ພິທີມອບ-ຮັບ ໜ້າທີ່ເຈົ້າເມືອງເມືອງບົວລະພາຜູ້ໃໝ່.

453

ໃນວັນທີ 03 ມັງກອນ 2020 ທີ່ຜ່ານມາ ຢູ່ທີ່ສະໂສອນເມືອງບົວລະພາໄດ້ ຈັດພິທີມອບ-ຮັບ ໜ້າທີ່ເຈົ້າເມືອງ ໆບົວລະພາ ຜູ້ເກົ່າ ແລະ ຜູ້ໃໝ່ ໃຫ້ກຽດເຂົ້າຮ່ວມໂດຍ ທ່ານ ສົມໃຈ ເພັດສີນວນ ຮອງເລຂາພັກແຂວງ ປະທານສະພາປະຊາຊົນແຂວງຄຳມ່ວນ, ມີບັນດາທ່ານໃນຄະນະປະຈຳພັກເມືອງ, ຄະນະພັກເມືອງ, ຫົວໜ້າ, ຮອງຫົວໜ້າຫ້ອງການ ພ້ອມດ້ວຍບັນດາການຈັດຕັ້ງບ້ານ, ນາຍບ້ານອ້ອມຂ້າງເທດສະບານເມືອງ ເຂົ້າຮ່ວມນຳຢ່າງພ້ອມພຽງ.

ໃນພິທີຄັ້ງນີ້ ທ່ານ ແກ້ວ ວົງພະຈັນ ຮອງຫົວໜ້າຄະນະຈັດຕັ້ງແຂວງຄຳມ່ວນ ກໍ່ໄດ້ຜ່ານຂໍ້ຕົກລົງຂອງທ່ານເຈົ້າແຂວງໆ ຄຳມ່ວນ  ວ່າດ້ວຍການແຕ່ງຕັ້ງເຈົ້າເມືອງໆບົວລະພາ ແຂວງຄຳມ່ວນ, ຜ່ານມະຕິຕົກລົງຂອງຄະນະປະຈຳພັກແຂວງໆຄຳມ່ວນ ວ່າດ້ວຍການບົ່ງຕົວແຕ່ງຕັ້ງຜູ້ຮັກສາການເລຂາພັກເມືອງໆບົວລະພາ ເຊີ່ງໄດ້ແຕ່ງຕັ້ງ ສະຫາຍ ພັນໂທ ບຸນກວ້າງ ແກ້ວບຸນຍົງ ຄະນະປະຈຳພັກເມືອງ ເປັນເຈົ້າເມືອງໆບົວລະພາ ທັງເປັນຜູ້ຮັກສາການເລຂາພັກເມືອງໆບົວລະພາ.

ຈາກນັ້ນ ກໍ່ໄດ້ຜ່ານຂໍ້ຕົກລົງຂອງທ່ານເຈົ້າແຂວງໆຄຳມ່ວນ ວ່າດ້ວຍການຍົກຍ້າຍເຈົ້າເມືອງໆບົວລະພາຜູ້ເກົ່າ ໄປຮັບຜິດຊອບໜ້າທີ່ໃໝ່ ຢູ່ຫ້ອງວ່າການແຂວງຄໍາມ່ວນ ແລະ ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການແຕ່ງຕັ້ງ ສະຫາຍ ປອ. ແກ້ວອຸດອນ ບຸດສິງຂອນ ເປັນຄະນະຊີ້ນໍາກະກຽມກອງປະຊຸມໃຫຍ່ 03 ຂັ້ນ ໃນທົ່ວແຂວງ ເພື່ອລົງຊ່ວຍຊີ້ນຳບັນດາເມືອງ ໃນການກະກຽມດໍາເນີນກອງປະຊຸມໃຫຍ່ຂອງບັນດາອົງຄະນະພັກເມືອງ ໃນທົ່ວແຂວງ ແລະ ຜັນຂະຫຍາຍຜົນສຳເລັດກອງປະຊຸມໃຫຍ່ໃນຂັ້ນເມືອງ ແລະ ລົງເລິກຊີ້ນຳ ເມືອງບົວລະພາ, ຈາກນັ້ນ ທ່ານ ປອ. ແກ້ວດຸດອນ ບຸດສິງຂອນ ເຈົ້າເມືອງໆບົວລະພາ ຜູ້ເກົ່າກໍ່ໄດ້ຜ່ານບົດບັນທຶກມອບໜ້າທີ່ວຽກງານ ເຊິ່ງມີຫລາຍດ້ານທີ່ພົ້ນເດັ່ນ ແລະ ມີບາງດ້ານທີ່ຈະຕ້ອງໄດ້ສືບຕໍ່ເຮັດໃຫ້ສຳເລັດ, ຈາກນັ້ນ ເຈົ້າເມືອງໆບົວລະພາ ຜູ້ເກົ່າ ແລະ ຜູ້ໃໝ່ ກໍ່ໄດ້ພ້ອມກັນເຊັນບົດບັນທຶກມອບ-ຮັບ ໜ້າທີ່ຮ່ວມກັນ ໂດຍມີບັນດາທ່ານໃນຄະນະນໍາຂັ້ນແຂວງ ແລະ ເມືອງ ຕະຫລອດຮອດບັນດາການຈັດຕັ້ງທຸກພາກສ່ວນກໍ່ໄດ້ເຂົ້າຮ່ວມ.

ໃນຕອນທ້າຍຂອງພິທີ ຍັງໄດ້ຮັບຟັງການໂອລົມ ຂອງ ທ່ານ ສົມໃຈ ເພັດສີນວນ ຮອງເລຂາພັກແຂວງ ປະທານສະພາປະຊາຊົນແຂວງຄຳມ່ວນ ທ່ານກໍ່ໄດ້ສະແດງຄວາມຍ້ອງຍໍຊົມເຊີຍມາຍັງເຈົ້າເມືອງໆບົວລະພາຜູ້ເກົ່າທີ່ສາມາດຍາດແຍ່ງ ຜົນງານໃນແຕ່ລະດ້ານໃນໄລຍະຜ່ານມາ ພ້ອມກັນນັ້ນ ທ່ານຍັງໄດ້ຮຽກຮ້ອງໃຫ້ຜູ້ທີ່ໄດ້ຮັບໜ້າທີ່ໃໝ່ຕ້ອງໄດ້ເອົາໃຈໃສ່ ສືບຕໍ່ໜ້າທີ່ວຽກງານທີ່ໄດ້ຮັບມອບໝາຍໃຫ້ສຳເລັດ ແລະ ພ້ອມພາກັນສ້າງສາເມືອງບົວລະພາໃຫ້ໄດ້ຮັບການພັດທະນາທີ່ດີຂຶ້ນໃນທຸກໆດ້ານ.