ກົມ​ຄຸ້ມ​ຄອງ​ແຮງ​ງານ ກວດກາ​ແຮງ​ງານ​ໄດ້​ 3.187 ຫົວໜ່ວຍ ໃນປີ 2019

430

ກົມ​ຄຸ້ມ​ຄອງ​ແຮງ​ງານ ກະຊວງ​ແຮງ​ງານ ​ແລະ ສະຫວັດດີສັງຄົ​ມ ຈັດ​ກອງ​ປະຊຸມ​ສະຫລຸບ​ການຈັດ​ຕັ້ງ​ປະຕິບັດ​ຄາດໝາຍ​ສູ້​ຊົນ ວຽກງານ​ຄຸ້ມ​ຄອງ​​ແຮງ​ງານ ປະຈຳ​ປີ 2019 ​ແລະ ວາງ​ແຜນການ​ປະຕິບັດ​ຄາດໝາຍ, ການ​ບັງ​ຄັບ​ໃຊ້​ກົດໝາຍ ​ແລະ ລະບຽບ​ດ້ານ​ແຮງ​ງານ​ທີ່​ມີ​ປະສິດທິພາບ​ໃນ​ປີ 2020 ໃນ​ວັນ​ທີ 24 ທັນວາ 2019 ​​ເຊິ່ງ​ໃນ​ປີນີ້, ກົມ​ຄຸ້ມ​ຄອງ​ແຮງ​ງານສາມາດ​ກວດກາ​ແຮງ​ງານ​ໄດ້​ທັງ​ໝົດ 3.187 ຫົວໜ່ວຍ ລື່ນ​ຄາດໝາຍ 27%, ​ໄດ້​ຮັບ​ການ​ຮ້ອງ​ຮຽນ ​ໃຫ້​ແກ້​ໄຂ​ຂໍ້​ຂັດ​ແຍ່ງ​ແຮງ​ງານ 119 ກໍລະນີ ​ແລະ ສາມາດ​ແກ້​ໄຂ​ໄດ້ 100%, ຊຸກຍູ້​ໃຫ້​ບັນດາ​ຫົວໜ່ວຍ​ແຮງ​ງານ​ມີ​ກົດ​ລະບຽບ​ໃນ​ການ​ຄຸ້ມ​ຄອງ ​ແລະ ນຳ​ໃຊ້​ແຮງ​ງານ​ພາຍ​ໃນ​ຫົວໜ່ວຍ​ແຮງ​ງານ​ໄດ້ 437 ຫົວໜ່ວຍ ລື່ນ​ຄາດໝາຍ 49%, ຊຸກຍູ້​ຫົວໜ່ວຍ​ແຮງ​ງານ​ທີ່​ນຳ​ໃຊ້​ແຮງ​ງານ 50 ຄົນ​ຂຶ້ນ​ໄປ ​ໃຫ້​ມີ​ສັນຍາ​ແຮງ​ງານ​ໄດ້ 175 ຫົວໜ່ວຍ ​ແລະ ຫົວໜ່ວຍ​ແຮງ​ງານ​ທີ່​ນຳ​ໃຊ້​ແຮງ​ງານ 100 ຄົນ​ຂຶ້ນ​ໄປ ສ້າງ​ຕັ້ງ​ຄະນະ​ຮັບຜິດ ຊອບ​ຄວາມ​ປອດ​ໄພ ​ແລະ ສຸຂະພາບ​ແຮງ​ງານ​ພາຍ​ໃນ​ຫົວໜ່ວຍ​ແຮງ​ງານ​ໄດ້ 2 ​ແຫ່ງ.

​ໂອກາດ​ນີ້, ທ່ານ ຄຳ​ແພງ ​ໄຊ​ສົມ​ແພງ ລັດຖະມົນຕີ​ກະຊວງ ກະຊວງ​ແຮງ​ງານ ​ແລະ ສະ ຫວັດດີສັງຄົ​ມ ກໍ​ໄດ້​ໂອ​ລົມ​ຕໍ່​ກອງ​ປະຊຸມ ​ໂດຍ​ທ່ານ​ໄດ້​ເນັ້ນ​ໃຫ້ ກົມ​ຄຸ້ມ​ຄອງ​ແຮງ​ງານ​ເອົາ​ໃຈ​ໃສ່​ໃນ​ການ​ປົກ​ປ້ອງ​ສິດ ​ແລະ ຜົນ​ປະ​ໂຫຍ​ດຂອງ​ຜູ້​ອອກ​ແຮງ​ງານ​ລາວ ທີ່​​ເຮັດ​ວຽກ​ຢູ່​ຕ່າງປະ​ເທດ​ຕາມ​ກົດ ໝາຍ​ທີ່​ມີ, ຖ້າ​ມີ​ບັນຫາ​ສິ່ງ​ທ້າ​ທາຍ​ກໍ​ໃຫ້​ຄົ້ນຄວ້າ ​ແລະ ສະ​ເໜີ​ຄະນະ​ນຳ​ເພື່ອ​ປັບ​ປຸງ​​ແກ້​ໄຂ, ການ​ຄຸ້ມ​ຄອງ​ແຮງ​ງານ​ຕ່າງປະ​ເທດ ກໍ​ເຊັ່ນ​ດຽວ​ກັນ ​ໃຫ້​ຖື​ເອົາ​ບົດຮຽນ​ທີ່​ໄດ້​ຈາກ​ການ​ປະຕິບັດ​ຄຳ​ສັ່ງ​ຂອງ​ນາຍົກລັດຖະມົນຕ ​ເລກທີ 62/ນຍ ​ເປັນ​ບ່ອນ​ອີງ​ໃນ​ການສະ​ເໜີ​ວິທີ​ການ​ແກ້​ໄຂ​ໄວ​ເທົ່າ​ທີ່​ຈະ​ໄວ​ໄດ້ ​ເພາະ​ສັງຄົມ​ກຳລັງ​ໃຫ້​ຄວາມ​ສົນ​ໃຈ​ກ່ຽວ​ກັບ​ບັນຫາ​ນີ້​ຢ່າງ​ຫລວງຫລາຍ ​ແລະ ວິທີ​ການ​ແກ້​ໄຂ​ກໍ​ພະຍາຍາມ​ເຮັດ​ໃຫ້​ເກີດ​ຜົນ​ປະ​ໂຫຍ​ດ​ແກ່​ປະ​ເທດ ​ແລະ ກຳລັງ​ແຮງ​ງານ​ລາວ. ສ່ວນ​ການ​ແຮງ​ງານ​ທີ່​ມີ​ຄວາມ​ຈຳ​ເປັນ​ທີ່​ຕ້ອງ​ໄດ້​ປົກ​ປ້ອງ ​ຕ້ອງ​ເຮັດ​ໄປ​ຕາມ​ມາດຕະຖານ​​ແຮງ​ງານ​ທັງ​ຂອງ​ພາກ​ພື້ນ, ສາກົນ ​ແລະ ປະ​ເທດ​ເຮົາ, ພ້ອມ​ກັນ​ນີ້​ໃຫ້​ເອົາ​ໃຈ​ໃສ່​ກ່ຽວ​ກັບ​ວຽກ​ງານ​ຄວາມ​ປອດ​ໄພ ສຸຂະພາບ​ແຮງ​ງານ ​ໂດຍ​ສະ​ເພາະ​ແມ່ນ​ການກວດ​ສຸຂະພາບ​ປະຈຳ​ປີ ​ໃຫ້​ແຮງ​ງານ ​ແລະ ອື່ນໆ.

(ຂ່າວຮສສ: ເພັດສະໄໝ, ພາບ: ໜູທອງ)