ມາເບິ່ງການຮ່ວມມື10ແຂວງພາກເໜືອຂອງສປປ ລາວ ແລະ ແຂວງຢຸນນານ ສປ ຈີນ

405

ຂປລ.ເມື່ອບໍ່ດົນມານີ້, ທີ່ນະຄອນຄຸນໝິງ ແຂວງຢຸນນານ ສປ ຈີນ, ຄະນະປະສານງານພາກເໜືອ ສປປ ລາວ ກັບ ແຂວງຢຸນນານ ສປ ຈີນ ໄດ້ຈັດກອງປະຊຸມ ຄັ້ງ ທີ 10 ເພື່ອທົບທວນຄືນໝາກຜົນການຮ່ວມມືສອງຝ່າຍ ໂດຍສະເພາະນັບຕັ້ງແຕ່ກອງປະຊຸມຄັ້ງທີ 9 ເປັນຕົ້ນມາ ຊຶ່ງໄດ້ຢັ້ງຢືນໃຫ້ເຫັນເຖິງການປະກອບສ່ວນຢ່າງຕັ້ງໜ້າໃນການຮັດແໜ້ນ ແລະ ພັດທະນາສາຍພົວພັນມິດຕະພາບ

ຖານບ້ານໃກ້ເຮືອນຄຽງທີ່ດີ ທັງໄດ້ຮັບການປັບປຸງໃຫ້ນັບມື້ນັບດີຂຶ້ນເທື່ອລະກ້າວ ອັນໄດ້ນໍາເອົາໝາກຜົນຕົວຈິງມາໃຫ້ປະຊາຊົນສອງຝ່າຍ. ພ້ອມນີ້ ສອງຝ່າຍຍັງໄດ້ມີການກໍານົດກ່ຽວກັບທິດທາງ ແລະ ເປົ້າໝາຍສໍາຄັນ ໃນການເພີ່ມທະວີການຮ່ວມມືລະຫວ່າງພາກເໜືອ ສປປ ລາວ ກັບ ສປ ຈີນ ໃຫ້ໄດ້ຮັບຜົນສໍາເລັດຕື່ມອີກບາດກ້າວໜຶ່ງ.

ກອງປະຊຸມຄັ້ງນີ້ປະກອບມີກອງປະຊຸມຄົບຄະນະຄະນະປະສານງານຮ່ວມມືລະຫວ່າງພາກເໜືອ ສປປ ລາວກັບ ແຂວງຢຸນນານ ສປ ຈີນ, ກອງປະຊຸມເວທີປາໄສຄັງປັນຍາລະດັບສູງ, ກອງປະຊຸມສົ່ງເສີມການລົງທຶນ ແລະ ງານວາງສະແດງໝາກຜົນການຮ່ວມມື 15 ປີ ແລະ ໄດ້ແບ່ງອອກເປັນ 06 ກຸ່ມເຊັ່ນ: ກຸ່ມຮ່ວມມືດ້ານໂຍທາທິການ ແລະ ຂົນສົ່ງ, ໂທລະຄົມມະນາຄົມ, ໄປສະນີ ແລະ ການສື່ສານ; ກຸ່ມຮ່ວມມືດ້ານການຄ້າ, ການເງິນ, ທະນາຄານ, ເຂດເສດຖະກິດພິເສດ

ກຸ່ມຮ່ວມມືດ້ານການລົງທຶນ, ພະລັງງານບໍ່ແຮ່ແລະທໍລະນີສາດ; ກຸ່ມຮ່ວມມືດ້ານວັດທະນະທໍາ, ທ່ອງທ່ຽວ, ການສຶກສາ, ສາທາລະນະສຸກແລະວິທະຍາສາດເຕັກໂນໂລຊີ; ກຸ່ມຮ່ວມມືດ້ານກະສິກໍາປ່າໄມ້, ປູກພືດທົດແທນ, ລຶບລ້າງຄວາມທຸກຍາ ແລະ ວຽກງານການຄຸ້ມຄອງດ່ານເຂົ້າອອກເມືອງ, ຊາຍແດນແລະແຮງງານ; ກຸ່ມຮ່ວມມືດ້ານສະພາບແວດລ້ອມ, ອຸຕຸນິຍົມແລະອຸທົກກະສາດ; ໃນແຕ່ລະກຸ່ມ ຕ່າງກໍໄດ້ຍົກເອົາບັນຫາຕ່າງໆທີ່ເຫັນວ່າທັງສອງຝ່າຍມີຄວາມສົນໃຈນໍາມາປຶກສາຫາລືຮ່ວມກັນຢ່າງລະອຽດພໍສົມຄວນ