ແຈ້ງການ 5ຂໍ້ຫ້າມ ໃນການສະເຫຼີມສະຫຼອງບຸນປີໃໝ່ສາກົນ 2020 ນີ້

732
New Year's celebration in Copacabana, Rio de Janeiro, during the world famous fifteen minutes fireworks burning.

ກະຊວງປ້ອງກັນຄວາມສະຫງົບ ກອງບັນຊາການ ປກສ ນະຄອນຫຼວງວຽງຈັນ ອອກແຈ້ງການສະບັບເລກທີ 552/ປກສ.ນວ ລົງວັນທີ 13 ທັນວາ 2019 ເລື່ອງການເພີ່ມທະວີປ້ອງກັນ ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ໃນໄລຍະຈັດງານສະເຫຼີມສະຫຼອງ ສົ່ງທ້າຍປີເກົ່າ 2019 ຕ້ອນຮັບປີໃໝ່ 2020. ເຖິງ: ສຳນັກງານ – ອົງການ, ໂຮງຈັກ, ໂຮງງານ, ຫົວໜ່ວຍທຸລະກິດ, ອົງການຈັດຕັ້ງສາກົນ, ພະນັກງານ, ລັດຖະກອນ, ທະຫານ, ຕຳຫຼວດ, ກຸ່ມບ້ານ, ພໍ່ແມ່ປະຊາຊົນ, ຊາວຕ່າງດ້າວ ແລະ ຊາວຕ່າງປະເທດ ທີ່ມາເຄື່ອນໄຫວດຳລົງຊີວິດ ຢູ່ນະຄອນຫຼວງວຽງຈັນ.

ອີງຕາມເນື້ອໃນແຈ້ງການມີດັ່ງນີ້: ເພື່ອເສີມສ້າງເຕົ້າໂຮມຄວາມສາມັກຄີເປັນປຶກແຜ່ນຂອງຊາດ ເວົ້າລວມ ເວົ້າສະເພາະກໍຄືຊາວນະຄອນຫຼວງວຽງຈັນ, ໄດ້ພ້ອມກັນສະເຫຼີມສະຫຼອງຜົນງານ, ໄຊຊະນະໃນການປະຕິບັດໜ້າທີ່ວຽກງານຮອບດ້ານ, ປີທ່ອງທ່ຽວລາວ-ຈີນ 2019 ທີ່ຜ່ານມາ ທັງເປັນການສືບຕໍ່ເສີມຂະຫຍາຍມູນເຊື້ອຮີດຄອງປະເພນີອັນດີງາມ, ພ້ອມກັນນັ້ນກໍ່ເປັນການທົບທວນເຫດການປີຜ່ານມາຂອງຄອບຄົວ, ຂອງພະແນກການ-ອົງການ ແລະ ບ້ານ, ເມືອງ ເຮັດໃຫ້ການສະລອງປີໃໝ່ສາກົນ ມີບັນຍາກາດເບີກບານມ່ວນຊື່ນ, ຮັບປະກັນໄດ້ຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ສ້າງຕົວເມືອງສະອາດຈົບງາມ.

ໃນແຈ້ງການສະບັບດັ່ງກ່າວມີທັງຂໍ້ແນະນໍາ, ຊໍ້ຫ້າມ ແລະ ມາດຕະການຕໍ່ຜູ້ລະເມີດ ເຊິ່ງບັນດາຂໍ້ຫ້າມມີຄື:

1 ຫ້າມບໍ່ໃຫ້ຊື້-ຂາຍສິນຄ້າ ແລະ ອຸປະກອນທີ່ກໍ່ໃຫ້ເກີດສຽງແຕກ, ສຽງດັງທຸກປະເພດ, ບໍ່ໃຫ້ຈູດໝາກກະໂພກ, ບັ້ງໄຟດອກ, ໂຄມໄຟລອຍຟ້າ ທຸກປະເພດ ທຸກຂະໜາດ, ບໍ່ໃຫ້ນໍາໃຊ້ທາດລະເບີດ, ທາດແຕກ, ທາດເບື່ອ, ເຄມີ, ທາດກໍາມະລັງສີ ແລະ ວັດຖຸອອກລິດຕໍສຸຂະພາບຈິດ ທີ່ເປັນຜົນລົບຕໍ່ຄວາມສະຫງົບ ຄວາມເປັນລະບຽບຮຍບຮ້ອຍໃນສັງຄົມ.

