ຊົມເຊີຍ! ລົງທຶນ 6ຕື້ກ່ວາກີບເພື່ອສໍາປະທານເກັບຊື້ ພ້ອມສົ່ງເສີມປູກໃບຊາໝ້ຽງ

435

ພິທີເຊັນສັນຍາໂຄງການສໍາປະທານເກັບຊື້ ແລະ ສົ່ງເສີມການປູກຕົ້ນໃບຊາໝ້ຽງຢູ່ #ແຂວງໄຊຍະບູລີ ໄດ້ຈັດຂຶ້ນໃນວັນທີ 19 ທັນວາ 2019 ນີ້ຢູ່ທີ່ຫ້ອງປະຊຸມພະແນກແຜນການ ແລະ ການຮ່ວມມືແຂວງໄຊຍະບູລີ. ເຂົ້າຮ່ວມເປັນສັກຂີພິຍານ ຂອງ ທ່ານ ພົງສະຫວັນ ສິດທະວົງ ເຈົ້າແຂວງແຂວງໄຊຍະບູລີ, ມີເຈົ້າເມືອງເມືອງໄຊຍະບູລີ, ເມືອງບໍ່ແຕນ ພ້ອມດ້ວຍພະແນກການທີ່ກ່ຽວຂ້ອງ ແລະ ວິຊາການທັງສອງຝ່າຍເຂົ້າຮ່ວມ.

ເພື່ອຕອບສະໜອງແນວທາງນະໂຍບາຍພັກ-ລັດ ກ່ຽວກັບການສົ່ງເສີມການຜະລິດເປັນສິນຄ້າ ເພື່ອຈໍາໜ່າຍພາຍໃນ ແລະ ສົ່ງອອກສິນຄ້າກະສິກໍາ ທັງເປັນການຟື້ນຟູສະພາບປ່າທີ່ຖືກທໍາລາຍຜ່ານມາ, ປ່າຊຸດໂຊມທີ່ປາສະຈາກຕົ້ນໄມ້ອຸດສາຫະກໍາ ແລະ ປູກຊາ ພ້ອມທັງວາງແຜນເພື່ອສ້າງເງື່ອນໄຂທີ່ດີໃຫ້ກັບສະພາບແວດລ້ອມ, ຫ້ວຍນໍ້າລໍາເຊ ແລະ ການປ້ອງກັນການເສາະເຈື່ອນ ດັ່ງນັ້ນທາງບໍລິສັດ ທຽນ ຜີນ ຫົງ ເຕັກໂນໂລຢີ ຊີວະພາບກະສິກໍາຈໍາກັດ.

ນັກທຸລະກິດຊາວຈີນໄດ້ລົງທຶນສົ່ງເສີມປະຊາຊົນປູກ, ເກັບຊື້ ແລະ ປຸງແຕ່ງຊາພື້ນບ້ານທໍາມະຊາດຢູ່ແຂວງໄຊຍະບູລີ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ (ຈີນ) ເພື່ອຍົກບົດບາດການຜະລິດກະສິກໍາໃຫ້ໄດ້ຕາມເປົ້າ ໝາຍຂອງກະຊວງກະສິກໍາ ແລະ ປ່າໄມ້ວາງອອກນັ້ນ ການຜະລິດໃຫ້ໄດ້ທັງປະລິມານ ແລະ ຄຸນນະພາບເພື່ອໃຫ້ມີທ່າອ່ຽງເພີ່ມຂຶ້ນເລື່ອຍໆ ບວກກັບທ່າແຮງຂອງບໍລິສັດທີ່ມາລົງທຶນໃຫ້ໄດ້ຕາມຈຸດປະສົງ ແລະ ລະດັບຄາດໝາຍ ເພື່ອສ້າງວຽກເຮັດງານທໍາໃຫ້ແກ່ປະຊາຊົນແກ້ໄຂຄວາມທຸກຍາກ ຂອງພໍ່ແມ່ປະຊາຊົນເທື່ອລະກ້າວ.

ບັນດາໂຄງການສໍາປະທານເກັບຊື້ ແລະ ສົ່ງເສີມການປູກຕົ້ນໃບຊາໝ້ຽງ ຂອງບໍລິສັດ ທຽນ ຜີນ ຫົງ ເຕັກໂນໂລຢີຊີວະພາບກະສິກໍາຈໍາກັດ ຈະໄດ້ລົງມືຢູ່ແຂວງໄຊຍະບູລີ ແຕ່ປີ 2020 ເປັນຕົ້ນໄປກໍານົດ 25 ປີຈະໄດ້ປະຕິບັດຢູ່ 2 ເມືອງເຊັ່ນ: ເມືອງໄຊຍະບູລີຢູ່ບ້ານນໍ້າຄາ ສໍາປະທານທີ່ດິນລັດເພື່ອບົວລະບັດຮັກສາຕົ້ນຊາໝ້ຽງທໍາມະຊາດ ແລະ ສົ່ງເສີມການປູກ, ເກັບຊື້ ແລະ ສ້າງຕັ້ງໂຮງງານໃນເນື້ອທີ່ 75,7 ເຮັກຕາ ໃນນີ້ມີຕົ້ນຊາໝ້ຽງທໍາມະຊາດມີຢູ່ 3.346 ຕົ້ນ, ຄາດຄະເນທຶນທີ່ຈະນໍາໃຊ້ເຂົ້າດໍາເນີນກິດຈະການທັງໜົດ 4 ຕື້ 109 ລ້ານກວ່າກີບ, ສ່ວນເມືອງບໍ່ແຕນແມ່ນກໍານົດເອົາບ້ານໜອງປາຈີດ, ບ້ານກຸ່ມມີເນື້ອທີ່ທັງໝົດ 84 ເຮັກຕາ, ມີຕົ້ນຊາໝ້ຽງທໍາມະຊາດທັງໝົດ 5379 ຕົ້ນ, ມີທຶນທັງໝົດ 2 ຕື້ 388 ລ້ານກວ່າກີບ

ລວມທຶນທັງໝົດ ທີ່ທາງບໍລິສັດ ທຽນ ຜີນ ຫົງ ເຕັກໂນລົງຢີຊີວະພາບກະສິກໍາຈໍາກັດຂອງບໍລິສັດຈີນທີ່ລົງທຶນຢູ່ແຂວງໄຊຍະບູລີມີທັງໝົດ 6 ຕື້ 500 ກວ່າລ້ານກີບ, ກໍານົດ 25 ປີ, ນອກຈາກການນໍາໃຊ້ຊາທໍາມະຊາດທີ່ມີຢູ່ແລ້ວທາງບໍລິສັດຈຶ່ງໄດ້ວາງແຜນຂະຫຍາຍເນື້ອທີ່ປູກຊາ, ກະກຽມເບ້ຍຊາ, ປຸຍ ໂດຍຈະນໍາໃຊ້ແຮງງານຂອງປະຊາຊົນທີ່ເໜາະສົມ. ຈາກນັ້ນ ທ່ານ ນາງ ຄໍາມີ ຈັນທິບ ຫົວໜ້າພະແນກແຜນການ ແລະ ການລົງທຶນແຂວງ ຕາງໜ້າອົງການປົກຄອງແຂວງ ແລະ ທ່ານ ເຊຍ ຈຸນລຸຍ ປະທານບໍລິສັດທຽນຜິນ ຫົງ ເຕັກໂນໂລຊີຊີວະພາບກະສິກໍາຈໍາກັດ ໄດ້ຮ່ວມກັນເຊັນສັນຍາຢ່າງເປັນທາງການ.

ຂອບໃຈ: Media Laos