ໜ່ວຍກຳມະບານ ກົມງົບປະມານແຫ່ງລັດ ເປີດກອງປະຊຸມໃຫຍ່ ຄັ້ງທີ II

483

ໃນທ້າຍເດືອນທັນວາທີ່ຜ່ານ; ກົມງົບປະມານແຫ່ງລັດ ກະຊວງການເງິນ ໄດ້ເປີດກອງປະຊຸມໃຫຍ່ ຄັ້ງທີ II ຂອງໜ່ວຍກຳມະບານຂຶ້ນ, ເພື່ອເປັນການສະຫຼຸບຕີລາຄາຜົນການເຄື່ອນໄຫວຊີ້ນຳ-ນຳພາໃນໄລຍະຜ່ານມາ, ພ້ອມທັງສະເໜີທິດທາງແຜນການໃນຕໍ່ໜ້າ, ໂດຍການເຂົ້າຮ່ວມເປັນປະທານຂອງທ່ານ ເຄນລັງສີ ແສງຄຳຢອງ ຮອງປະທານສະຫະພັນກຳມະບານກະຊວງການເງິນ, ມີທ່ານ ພູວົງ ກິດຕະວົງ ເລຂາໜ່ວຍພັກ ກົມງົບປະມານແຫ່ງລັດ, ທ່ານ ພົງສະຫວັດ ບຸບຜາສະຫວັດ ຫົວໜ້າໜ່ວຍກຳມະບານກົມງົບປະມານແຫ່ງລັດ, ມີຕ່າງໜ້າໜ່ວຍແມ່ຍິງ,ຕ່າງໜ້າໜ່ວຍຊາວໜຸ່ມ ແລະ ພະນັກງານຂອງກົມງົບປະມານແຫ່ງລັດເຂົ້າຮ່ວມ.

ໃນກອງປະຊຸມ, ໄດ້ຮັບຟັງບົດລາຍງານການເມືອງ, ບົດສຳຫຼວດການນຳພາລວມ ແລະ ໝາກຜົນການ ເຄື່ອນໄຫວຂອງໜ່ວຍກຳມະບານກົມງົບປະມານແຫ່ງລັດເພື່ອສະຫຼຸບຕີລາຄາວຽກງານທີ່ຜ່ານມາ ແລະ ທິດທາງແຜນການໃນຕໍ່ໜ້າ; ແນ່ໃສ່ປັບປຸງດ້ານການເມືອງແນວຄິດ, ຍົກສູງຄວາມສາມາດການນຳພາວຽກງານຂອງຄະນະໜ່ວກຳມະບານກົມງົບປະມານແຫ່ງລັດ,ຄວາມເປັນເຈົ້າການຂອງສະມາຊິກທຸກສະຫາຍໃນການຈັດຕັ້ງປະຕິບັດວຽກງານທີ່ຖືກມອບໝາຍໃຫ້ສຳເລັດຜົນ, ເພີ່ມທະວີຄວາມສາມັກຄີເປັນເອກະພາບພາຍໃນໃຫ້ມີຄວາມໜັກແໜ້ນພາຍໃຕ້ການຊີ້ນຳ-ນຳພາຂອງໜ່ວຍພັກກົມງົບປະມານແຫ່ງລັດ ກໍ່ຄືສະຫະພັນກຳມະບານກະຊວງການເງິນຕັ້ງໜ້າປະ ກອບສ່ວນປະຕິບັດວຽກງານຕາມການມອບໝາຍ;ສ້າງຂະບວນການ 2 ດີ 5 ເປັນເຈົ້າໃຫ້ປະກົດຜົນເປັນຈິິງໂດຍຕິດພັນກັບຂະບວນຮັກຊາດ ແລະ ພັດທະນາຂອງກົມງົບປະມານວາງອອກຢ່າງເຂັ້ມງວດ.

ພ້ອມດຽວກັນນີ້, ໃນກອງປະຊຸມໄດ້ປ່ອນບັດຄັດເລືອກຕັ້ງຄະນະໜ່ວຍກໍາມະບານກົມງົບປະມານແຫ່ງລັດ ຊຸດໃໝ່ໂດຍເຫັນດີເລືອກເອົາທ່ານ ພົງສະຫວັດ ບຸບຜາສະຫລັດ ເປັນຫົວໜ່ວຍກຳມະບານກົມງົບປະມານແຫ່ງລັດ, ທ່ານ ພັງພອນ ລັດຕະນາ ເປັນຮອງຫົວໜ້າ, ທ່ານ ນາງ ວົງເພັດ ສີນຸວົງ ເປັນຄະນະໜ່ວຍກຳມະບານກົມງົບປະມານແຫ່ງລັດ.

ໂອກາດນີ້, ທ່ານ ເຄນລັງສີ ແສງຄຳຢອງ ຮອງປະທານສະຫະພັນກຳມະບານກະຊວງການເງິນ ໄດ້ເນັ້ນໃຫ້ຄະນະໜ່ວຍກຳມະບານຊຸດໃໝ່ເອົາໃສ່ເສີມຂະຫຍາຍມູນເຊື້ອອັນດີງາມ, ໃຫ້ນັບມື້ເພີ່ມພູນຄູນສ້າງ ແລະ ເຂັ້ມແຂງໜັກແໜນຂຶ້ນຢ່າງບໍ່ຢຸດຢັ້ງ, ຜັນຂະຫຍາຍ ແລະ ຈັດຕັ້ງປະຕິບັດບັນດາມະຕິ, ຄຳສັງ, ກົດໝາຍ ແລະ ລະບຽບການໃຫ້ປະຕິບັດຖືກຕ້ອງ, ສອດຄ່ອງກັບຍຸກສະໄໝ ແລະ ໃຫ້ສົມກັບພັກປະຊາຊົນປະຕິວັດລາວເຊື່ອໝັ້ນ ແລະ ໄວ້ວາງໃຈ.ເພື່ອສຶບຕໍ່ເປັນເຈົ້າການໃນການປະຕິບັດວຽກງານວິຊາສະເພາະຂອງຕົນພາຍໃຕ້ການຊີ້ນຳ-ນຳພາຂອງໜ່ວຍພັກກົມງົບປະມານແຫ່ງລັດໃຫ້ໄດ້ຮັບຜົນສຳເລັດ.