ທ່ານນາຍົກລອງເປົ່າແຄນ ເນື່ອງໃນສະມາຄົມສິລະປະແຄນລາວ ເຂົ້າຢ້ຽມຂ່ຳນັບ

617

ໃນວັນທີ 13 ທັນວາ 2019 ທີ່ສໍານັກງານນາຍົກລັດຖະມົນຕີ, ທ່ານ ຈະເລີນ ເຢຍປາວເຮີ ລັດຖະມົນຕີ ປະຈຳສຳນັກງານນາຍົກລັດຖະມົນຕີ ທັງເປັນປະທານຄະນະຂົນຂວາຍສ້າງຕັ້ງ ຄະນະສິລະປະແຄນລາວ ໄດ້ນຳພາຄະນະສະມາຄົມສິລະປະແຄນລາວ ເຂົ້າຢ້ຽມຂ່ຳນັບ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດສະເຫລີມສະຫລອງວັນສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 44 ປີ, ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 99 ປີ, ວັນສ້າງຕັ້ງສະໂມສອນສຽງແຄນລາວຄົບຮອບ 14 ປີ ແລະ ວັນທີ່ສຽງແຄນລາວ ໄດ້ຖືກຮັບຮອງເປັນມໍລະດົກໂລກ ດ້ານນາມມະທຳ ຄົບຮອບ 2 ປີ. ພ້ອມກັນນີ້, ຄະນະສະມາຄົມສິລະປະແຄນລາວ ຍັງໄດ້ມອບແຄນຈຳນວນ 3 ດວງ, ໃນນັ້ນມີແຄນລາວ 2 ດວງ ແລະ ແຄນມົ້ງ 1 ດວງ ໃຫ້ທ່ານ ນາຍົກລັດຖະມົນຕີ ເພື່ອເປັນທີ່ລະນຶກ.

ໃນໂອກາດດຽວກັນ, ທ່ານ ທອງລຸນ ສີສຸລິດ ຍັງໄດ້ໃຫ້ທິດຊີ້ນຳແກ່ ຄະນະສະມາຄົມສິລະປະແຄນລາວ, ໂດຍ ທ່ານ ທອງລຸນ ສີສຸລິດ ໄດ້ເນັ້ນໃຫ້ມີການສົ່ງເສີມ, ພ້ອມກັນພັດທະນາແຄນ ແລະ ສຽງແຄນຂອງລາວ ໃຫ້ເປັນມໍລະດົກຢູ່ຄູ່ກັບຄົນລາວຕະຫລອດໄປ. ພ້ອມນີ້, ປຸກລະດົມ ແລະ ສົ່ງ ເສີມຄົນລຸ້ນນ້ອຍທັງຍິງ ແລະ ຊາຍ ໃຫ້ຮູ້ຈັກ, ມັກຮັກໃນການເປົ່າແຄນ, ຂະຫຍາຍໄປໃຫ້ຄົນທົ່ວໂລກໄດ້ຮູ້ຈັກ, ໄດ້ຟັງ ແລະ ໃຫ້ເຂົາເຈົ້າຫລົງໄຫລໃນສຽງແຄນຂອງລາວເຮົາ ແລະ ເຮັດແນວໃດໃຫ້ສຽງແຄນຂອງລາວ ໄດ້ເປົ່າປະສານສຽງໃຫ້ເຂົ້າກັບດົນຕີສາກົນໄດ້.

ຂໍ້ມູນ: ຂປລ