ອຸດົມໄຊ ທໍາລາຍສິນຄ້າໝົດອາຍຸ ແລະ ສິນຄ້າບໍ່ຖືກຕ້ອງຕາມລະບຽບກົດໝາຍ ມູນຄ່າ 60ລ້ານກ່ວາກີບ

361

ພະແນກອຸດສາຫະກຳ ແລະ ການຄ້າແຂວງອຸດົມໄຊ ທຳລາຍສິນຄ້າໝົດອາຍຸ ລອກຮຽນແບບ
ປອມແປງ ສິນຄ້າເກື່ອດຫ້າມ ແລະ ສິນຄ້າທີ່ບໍ່ຖືກຕ້ອງຕາມລະບຽບກົດໝາຍ ລວມມູນຄ່າ 61.841.000 ກີບ.

ຕອນເຊົ້າວັນທີ 20 ທັນວາ 2019 ທີ່ຜ່ານມາ ທີ່ສາງທັນຍາຫານແຂວງອຸດົມໄຊ ພະແນກອຸດສາຫະກຳ ແລະ ການຄ້າແຂວງອຸດົມໄຊ ທຳລາຍສິນຄ້າໝົດອາຍຸ ລອກຮຽນແບບ ປອມແປງ ສິນຄ້າເກື່ອດຫ້າມ ແລະ ສິນຄ້າທີ່ບໍ່ຖືຕ້ອງຕາມລະບຽບກົດໝາຍ ໃຫ້ກຽດເຂົ້າຮ່ວມໃນພິທີທຳລາຍສິນຄ້າຄັ້ງນີ້ມີທ່ານ ສອນທະນູ ສິງດາລາ ຫົວໜ້າພະແນກອຸດສາຫະກຳ ແລະ ການຄ້າແຂວງ ອຸດົມໄຊ, ມີຕາງໜ້າຈາກພະແນກການ ອົງການທີ່ກ່ຽວຂ້ອງ, ຫົວໜ້າຂະແໜງການພາຍໃນພະແນກອຸດສາຫະກຳ ແລະ ການຄ້າ ພ້ອມດ້ວຍເຈົ້າໜ້າທີ່ກວດກາການຄ້າເຂົ້າຮ່ວມ.

ສິນຄ້າທີ່ຍຶດໄດ້ລວມມີສິນຄ້າໝົດອາຍຸປະເພດເຄື່ອງດື່ມ ແລະ ອາຫານແຫ້ງ, ສິນຄ້າປອມແປງ ລອກຮຽນແບບ ແລະ ສິນຄ້າທີ່ຜິດລະບຽບ ກົດໝາຍມີປະເພດແຟັບ ຈານດາວທຽມ ແປ້ງນົວ ຢາສະຫົວ ຢາສູບ ແລະ ເຄື່ອງຊັອດປາຈຳນວນ 4 ເຄື່ອງ ລວມສິນຄ້າທີ່ນຳມາທຳລາຍຄັ້ງນີ້ມີມູນຄ່າທັງໝົດ 61.841.000 ກີບ.

ເປັນພຽງພາບປະກອບ

ທ່ານ ຈັນເພັງ ຕອມກັນຍາ ຫົວໜ້າຂະແໜງການຄ້າພາຍໃນໃຫ້ຮູ້ວ່າ: ໂດຍປະຕິບັດຕາມກົດໝາຍວ່າດ້ວຍການປົກປ້ອງຜູ້ຊົມໃຊ້ ແລະ ດຳລັດວ່າດ້ວຍການກວດກາການຄ້າ ເຈົ້າໜ້າທີ່ກວດກາການຄ້າກໍໄດ້ເອົາໃຈໃສ່ປະຕິບັດວຽກງານຕາມພາລະບົດບາດ ສິດ ແລະ ໜ້າທີ່ ໃນການຕິດຕາມກວດກາ ແລະ ສະກັດກັ້ນ ບັນດາຫົວໜ່ວຍທຸລະກິດທີ່ເຄື່ອນໄຫວບໍ່ຖືກຕ້ອງຕາມລະບຽບກົດໝາຍຢ່າງເປັນປົກກະຕິ ເພື່ອເຮັດໃຫ້ສັງຄົມມີຄວາມສະຫົງບ ຊີວິດການເປັນຢູ່ຂອງພໍ່ແມ່ປະຊາຊົນ ໄດ້ຮັບການບໍລິໂພກ ແລະ ອຸປະໂພກ ສິນຄ້າທີ່ມີຄຸນນະພາບ ສິນຄ້າໄດ້ມາດຕະຖານ ແລະ ປອດໄພຕໍ່ສຸຂະພາບ. ໂອກາດດຽວກັນນີ້ທ່ານຍັງຮຽກຮ້ອງໃຫ້ຜູ້ປະກອບການຖືສຳຄັນໃນການປະຕິບັດລະບຽບກົດໝາຍ ແລະ ກວດກາເບີ່ງສິນຄ້າກ່ອນທີ່ຈະນຳມາວາງຂາຍ ສ່ວນຜູ້ບໍລິໂພກກ່ອນຈະຊື້ເຄື່ອງບໍລິໂພກປະເພດອາຫານແຫ້ງກໍຄວນກວດກາເບີ່ງວັນເດືອນປີທີ່ຜະລິດໃຫ້ລະອຽດເພື່ອໃຫ້ໄດ້ຮັບສິນຄ້າທີ່ດີ ມີຄຸນນະພາບ ແລະ ປອດໄພຕໍ່ສຸຂະພາບ.

ທີ່ມາ: Media Laos