ບໍລິສັດເອກະຊົນລົງທຶນ 3,5ລ້ານໂດລາປູກຢາງພາລາຢູ່ແຂວງບໍ່ແກ້ວ

402

ແຂວງບໍ່ແກ້ວອະນຸຍາດໃຫ້ 2 ບໍລິສັດເອກະຊົນສໍາປະທານດິນລັດເພື່ອໂຄງການປູກຢາງພາລາໃນເນື້ອທີ່ 783 ກວ່າເຮັກຕາ ດ້ວຍມູນຄ່າການລົງທຶນ 3,5ລ້ານໂດລາ ເຊິ່ງມີ ອາຍຸສໍາປະທານ 30ປີ

ພາບປະກອບຂ່າວເທົ່ານັ້ນ

ແຂວງບໍ່ແກ້ວ ອະນຸຍາດໃຫ້ ບໍລິສັດ ເອກະຊົນສຳປະທານທີ່ດິນຂອງລັດ 2 ໂຄງການເຂົ້າໃນປູກຢາງພາລາ ຢູ່ ເມືອງເມິງ , ໃນນັ້ນ ໂຄງການທີໜຶ່ງຢູ່ບ້ານຫ້ວຍອໍ້ ມີເນື້ອທີ່ 320 ກວ່າເຮັກຕາ ມູນຄ່າການລົງທຶນ 3 ລ້ານ ໂດລາສະຫະລັດ ໂດຍແມ່ນ ບໍລິສັດ ພັດທະນາກະຊິກຳຫາວໂບ ບໍ່ແກ້ວ ຈຳກັດຜູ້ດຽວ ເປັນຜູ້ສຳປະທານ; ໂຄງການທີສອງ ຢູ່ກຸ່ມບ້ານຜາດຳ, ບ້ານຜາຂາວ, ບ້ານດອນມູນ, ບ້ານຫ້ວຍສ້ານ, ບ້ານຈອມແຈ້ງ ແລະ ບ້ານປຸງເລາະ ມີເນື້ອທີ່ 463 ກວ່າເຮັກຕາ, ມູນຄ່າການລົງທຶນ 500.000 ໂດລາ ໂດຍແມ່ນບໍລິສັດ ເປົາເຊິງ ຢາງພາລາບໍ່ແກ້ວ ຈຳກັດຜູ້ດຽວ ເປັນຜູ້ສຳປະທານ, ທັງ 2 ໂຄງການມີອາຍຸສຳປະທານ 30 ປີ.

ພາບປະກອບຂ່າວເທົ່ານັ້ນ

ພິທີເຊັນບົດບັນທຶກ ໂຄງການດັ່ງກ່າວຈັດຂຶ້ນໃນວັນທີ 9 ມັງກອນ 2020 ທີ່ຜ່ານມາ, ທີ່ພະແນກແຜນການ ແລະ ການລົງທຶນແຂວງບໍ່ແກ້ວ ໂດຍການຮ່ວມລົງນາມ ລະຫວ່າງ ທ່ານ ບົວສະຫວາດ ອິນທະວັນ ຫົວໜ້າພະແນກແຜນການ ແລະ ການທຶນແຂວງ ກັບ ທ່ານ ລິວ ຈຽນ ອຳນວຍການບໍລິສັດ ເປົາເຊິງ ຢາງພາລາ ບໍ່ແກ້ວ ຈຳກັດຜູ້ດຽວ, ທ່ານ ອິນທະໜອມ ໄຊວິທູນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ສົມສັກ ປິ່ນແກ້ວ ເຈົ້າເມືອງເມິງ ແລະ ທ່ານ ກອງ ຫາຍຍິງ ອໍານວຍການບໍລິສັດ ພັດທະນາກະສິກໍາ ຫາວໂບ ບໍ່ແກ້ວ ຈຳກັດຜູ້ດຽວ ໂດຍມີທ່ານ ບົວຄົງ ນາມມະວົງ ເຈົ້າແຂວງແຂວງບໍ່ແກ້ວ, ມີການນຳແຂວງ, ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ ເປັນສັກຂີພິຍານ.

ທ່ານ ກອງ ຫາຍຍິງ ອໍານວຍການບໍລິສັດ ພັດທະນາກະສິກໍາ ຫາວໂບ ບໍ່ແກ້ວ ຈຳກັດຜູ້ດຽວໄດ້ກ່າວວ່າ: ການປະຕິບັດໂຄງການຢາງພາລານີ້ ຈະເປັນໂຄງການ ໜຶ່ງທີ່ຈະສ້າງວຽກເຮັດງານທຳ ໃຫ້ແກ່ພໍ່ແມ່ປະຊາຊົນເຂດດັ່ງກ່າວ ຫລັງຈາກຜະລິດນໍ້າຢາງໄດ້ ປະຊາຊົນຈະໄດ້ຮັບຜົນປະໂຫຍດ 73% ແລະ 27% ເປັນຂອງບໍລິສັດ.

ທີ່ມາ: ຂ່າວສານປະເທດລາວ