2 ຫ້າມບໍໃຫ້ນຸ່ງເຄື່ອງເຂີນ-ສັ້ນ ຢົ້ວຢວນທີ່ບໍ່ຖືກຕ້ອງຕາມຮີດຄອງປະເພນີ, ການທ່ຽວຫຼິ້ນແບບລາມົກອານາຈານ, ເຕັ້ນ-ຟ້ອນ ຢູ່ຕາມທ້ອງຖະໜົນ ຫົນທາງຕ່າງໆ ແລະ ຫຼິ້ນການພະນັນທຸກປະເພດຢ່າງເດັດຂາດ.

3 ຫ້າມເປີດສຽງດັງເກີນຂອບເຂດ, ຫ້າມຂີ່ລົດເປັນພຶງເປັນແພ, ແລ່ນລົດໄວເກີນຂອບເຂດ, ການສັນຈອນຕາມທ້ອງຖະໜົນຜູ້ຂັບຂີ່ຕ້ອງປະຕິບັດຕາມກົດລະບຽບຈະລາຈອນວາງອອກຢ່າງເຂັ້ມງວດ ເຊັ່ນ: ດື່ມສິ່ງມືນເມົາແລ້ວບໍ່ຂັບລົດ, ຂັບລົດບໍ່ດື່ມສິ່ງມືນເມົາ ເພື່ອເຮັດໃຫ້ການສະຫຼອງປີໃໝ່ສາກົນ ມີຄວາມສະຫງົບປອດໄພ ແລະ ຕົວເມືອງມີຄວາມສະອາດຈົບງາມ.

4 ຫ້າມບໍ່ໃຫ້ຜູ້ໂດຍສານນັ່ງຫົວລົດເວລາຂັບຂີ່ໄປຕາມທ້ອງຖະໜົນ, ຫ້າມລົດບັນທຸກຂົນສົ່ງສິນຄ້າ ໜັກ ແລະ ລົດໂດຍສານໃສ່ເກີນຂອບເຂດ.

5 ການສະຫຼອງວັນຄຣິສມາດ, ເລີ່ມແຕ່ວັນທີ 24 ທັນວາ 2019 ຮອດວັນທີ 2 ມັງກອນ 2020, ບັນດາຮ້ານທຸລະກິດບັນເທີງ, ຮ້ານກິນດື່ມໃຫ້ບໍລິການຮອດເວລາ 23:30ໂມງ ຕ້ອງຢຸດເຊົາບໍລິການຢ່າງເດັດຂາດ

ສໍາລັບວັນທີ 31 ທັນວາ 2019 ຮອດວັນທີ 2 ມັງກອນ 2020 ບັນດາຮ້ານທຸລະກິດບັນເທີງ, ຮ້ານກິນດື່ມ ແລະ ທຸກໆສະຖານທີ່ຈັດງານສົ່ງທ້າຍປີເກົ່າຕ້ອນຮັບປີໃໝ່ ໃຫ້ບໍລິການຮອດເວລາ 00:30 ໂມງ ຕ້ອງຢຸດເຊົາບໍລິການຢ່າງເດັດຂາດ. ບັນດາຂໍ້ຫ້າມດັ່ງກ່າວ ຫາກພົບເຫັນຜູ້ລະເມີດ ແມ່ນຈະຕ້ອງປະຕິບັດກົດໝາຍ ແລະ ລະບຽບການຂອງບ້ານ ພ້ອມປັບໃໝໃນບາງກໍລະນີ ຕໍຜູ້ລະເມີດ. ລາຍລະອຽດເພີ່ມເຕີມສາມາດອ່ານຕາມເນື້ອໃນແຈ້ງການໄດ້