ລາວມີສູນຂໍ້ມູນຂ່າວສານແຜ່ນດິນໄຫວແຫ່ງຊາດແລ້ວ ຈະສາມາດແຈ້ງຂໍ້ມູນແຜ່ນດິນໄຫວໄດ້ຢ່າງວ່ອງໄວ

615

ກ່ອນໜ້ານີ້ເມື່ອເກີດແຜ່ນດິນໄຫວໃນ ສປປ ລາວ ກໍ່ອາໃສຂໍ້ມູນຂ່າວສານແຈ້ງຈາກສູນຂອງປະເທດໄທ ຫຼື ຈີນ ມາຮອດປັດຈຸບັນນີ້ຖືວ່າ ສປປ ລາວ ໄດ້ມີສູນຂໍ້ມູນຂ່າວສານແຜ່ນດິນໄຫວແຫ່ງຊາດແລ້ວ ເຊິ່ງໄດ້ຮັບການຊ່ວຍເຫຼືອຈາກ ສປ ຈີນ ແລະ ຈະສາມາດແຈ້ງຂໍ້ມູນແຜ່ນດິນໄຫວໄດ້ຢ່າງວ່ອງໄວ ຊ່ວຍຫຼຸດຄວາມເສຍຫາຍທີ່ອາດຈະເກີດຂຶ້ນ

ພິທີມອບ-ຮັບສູນຂໍ້ມູນຂ່າວສານແຜ່ນດິນໄຫວແຫ່ງຊາດລາວ ເຊິ່ງເປັນໂຄງການ ຊ່ວຍເຫຼືອຈາກລັດຖະບານ ສປ ຈີນ ໄດ້ຈັດຂຶ້ນໃນວັນທີ 20 ທັນວານີ້ທີ່ນະຄອນຫຼວງວຽງຈັນ ພາຍຫຼັງທີ່ວາງສີລາລີກກໍ່ສ້າງ ໂດຍການເຂົ້າຮ່ວມຂອງທ່ານ ໄຊນະຄອນ ອິນທະວົງ ຮອງລັດຖະມົນຕີ ກະຊວງຊັບພະຍາກອນ ທຳມະຊາດ ແລະສິ່ງແວດລ້ອມ, ທ່ານ ຫວາງ ຊີຫຸ່ຍ ທີ່ປຶກສາເສດຖະກິດ-ການຄ້າ ສະຖານທູດ ສປ ຈີນ ປະຈຳ ສປປ ລາວ ພ້ອມດ້ວຍພາກສ່ວນທີ່ກ່ຽວຂ້ອງຂອງສອງ ປະເທດຈີນ-ລາວ ເຂົ້າຮ່ວມພິທີດັ່ງກ່າວ.

ໂອກາດນີ້, ທ່ານ ຫວາງ ຊີຫຸ່ຍ ກ່າວວ່າ, ໂຄງການນີ້ເປັນອີກໂຄງການໜຶ່ງ ທີ່ລັດຖະບານຈີນ ຊ່ວຍເຫຼືອ ລັດຖະບານລາວເຊິ່ງສະແດງໃຫ້ເຫັນເຖິງການຮ່ວມມືທີ່ແໜ້ນແຟ້ນ ກໍ່ຄືມິດຕະພາບອັນເປັນມູນເຊື້ອລະຫວ່າງສອງປະເທດຈີນ-ລາວ. ໂຄງການດັ່ງກ່າວຈະຍົກລະດັບຄວາມສາມາດໃນການຕິດຕາມ ແລະປ້ອງກັນໄພແຜ່ນດິນໄຫວ ໂດຍຈະປັບປຸງລະບົບປ້ອງກັນໄພແຜ່ນດິນໄຫວ ຂອງລາວໃຫ້ມີປະສິດທິພາບກວ່າເກົ່າ.

ທ່ານ ຂັນມະນີ ຂຸນພົນ ຫົວໜ້າກົມອຸຕຸນິຍົມ ແລະອຸທົກກະສາດ ກະຊວງຊັບພະຍາກອນ ທຳມະຊາດ ແລະສິ່ງແວດລ້ອມ ໄດ້ສະແດງຄວາມຂອບໃຈຕໍ່ລັດຖະບານຈີນທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນວຽກງານຕິດຕາມແຜ່ນດິນໄຫວ. ທ່ານກ່າວວ່າ, ໂຄງການດັ່ງກ່າວເປັນການເພີ່ມທະວີ ແລະຍົກສູງຄວາມສາມາດໃນການວິເຄາະຂໍ້ມູນ, ການລາຍງານ, ການແຈ້ງຂໍ້ມູນຂ່າວສານແຜ່ນດິນໄຫວຂະໜາດ 3 ຣິກເຕີຂຶ້ນເມືອໄດ້ຢ່າງວ່ອງໄວ ແລະທັນການ ເຊິ່ງມີຄວາມໝາຍສຳຄັນຍິ່ງຕໍ່ການຫຼຸດຜ່ອນຄວາມເສຍຫາຍຂອງປະຊາຊົນ, ປ້ອງກັນແລະຫຼຸດຜ່ອນໄພພິບັດທໍາມະຊາດທາງທໍລະນີສາດໃນລາວກໍຄືພາກພື້ນ.

ຮູບປະກອບ ວາງສີລາລີກປີ 2018

ສູນຂໍ້ມູນຂ່າວສານແຜ່ນດິນໄຫວແຫ່ງຊາດລາວຕັ້ງຢູ່ກົມອຸຕຸນິຍົມແລະອຸທົກກະສາດ ເປັນອາຄານ 2 ຊັ້ນລວມຫ້ອງການເຮັດວຽກ 12 ຫ້ອງ ເປັນຕົ້ນແມ່ນຫ້ອງເຄື່ອງຕິດຕາມແຜ່ນດິນໄຫວ, ຫ້ອງ ເຄື່ອງຮັບ-ສົ່ງຂໍ້ມູນ, ຫ້ອງຕິດຕາມລະບົບວິເຄາະຈຸດເກີດແຜ່ນດິນໄຫວແລະອື່ນໆ ຄາດວ່າຈະເລີ່ມໃຊ້ງານໃນປີ 2020.

ຂ່າວ:ທ.ຍາວ ພາບ:ທ.ເລ້ CRI-FM93