ທ່ານ ຂັນໄຊ ລັດຖະເຮົ້າ ຖືກເລືອກເປັນຫົວໜ້າພະແນກ ວິທະຍາສາດ ແລະ ເຕັກໂນໂລຊີ ສາລະວັນ ຜູ້ໃໝ່

398

ພະແນກວິທະຍາສາດ ແລະ ເຕັກໂນໂລຊີແຂວງສາລະວັນ ໄດ້ຈັດພິທີ ມອບ-ຮັບຫົວໜ້າພະແນກ ຜູ້ເກົ່າ ແລະ ຜູ້ໃໝ່ ລະຫວ່າງ ທ່ານ ແຫວນເພັດ ລັດດາວົງ ກຳມະການພັກແຂວງ ຫົວໜ້າພະແນກ ວິທະຍາສາດ ແລະ ເຕັກໂນໂລຊີ ຜູ້ເກົ່າ ແລະ ທ່ານ ຂັນໄຊ ລັດຖະເຮົ້າ ກໍາມະການພັກແຂວງ ເປັນຫົວໜ້າພະແນກວິທະຍາ ສາດແລະ ເຕັກໂນໂລຊີ ຜູ້ໃໝ່.

ພິທີດັ່ງກ່າວຈັດຂຶ້ນໃນວັນທີ 20 ທັນວາ 2019 ທີ່ຜ່ານມາຢູ່ທີ່ຫ້ອງປະຊຸມຂອງພະແນກ ວິທະຍາສາດແລະ ເຕັກໂນໂລຊີແຂວງສາລະວັນ, ເປັນກຽດເຂົ້າຮ່ວມໂດຍສະຫາຍ ບົວທອງ ຄຸນຍອດປັນຍາ ຮອງເລຂາພັກແຂວງ ຮອງເຈົ້າແຂວງສາລະວັນ,ມີການນຳແຂວງ, ຫົວໜ້າ-ຮອງພະແນກການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂດຍປະຕິບັດຕາມຂໍ້ຕົກລົງ ຂອງທ່ານເຈົ້າແຂວງສາລະວັນ ສະບັບເລກທີ708/ຈຂ.ສວ, ລົງວັນທີ 11 ພະຈິກ 2019 ວ່າດ້ວຍກນແຕ່ງຕັ້ງທ່ານ ແຫວນເພັດ ລັດດາວົງ ເປັນເຈົ້າເມືອງຄົງເຊໂດນ, ປະຕິບັດຕາມຂໍ້ຕົກລົງ ຂອງທ່ານເຈົ້າແຂວງສາລະວັນ ສະບັບເລກທີ 765/ຈຂ.ສວ, ລົງວັນທີ 4 ທັນວາ 2019 ວ່າດ້ວຍການຕົກລົງແຕ່ງຕັ້ງ ທ່ານ ຂັນໄຊ ລັດຖະເຮົ້າ ເປັນຫົວໜ້າ ພະແນກ ວິທະຍາສາດ ແລະ ເຕັກໂນໂລຊີແຂວງສາລະວັນ ຜູ້ໃໝ່, ອີງຕາມ ຂໍ້ຕົກລົງ ຂອງທ່ານເຈົ້າແຂວງສາລະວັນ ສະບັບເລກທີ 767/ຈຂ.ສວ, ລົງວັນທີ 4 ທັນວາ 2019 ວ່າດ້ວຍ: ການຕົກລົງແຕ່ງຕັ້ງ ທ່ານ ຄໍາສຸກ ແກ້ວວົງສອງ ເປັນຮອງຫົວໜ້າພະແນກ ວິທະຍາສາດ ແລະ ເຕັກໂນໂລຊີ ແຂວງສາລະວັນ ຜູ້ໃໝ່, ຈາກນັ້ນທ່ານ ແຫວນເພັດ ລັດດາວົງ ກໍໄດ້ຂຶ້ນກ່າວມອບໜ້າທີ່ວຽກງານໃນແຕ່ລະດ້ານ ໃນໄລຍະຜ່ານມາທີ່ໄດ້ຊີ້ນໍາໆພາມີທັງດ້ານດີ, ດ້ານອ່ອນ, ຂໍ້ຄົງຄ້າງ ແລະ ແຜນສືບຕໍ່ປະຕິບັດໃນຕໍ່ໜ້າ ພ້ອມດຽວກັນທ່ານ ຂັນໄຊ ລັດຖະເຮົ້າ ກໍໄດ້ຂຶ້ນກ່າວຮັບໜ້າທີ່ຢ່າງເປັນທາງການ.

ຈາກນັ້ນກໍໄດ້ມີການເຊັນບົດບັນທຶກ ມອບ-ຮັບໜ້າທີ່ຢ່າງເປັນທາງການ ລະຫວ່າງ ທ່ານ ແຫວນເພັດ ລັດດາວົງ ກຳມະການພັກແຂວງ ຫົວໜ້າພະແນກ ວິທະຍາສາດ ແລະ ເຕັກໂນໂລຊີ ຜູ້ເກົ່າ ກັບທ່ານ ຂັນໄຊ ລັດຖະເຮົ້າ ກຳມະການພັກແຂວງ ເປັນຫົວໜ້າພະແນກ ວິທະຍາສາດ ແລະ ເຕັກໂນໂລຊີ ຜູ້ໃໝ່ ໂດຍຊ້ອງໜ້າຂອງທ່ານ ບົວທອງ ຄຸນຍອດປັນຍາ ຮອງເລຂາພັກແຂວງ ຮອງເຈົ້າແຂວງສາລະວັນ, ມີບັນດາການນໍາຈາກພະແນກການອ້ອມຂ້າງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.