ທ່ານ ບຸນເຮືອງ ດວງພະຈັນ ມາຢ້ຽມຢາມ ແລະ ມອບເຄື່ອງຊ່ວຍເຫຼືອໃຫ້ປະຊາຊົນເມືອງພູຄູນ 

390

ໃນລະຫວ່າງວັນທີ 4 – 5 ມັງກອນ 2020 ທີ ຮ້ານອາຫານພູຄູນພຽງຟ້າ ຄະນະນໍາຂອງເມືອງພູຄູນ ເຊິ່ງນຳໂດຍທ່ານ ວຽງທອງ ຫັດສະຈັນ ເຈົ້າເມືອງພູຄູນ ໄດ້ໃຫ້ກຽດຕ້ອນຮັບ ທ່ານ ບຸນເຮືອງ ດວງພະຈັນ ອະດີດກຳມະການສູນກາງພັກ ລັດຖະມົນຕີປະຈຳສຳນັກງານນາຍົກລັດຖະມົນຕີ,

ອະດີດຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ, ອະດີດເລຂາພັກແຂວງ ເຈົ້າແຂວງຫລວງພະບາງ ແລະ ຄະນະອຳນວຍການ ທລຍ ແລະສະມາຊິກສາມອົງການຈັດຕັ້ງມະຫາຊົນ ທລຍ ທີໄດ້ລົງຢ້ຽມຢາມ ແລະ ມອບເຄື່ອງຊ່ວຍເຫລືອບັນເທົ່າທຸກໃຫ້ແກ່ປະຊາຊົນ ບ້ານທົ່ງສະຕາ ແລະ ບ້ານຜາຫລັງໝູ ກຸ່ມຜາຫລັງໝູ.

ການລົງຢ້ຽມຢາມຄັ້ງນີ້ກໍ່ໄດ້ຮັບຟັງການລາຍງານສະພາບການລວມຈາກທ່ານນາຍບ້ານ: ບ້ານທົ່ງສະຕາ ແລະ ບ້ານຜາຫລັງໝູແມ່ນບ້ານໜຶ່ງທີ່ຂຶ້ນກັບກຸ່ມຜາຫລັງໝູ ແລະ ຍັງເປັນບ້ານທີຍັງພົບຄວາມຫຍຸ້ງຍາກຂອງເມືອງເປັນຕົ້ນພຶ້ນຖານໂຄງລ່າງບໍ່ທັນສະດວກເທົ່າທີຄວນ

ບ້ານທົ່ງສະຕາ ປະກອບມີ 127 ຄອບຄົວ, 133 ຫລັງຄາເຮືອນ,ມີພົນລະເມືອງທັງໝົດ 838 ຄົນ, ຍິງ 407 ຄົນ, ບ້ານຜາຫລັງໝູ ມີ 114 ຄອບຄົວ,ມີ 117 ຫລັງຄາເຮືອນ, ພົນລະເມືອງ 642 ຄົນ,ຍິງ 227 ຄົນ ອາຊີບຂອງປະຊາຊົນສ່ວຍໃຫຍ່ແມ່ນຍຶດຖືອາຊີບການປູກຝັງ ແລະ ການລ້ຽງສັດເປັນອາຊີບຫຼັກ.

ໂອກາດນີ້, ທ່ານ ບຸນເຮືອງ ດວງພະຈັນ ກໍ່ຍັງໄດ້ໂອ້ລົມຕໍ່ກັບການຈັດຕັ້ງບ້ານ ແລະ ປະຊາຊົນບັນດາເຜົ່າ ໃຫ້ທຸກຄອບຄົວເອົາໃຈໃສ່ໃນການຜະລິດພືດຜັກໃຫ້ຫລາຍກາຍເປັນສິນຄ້າ ເພື່ອຊ່ວຍແກ້ໄຂຄວາມທຸກຍາກຂອງຄອບຄົວ,ການຈັດຕັ້ງບ້ານ ແລະ ປະຊາຊົນພາຍໃນບ້ານຕ້ອງອອກແຮງສາມັກຄີກັນ ສົ່ງເສີມລູກຫລານໃຫ້ໄດ້ຮັບການສຶກສາຢ່າງທົ່ວເຖິງ ປະກອບສ່ວນປ້ອງກັນເວນຍາມບ້ານເຮັດໃຫ້ບ້ານມີຄວມສະຫງົບໂດຍພຶ້ນຖານ,

ໂອກາດທີລົງມາຢ້ຽມຢາມເມືອງພູຄູນຄັ້ງນີ້ ການນຳຂອງເມືອງ ແລະ ການຈັດຕັ້ງບ້ານກໍ່ໄດ້ບາສີສູ່ຂັວນເນື່ອງໃນໂອກາດຕ້ອນຮັບປີໃໝ່ ຄສ 2020 ອີກດ້ວຍ.

ຂ່າວ -ໄລວັນ ໄຕຍະມາດ