11 ເດືອນ ອາກອນເຊກອງ ເກັບລາຍຮັບໄດ້ 48,58 ຕື້ກວ່າກີບ

407

ໃນໄລຍະຜ່ານມາໜ່ວຍພັກສ່ວຍສາອາກອນປະຈໍາແຂວງເຊກອງ ໄດ້ດໍາເນີນການຊີ້ນໍາຈັດຕັ້ງປະຕິບັດວຽກງານວິຊາສະເພາະຢ່າງຕັ້ງໜ້າ ໂດຍສະເພາະການເກັບກໍາຂໍ້ມູນດ້ານລາຍຮັບ, ການສ້າງແຜນການລາຍຮັບ ແລະ ການຈັດຕັ້ງປະຕິບັດເກັບລາຍຮັບເຂົ້າງົບປະມານຊຶ່ງຜ່ານການເຄື່ອນໄຫວໃນໄລຍະ 11 ເດືອນຂອງປີ 2019 ສາມາດເກັບລາຍຮັບໄດ້ 48,58 ຕື້ກວ່າກີບ

ຫຼ້າສຸດ, ເມື່ອວັນທີ 11 ທັນວາ 2019 ທີ່ຫ້ອງປະຊຸມພະແນກການເງິນແຂວງ, ໜ່ວຍພັກສ່ວຍສາອາກອນປະຈໍາແຂວງເຊກອງ ໄດ້ຈັດກອງປະຊຸມໃຫຍ່ຄັ້ງທີ II ຂອງຕົນຂຶ້ນ ໂດຍພາຍໃຕ້ການເປັນປະທານຂອງທ່ານ ລໍາທອງ ຍົນມະຫາໄຊ ເລຂາໜ່ວຍພັກ, ຫົວໜ້າສ່ວຍສາອາກອນປະຈໍາແຂວງ ໃຫ້ກຽດເຂົ້າຮ່ວມຂອງທ່ານ ອ້ວນຄໍາ ທຸງໄຊ ກໍາມະການພັກແຂວງ, ຫົວໜ້າຄະນະຈັດຕັ້ງແຂວງ ມີບັນດາຄະນະພັກຮາກຖານ, ຄະນະໜ່ວຍພັກ, ສະມາຊິກພັກ ແລະ ແຂກຖືກເຊີນເຂົ້າຮ່ວມ.

ທ່ານ ລໍາທອງ ຍົນມະຫາໄຊ ເລຂາໜ່ວຍພັກ, ຫົວໜ້າສ່ວຍສາອາກອນປະຈໍາແຂວງເຊກອງ ໄດ້ລາຍງານໃນກອງປະຊຸມໃຫຍ່ຄັ້ງນີ້ ເຊິ່ງໄດ້ນໍາສະເໜີບົດລາຍງານການເມືອງທີ່ໄດ້ຢັ້ງຢືນເຖິງຜົນງານ ແລະ ການເຄື່ອນໄຫວຈັດຕັ້ງປະຕິບັດຕະຫຼອດໄລຍະຜ່ານມາ ໂດຍພາຍໃຕ້ການຊີ້ນໍາໆພາຂອງຄະນະພັກຮາກຖານພະແນກການເງິນ, ຄະນະປະຈໍາພັກແຂວງ, ໜ່ວຍພັກໄດ້ເອົາໃຈໃສ່ສຶກສາອົບຮົມການເມືອງນໍາພາແນວຄິດໃຫ້ສະມາຊິກພັກ, ພະນັກງານຢ່າງເປັນປົກກະຕິ ໂດຍຖືເອົາການດໍາເນີນຊີວິດການເມືອງຂອງໜ່ວຍພັກ ເຮັດໃຫ້ສະມາຊິກພັກ, ພະນັກງານ-ລັດຖະກອນມີຄວາມຮັບຮູ້ເຂົ້າໃຈຕໍ່ແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດ, ຫັນເປັນແຜນງານ-ໂຄງການລະອຽດສາມາດຈັດຕັ້ງປະຕິບັດໃຫ້ປະກົດຜົນເປັນຈິງ.

ຕະຫຼອດໄລຍະຜ່ານມາ ໜ່ວຍພັກໄດ້ດໍາເນີນການຊີ້ນໍາໃນການຈັດຕັ້ງປະຕິບັດວຽກງານວິຊາສະເພາະຢ່າງຕັ້ງໜ້າ ໂດຍສະເພາະແມ່ນການເກັບກໍາຂໍ້ມູນດ້ານລາຍຮັບ, ການສ້າງແຜນການລາຍຮັບ ແລະການຈັດຕັ້ງປະຕິບັດເກັບລາຍຮັບເຂົ້າງົບປະມານ ແລະ ຜ່ານການເຄື່ອນໄຫວສາມາດເກັບລາຍຮັບ ໃນ 11 ເດືອນ (ເດືອນທີ 1-11) ປີ 2019 ສາມາດເກັບລາຍຮັບໄດ້ 48,58 ຕື້ກວ່າກີບ ທຽບໃສ່ແຜນເທົ່າກັບ 75,90%.

ຂະນະດຽວກັນ, ກອງປະຊຸມຍັງໄດ້ຜ່ານມະຕິ, ທິດທາງ ແລະ ຄາດໝາຍສູ້ຊົນໃນສະເພາະໜ້າ, ຈາກນັ້ນ ກໍໄດ້ດໍາເນີນການປ່ອນບັດຄັດເລືອກຄະນະພັກຊຸດໃໝ່ ໂດຍກອງປະຊຸມເຫັນດີເລືອກເອົາທ່ານ ລໍາທອງ ຍົນມະຫາໄຊ ເປັນເລຂາໜ່ວຍພັກ ເພື່ອເປັນໃຈກາງໃນການເຕົ້າໂຮມຄວາມສາມັກຄີ ແລະ ສືບຕໍ່ນໍາພາໜ່ວຍພັກ-ກົມກອງໃນຕໍ່ໜ້າ, ທ່ານ ສົມບູນ ພັນຈັນ ເປັນຮອງເລຂາ, ທ່ານ ສີສະໝຸດ ແສງນວນຈັນ ເປັນກໍາມະການ ແລະ ເປັນຜູ້ກວດກາໜ່ວຍພັກ.

(ເນື້ອໃນ: ອາກອນປະຈໍາແຂວງເຊກອງ)