ້າມັນເຊື້ອໄຟຊຶ່ງເປັນລາຍຮັບຫຼັກ ແລະກວມເອົາເປັນອັນດັບໜຶ່ງຂອງລາຍຮັບພາສີທັງໝົດ.

ການຄຸ້ມຄອງພາຍໃນດ່ານຍັງບໍ່ທັນຮັດກຸມເຮັດໃຫ້ເກີດມີຊ່ອງວ່າງໃນການລັກລອບສິນຄ້ານຳເຂົ້ານັບແຕ່ດ່ານພາສີສາກົນຈົນເຖິງດ່ານທ້ອງຖິ່ນ ແລະ ປະເພນີເປັນຕົ້ນ: ນໍ້າມັນເຊື້ອໄຟ, ເຄື່ອງໃຊ້ໄຟຟ້າ, ກໍ່ສ້າງ, ເຄື່ອງອຸປະໂພກ-ບໍລິໂພກ, ສິນຄ້າປະເພດກະສິກໍາ, ການແກ້ໄຂລົດນຳເເຂົ້າບໍ່ຖືກຕ້ອງທັງຢູ່ຂັ້ນສູນກາງ ແລະ ທ້ອງຖິ່ນຍັງບໍ່ທັນມີຄວາມເປັນເອກະພາບເປັນຕົ້ນແມ່ນ:

ການປະຕິບັດດ້ານລາຄາແຈ້ງບາງກໍລະນີຍັງທັນບໍ່ສອດຄ່ອງທີ່ສຳຄັນວຽກງານຂະແໜງ ພາສີຕ້ອງຫັນເປັນທັນສະໄໝ ໂດຍສະເພາະວຽກງານທີ່ຕິດພັນກັບການຄຸ້ມຄອງຈັດເກັບລາຍຮັບໃຫ້ມີລັກສະນະຕັ້ງໜ້າມີຄວາມໂປງໃສ່ ວ່ອງໄວ ສາມາດກວດສອບໄດ້, ເພື່ອເປັນການຮັບປະກັນໃຫ້ແກ່ການຈັດເກັບລາຍຮັບເຂົ້າງົບປະມານແຫ່ງລັດປີ 2020 ຈໍານວນ 8.200 ຕື້ກີບໃຫ້ບັນລຸຕາມແຜນການທີ່ວາງໄວ້.