ມອບ – ຮັບ ເປັນທາງການ ສວນສາທາລະນະ ສີສົມພອນ ລໍວັນໄຊ ທີ່ບໍລິຄຳໄຊ

473

ພິທີມອບ-ຮັບ ໂຄງການກໍ່ສ້າງ ສວນສາທາລະນະ ສີສົມພອນ ລໍວັນໄຊ ໄດ້ຈັດຂຶ້ນໃນຕອນເຊົ້າຂອງວັນທີ 23 ທັນວາ 2019 ຢູ່ສວນສາທາລະນະ ສີສົມພອນ ລໍວັນໄຊ, ກ່າວມອບໂດຍທ່ານ ພັອ ຫວໍວັນຫຽບ ຜູ້ອຳນວຍການໃຫຍ່ ສະຫະບໍລິສັດ ຮ່ວມມືເສດຖະກິດ ໂກເອໂກ ແລະ ກ່າວຮັບໂດຍທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ, ໂດຍຊ້ອງໜ້າຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີການນຳຂອງແຂວງ, ເມືອງ, ພະແນກການທີ່ກ່ຽວຂ້ອງ ແລະ ພະນັກງານວິຊາການ ທັງສອງຝ່າຍເຂົ້າຮ່ວມເປັນສັກຂີພິຍານ.

ທ່ານ ພັອ ຫວໍວັນຫຽບ ໄດ້ລາຍງານການຈັດຕັ້ງປະຕິບັດວຽກງານດັ່ງກ່າວວ່າ: ໂຄງການກໍ່ສ້າງ ສວນສາທາລະນະ ສີສົມພອນ ລໍວັນໄຊ ໄດ້ເລີ່ມລົງມືກໍ່ສ້າງມາແຕ່ວັນທີ 24 ເມສາ 2017 ຫາວັນທີ 24 ພະຈິກ 2019 ເປັນເວລາ 30 ເດືອນ ໂດຍສຳເລັດຕາມກຳນົດສັນຍາ ໃນເນື້ອທີ 32.000 m2 ມູນຄ່າທັງໝົດ 19.991.439.000 ກີບ, ໂຄງການດັ່ງກ່າວ ຈັດຢູ່ໃນໂຄງການປະເພດ 5 ຊຶ່ງໄດ້ຮັບການປະມູນຮັບເໝົາກໍ່ສ້າງໂຄງການໂດຍ ສະຫະບໍລິສັດ ຮ່ວມມືເສດຖະກິດ ໂກເອໂກ ສສ ຫວຽດນາມ.

ສຳລັບວຽກເພີ່ມນອກ ແລະ ໃນສັນຍາ ທີ່ໄດ້ດັດແກ້ ມູນຄ່າເກີນສັນຍາ 200 ກວ່າລ້ານກີບ ບໍລິສັດເຫັນດີ ມອບໃຫ້ເປັນການຊ່ວຍເຫຼືອໃນການພັດທະນາແຂວງບໍລິຄຳໄຊ ແລະ ບໍລິສັດຮັບເໝົາກໍ່ສ້າງມີສັນຍາຄ້ຳປະກັນ 12 ເດືອນ ນັບແຕ່ວັນທີ 1 ມັງກອນ 2020 ຫາ 30 ທັນວາ 2020, ຈາກນັ້ນ ທັງສອງຝ່າຍຍັງກໍ່ໄດ້ເຊັນບົດບັນທຶກມອບ-ຮັບ ຢ່າງເປັນທາງການ.