ຊາຄອມແບັງ ມອບອຸປະກອນສຶກສາ ໃຫ້ສູນປິ່ວປົວ ແລະ ຮັກສາສຸຂະພາບຕາ

479

ເນື່່ອງໃນໂອກາດຕ້ອນຮັບປີໃໝ່ສາກົນ ກໍ່ຄືບຸນປີໃຫມ່ຊາວຫວຽດນາມທີ່ໃກ້ຈະມາເຖິງ ທາງທະນາ ຄານ Sacombank ຫວຽດນາມ ໄດ້ສົມທົບກັບທະນາຄານ Sacombank ລາວ ພ້ອມດ້ວຍອ້າຍເອື້ອຍນ້ອງພະນັກງານທຸກຄົນ ໄດ້ຈັດກິດຈະກຳຢູ່ໂຮງຮຽນບ້ານແສງສະຫວ່າງ ທີ່ນອນໃນສູນປິ່ວປົວ ແລະ ຮັກສາສຸຂະພາບຕາ (ບ້ານທົ່ງປົ່ງ) ເມືອງສີໂຄດຕະບອງ ນະຄອນຫຼວງວຽງຈັນ ເພື່ອສ້າງຄວາມມ່ວນຊື່ນ ແລະ ສົ່ງຕໍ່ຄວາມສຸກຕ້ອນຮັບປີໄຫມ່. ຂະນະດຽວກັນ, ກໍ່ໄດ້ມອບອຸປະກອນການສຶກສາ ແລະ ເງິນສົດ ລວມມູນຄ່າ 22 ລ້ານກີບ ໃຫ້ແກ່ນ້ອງໆນັກຮຽນຜູ້ທີ່ມີຄວາມບົກຜ່ອງທາງສາຍຕາຕື່ມອີກ.

ສໍາລັບອຸປະກອນທີ່ນຳມາມອບໃນຄັ້ງນີ້ປະກອບມີ: ເງິນສົດ ຈໍານວນ 10 ລ້ານກີບ; ຄອມພິວເຕີພ້ອມດວ້ຍໂຕະຕັ້ງ ຈໍານວນ 6 ຊຸດ, ເຄື່ອງປຣີນເຕີ 2 ຊຸດ ລວມມູນຄ່າທັງໝົດ 10 ລ້ານກີບ. ນອກນັ້ນ, ຍັງມີທຶນການສຶກສາ ແລະ ຄ່າອາຫານ ມູນຄ່າ 2 ລ້ານກີບ ລວມທັງໝົດເທົ່າກັບ 22 ລ້ານກີບ ໃຫ້ກຽດມອບອຸປະກອນການສຶກສາຂອງຜູ້ບໍລິຫານທະນາຄານຊາຄອມແບັງຫວຽດນາມ ແລະ ທະນາຄານຊາຄອມແບັງລາວ ແລະ ຕາງໜ້າກ່າວຮັບໂດຍທ່ານ ປອ. ສີເພັດທະວົງ ສີສະເຫຼີມສັກ ອໍານວຍການສູນປິ່ນປົວ ແລະ ຮັກສາສຸຂະພາບຕາ, ກົມປິ່ນປົວ ກະຊວງສາທາລະນະສຸກ ພ້ອມດ້ວຍຄູ-ອາຈານ ແລະ ນ້ອງໆເຂົ້າຮ່ວມ.

ກິດຈະກຳດັ່ງກ່າວ, ຈັດຂຶ້ນໃນຕອນເຊົ້າວັນທີ 7 ມັງກອນ 2020 ຜ່ານມາ ສູນປິ່ວປົວ ແລະ ຮັກສາສຸຂະພາບຕາ (ບ້ານທົ່ງປົ່ງ) ເມືອງສີໂຄດຕະບອງ ນະຄອນຫຼວງວຽງຈັນ ເຊິ່ງກິດຈະກຳດັ່ງກ່າວເປັນໜື່ງໃນບັນດາຫຼາຍກິດຈະກຳ ທີ່ຖືໄດ້ວ່າເປັນມູນເຊື້ອທີ່ທາງທະນາຄານຊາຄອມແບັງ ໄດ້ເລີ່ມຈັດຕັ້ງມາແຕ່ປີ 2004 ຈົນເຖິງປັດຈຸບັນ, ເພື່ອມີສ່ວນຮ່ວມຮັບຜິດຊອບທາງສັງຄົມໂດຍລວມ.

ຂໍ້ມູນຂອງທະນາຄານຊາຄອມແບັງ ຍັງໃຫ້ຮູ້ຕື່ມອີກວ່າ: ກິດຈະກຳ “ອົບອຸ່ນລະດູບານໃຫມ່” ຄັ້ງທີ 17 ປີ 2020 ຈັດຂຶ້ນເພື່ອສົ່ງຕໍ່ ແລະ ແບ່ງປັນຄວາມສຸກໃຫ້ແກ່ບັນດາຜູ້ສູງອາຍຸທີ່ອາໃສຢູ່ຕາມບ້ານພັກຜູ້ສູງອາຍຸ, ຜູ້ພິການ, ຜູ້ທີ່ໄດ້ຮັບເຄາະຮ້າຍ ແລະ ບັນດາຜູ້ດ້ອຍໂອກາດຢູ່ຕາມເຂດຫ່າງໄກຊອກຫຼີກ ທີ່ໄດ້ເລີ່ມປະຕິບັດແຕ່ວັນທີ 05/01/2020 – 20/01/2020.

ໃນຂົງເຂດທົ່ວປະເທດຫວຽດນາມ (63 ຂົງເຂດ) ແລະ ລວມທັງ 2 ປະເທດຄື: ລາວ ແລະ ກຳປູເຈຍ ໂດຍລວມມູນຄ່າການຈັດຕັ້ງກິດຈະກຳທັງໝົດໃນຄັ້ງນີ້ກວ່າ 64 ຕື້ດົ້ງ ຫຼື ປະມານ 25,7 ຕື້ກີບ. ນອກຈາກນີ້, ທະນາຄານຊາຄອມແບັງຍັງສືບຕໍ່ຫລາຍກິດຈະກໍາຢ່າງຕໍ່ເນື່ອງ ແລະ ຫຼາກຫຼາຍຢູ່ຂົງເຂດອິນດູຈີນ (ຫວຽດນາມ, ລາວແລະ ກໍາປູເຈຍ) ເພື່ອເປັນສ່ວນໜຶ່ງໃນການແບ່ງເບົາຄວາມຮັບຜິດຊອບໂດຍລວມຕໍ່ສັງຄົມ.