ຊົມເຊີຍ! ຜ້າຝ້າຍລາວ ໄດ້ສິດທິພິເສດຜະລິດປ້ອນຕະຫຼາດເອີຣົບ

622

ກົມສົ່ງເສີມການຄ້າ, ສະມາຄົມຫັດຖະກຳລາວ ແລະ CBI ໄດ້ເຊັນບົດບັນທຶກຮ່ວມກັນ ເພື່ອສະໜັບສະໜູນໂຄງການ “ ສົ່ງເສີມແຜ່ນແພລາວອອກສູ່ຕະຫຼາດເອີຣົບ ” ໂດຍໃຫ້ໂອກາດ15 ບໍລິສັດຂອງລາວ ໄດ້ພັດທະນາສິນຄ້າຕົນໃຫ້ຖືກກັບຄ່ານິຍົມຜູ້ບໍລິໂພກໃນເອີຣົບ.

ພິທີເຊັນສັນຍາຈັດຂຶ້ນໃນວັນທີ 11 ທັນວາ 2019 ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ ເປັນກຽດເຂົ້າຮ່ວມໂດຍ ທ່ານ ພັນທອງ ພິດທຸມມາ ຮອງລັດຖະມົນຕີກະຊວງ ອຄ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຫານຊະນະ ສີສານ ປະທານສະມາຄົມຫັດຖະກຳລາວ ກ່າວວ່າ: ໂຄງການຮ່ວມມືລະຫວ່າງ ສະມາຄົມຫັດຖະກຳລາວ ແລະ ສູນສົ່ງເສີມການນຳເຂົ້າສິນຄ້າຈາກບັນດາປະເທດກຳລັງພັດທະນາຂອງປະເທດໂຮນລັງ ຫຼື CBI ໄດ້ເລີ່ມຂຶ້ນແຕ່ປີ 2016 ເປັນຕົ້ນມາ, ພາຍຫຼັງທີ່ CBI ໄດ້ຮ່ວມເຮັດວຽກກັບປະເທດມຽນມາ, ກຳປູເຈຍ ແລະ ຫວຽດນາມ ຫຼື ບັນດາປະເທດ CLMV ( ປະເທດອາຊຽນທີ່ມີລາຍໄດ້ຕ່ຳ ).

ສໍາລັບ ສປປ ລາວ ເບື້ອງຕົ້ນໄດ້ມີການປຶກສາຫາລືກັນ ໂດຍທາງສະມາຄົມຫັດຖະກຳລາວ ໄດ້ເຊື້ອເຊີນຜູ້ຕາງໜ້າຈາກ CBI ມາຢ້ຽມຊົມງານມະຫະກຳຫັດຖະກຳລາວ ທາງ CBI ເຫັນວ່າສິນຄ້າຫັດຖະກຳລາວນັ້ນມີຄວາມຫຼາກຫຼາຍ, ມີຄວາມປານີດ ແລະ ມີຄວາມເປັນເອກະລັກຂອງລາວ ທາງ CBI ຈຶ່ງໄດ້ເລືອກເອົາຂະແໜງຫັດຖະກຳລາວ. ການເຊັນສັນຍາຮ່ວມກັນໃນຄັ້ງນີ້ກໍເພື່ອລະບຸບົດບາດຂອງແຕ່ລະພາກສ່ວນເພື່ອອຳນວຍຄວາມສະດວກໃນການປະຕິບັດໂຄງການ ເຊິ່ງຈະເລີ່ມແຕ່ນີ້ຈົນເຖິງປີ 2024.

ທ່ານ ນາງ ແຟມເກ ລ໋ອດເກີຣິງ ຜູ້ຈັດການໂຄງການ CBI ກ່າວວ່າ: CBI ເປັນສູນສົ່ງເສີມການນຳເຂົ້າສິນຄ້າຈາກປະເທດກຳລັງພັດທະນາ ແລະ ເປັນໜ່ວຍງານໜຶ່ງຂອງລັດຖະບານໂຮນລັງ ພວກເຮົາສະໜັບສະໜູນວິສາຫະກິດຂະໜາດນ້ອຍ ແລະ ກາງທົ່ວໂລກໃນຂະແໜງການຕ່າງໆໃນການເຂົ້າເຖິງຕະຫຼາດເອີຣົບ.

ທ່ານ ຈິມ ເທສເທັກ ຊ່ຽວຊານດ້ານການພັດທະນາອົງການຈັດຕັ້ງຂອງໂຄງການ CBI ກ່າວວ່າ: ການໃຫ້ການຊ່ວຍເຫຼືອດ້ານວິຊາການໃຫ້ແກ່ບັນດາບໍລິສັດໃນການສົ່ງອອກ ແມ່ນສຸມໃສ່ 15 ບໍລິສັດທີ່ກຳລັງສົ່ງອອກ ຫຼື ມີທ່າແຮງສູງໃນການສົ່ງອອກສິນຄ້າແຜ່ນແພຕົກແຕ່ງເຮືອນ ແລະ ຈະມີການພັດທະນາປັບປຸງສິນຄ້າໃຫ້ສອດຄ່ອງກັບຄວາມຕ້ອງການຂອງຕະຫຼາດເອີຣົບ ຫຼື ປັບປຸງຂະບວນການດຳເນີນທຸລະກິດໃຫ້ເປັນມືອາຊີບໃນການສົ່ງອອກ.

ທີ່ມາ: ໜັງສືພິມເສດຖະກິດການຄ້າ