4 ຄັ້ງແລ້ວ! ທີ່ການຄ້ານະຄອນຫຼວງຢືດ ແລະ ທຳລາຍ ພືດຜັກນຳເຂົ້າບໍ່ຖືກຕ້ອງຈາກຕ່າງປະເທດ

387

ນັບໄດ້ວ່າເປັນຄັ້ງທີ 4 ແລ້ວ ທີ່ການຄ້ານະຄອນຫຼວງຢືດ ແລະ ທຳລາຍ ພືດຜັກນຳເຂົ້າບໍ່ຖືກຕ້ອງຈາກຕ່າງປະເທດ ໃນປີ 2019 ນີ້.

ໃນວັນທີ 17 ທັນວາ 2019 ທີ່ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໄດ້ຈັດພິທີທຳລາຍສິນຄ້າປະເພດພືດຜັກນຳເຂົ້າບໍ່ຖືກຕ້ອງ ໂດຍປະຕິບັດຕາມຄຳສັ່ງເລກທີ 51/ນຍ ຂອງທ່ານນາຍົກລັດຖະມົນຕີ ໃນການສົ່ງເສີມການຜະລິດ ແລະ ຊົມໃຊ້ຜະລິດຕະພັນທີ່ຜະລິດຢູ່ພາຍໃນ ແລະ ການຄຸ້ມຄອງການນຳເຂົ້າສິນຄ້າອຸປະໂພກ-ບໍລິໂພກ.

ສະນັ້ນ, ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ໄດ້ອອກຂໍ້ຕົກລົງ ວ່າດ້ວຍການຢືດ ແລະ ທຳລາຍພືດຜັກ ຈຳນວນ 1.422 ກິໂລ ລວມມູນຄ່າ 6.810.000 ກີບ ທີ່ນຳເຂົ້າບໍ່ຖືກຕ້ອງຈາກປະເທດເພືອນບ້ານ ເຊິ່ງໄດ້ກວດພົບເຫັນຢູ່ບ້ານແກ້ງໝໍ້, ເມືອງສັງທອງ, ນະຄອນຫຼວງວຽງຈັນ ມີປະເພດໝາກເຂືອ ຈຳນວນ 92 ຖົງ ນ້ຳໜັກ 920 ກິໂລ, ໝາກເລັ່ນ 6 ກະຕ່າ ໜັກ 120 ກິໂລ, ໝາກແຕງ 17 ຖົງ ໜັກ 170 ກິໂລ, ໃບຂີ້ຫູດ 2 ຖົງ ໜັກ 12 ກິໂລ, ຫອມບົ່ວ 20 ຖົງ ໜັກ 100 ກິລາ ແລະ ຫອມລາບ 20 ຖົງ ໜັກ 100 ກິໂລ.

ຂໍ້ມູນຈາກ: ໜັງສືພິມເສດຖະກິດ ການຄ້າ