ແຂວງບໍ່ແກ້ວ ຈັດງານວາງສະແດງສິນຄ້າ ລາວ – ຈີນ ຄັ້ງທີ I

499

ໃນວັນທີ 04 ທັນວາ 2019 ນີ້, ແຂວງບໍ່ແກ້ວໄດ້ເປີດງານວາງສະແດງສິນຄ້າ ລາວ – ຈີນ ( ບໍ່ແກ້ວ – ສິບສອງພັນນາ ) ຄັ້ງທີ I ທີ່ເດີນກິລາ ບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ລະຫວ່າງວັນທີ 01 – 07 ທັນວາ 2019.

ໃຫ້ກຽດເຂົ້າຮ່ວມໂດຍທ່ານ ປອ ບົວຄົງ ນາມມະວົງ ເຈົ້າແຂວງແຂວງບໍ່ແກ້ວ, ທ່ານ ລໍຈິນເວີຍ ຫົວໜ້າພະແນກການຄ້າ ກິ່ງແຂວງສິບສອງພັນນາ, ທ່ານ ກົງໂຢຈິນ ຫົວໜ້າສະພາການຄ້ານໍາເຂົ້າ – ສົ່ງອອກ ກິ່ງແຂວງສິບສອງພັນນາ ພ້ອມດ້ວຍຄະນະ, ມີບັນດາຫົວໜ້າ ຮອງຫົວໜ້າ ກົມນໍາເຂົ້າ – ສົ່ງອອກ ກະຊວງອຸດສາຫະກຳ ແລະ ການຄ້າ, ຫົວໜ້າ, ຮອງຫົວໜ້າພະແນກອຸດສາຫະກຳ ແລະ ການຄ້າ 6 ແຂວງພາກເໜືອ ແລະ ຫົວໜ້າ, ຮອງຫົວໜ້າພະແນກການອ້ອມຂ້າງແຂວງ – ເມືອງ, ນັກທຸລະກິດ, ພໍ່ຄ້າຊາວຂາຍທັງພາຍໃນ ແລະ ຕ່າງປະເທດ ຕະຫຼອດຮອດພໍ່ແມ່ປະຊາຊົນບັນດາເຜົ່າເຂົ້າຮ່ວມ.

ທ່ານ ນາງ ພວງພັນ ພູມສະຫວັນ ຫົວໜ້າພະແນກອຸດສາຫະກຳ ແລະ ການຄ້າ ແຂວງບໍ່ແກ້ວ ໄດ້ຂຶ້ນລາຍງານຜົນການກະກຽມການຈັດງານວາງສະແດງສິນຄ້າລາວ – ຈີນ ຄັ້ງທີ I ວ່າ: ການຈັດງານໃນຄັ້ງນີ້ເພື່ອເປັນການເສີມຂະຫຍາຍຜູກແໜ້ນສາຍພົວພັນມິດຕະພາບ ແລະ ເປີດກວ້າງການພົວພັນຮ່ວມມືດ້ານຄ້າລະຫວ່າງແຂວງຕໍ່ແຂວງກັບຕ່າງປະເທດໂດຍສະເພາະແຂວງຊາຍແດນກັບປະເທດເພື່ອນມິ ລາວ – ໄທ ຈີນໃຫ້ນັບມື້ນັບຂະຫຍາຍຕົວເພີ່ມຂຶ້ນໄປທົ່ວທຸກພູມມີພາກ ແລະ ທັງເປັນການຊຸກຍູ້ສົ່ງເສີມໃຫ້ຜູ້ປະກອບການທຸລະກິດຂະໜາດກາງ, ຂະໜາດນ້ອຍມີໂອກາດນໍາເອົາສິນຄ້າຂອງຕົນຜະລິດນໍ້າເຂົ້າສູ່ຕະຫຼາດ ເພື່ອໃຫ້ມີການຊື້ຂາຍແລກປ່ຽນສິນຄ້າເຊິ່ງກັນ ແລະ ກັນ.

ສິນຄ້າຫຼັກທີ່ນໍາມາວາງສະແດງ ແລະ ຈຳໜ່າຍປະກອບມີ ຜະລິດຕະພັນປຸງແຕ່ງໄມ້ ( ເຟີນີເຈີ ), ຜະລິດຕະຫັດຖະກຳຈັກສານດ້ວຍໄມ້, ຫວາຍ, ດອກເຂັມ ແລະ ຫັດຖະກຳຖັກແສ່ວ, ປະກອບມີ 168 ຮ້ານ ມີມູນຄ່າທັງໝົດ 8 ຕື້ກວ່າກີບ ໃນນັ້ນມາຈາກກຸ່ມທຸລະກິດຕະຫຼາດນັດ 68 ຮ້ານ, ສິນຄ້າມາຈາກ ສປ ຈີນ ມີ 50 ຮ້ານ, ໃນນີ້ມີສິນຄ້າມາຈາກຣາຊອະນາຈັກໄທ ມີ 4 ຮ້ານ, ສິນຄ້າຕ່າງແຂວງມີ 9 ຮ້ານ, ສິນຄ້າພາຍໃນແຂວງ – ເມືອງ ມີ 50 ຮ້ານ. 

ໃນຕອນທ້າຍພິທີ ຍັງໄດ້ປະກາດຜົນການປະກວດ ຜະລິດຕະພັນເຟີນີເຈີ ດີເດັ່ນ ປະຈຳປີ 2019 ລາງວັນທີ 1 ໄດ້ແກ່ ໂຮງງານປຸງແຕ່ງໄມ້ສຳເລັດຮູບ ແລະ ເຟີນີເຈີສິງທຸນສ່ວນບຸກຄົນ, ລາງວັນທີ 2 ໄດ້ແກ່ ໂຮງງານປຸງແຕ່ງໄມ້ທອງດີ, ລາງວັນທີ່ 3 ໄດ້ແກ່ ໂຮງງານເຟີນີເຈີໄມ້ ຈັນສະໄໝ ແລະ ລາງວັນທີ 4 ໄດ້ແກ່ໂຮງງານຫັດຖະກຳປຸງແຕ່ງໄມ້ບຸນເພັດ ໃຫ້ກຽດຂຶ້ນມອບລາງວັນ, ໃບຍ້ອງຍໍ, ໂລກຽດຕິຄຸນໃຫ້ແກ່ນັກທຸລະກິດໂດຍທ່ານ ປອ ບົວຄົງ ນາມມະວົງ.