ເມືອງສຸຂຸມາ ເກັບລາຍຮັບເຂົ້າງົບປະມານໄດ້ 8.859 ຕື້ກີບ 

475

ຕາມການລາຍງານຂອງຫ້ອງການ-ການເງິນເມືອງສຸຂຸມາ ແຂວງຈຳປາສັກ ໃຫ້ຮູ້ວ່າ: ປີ2019 ເມືອງສຸຂຸມາສາມາດຈັດເກັບລາຍຮັບເຂົ້າງົບປະມານໄດ້ 8.859 ຕື້ກີບ ທຽບໃສ່ແຜນການເທົ່າກັບ 84,47%.

ການລາຍງານດັ່ງກ່າວມີຂຶ້ນໃນວັນທີ 13 ພະຈິກ 2019 ໃນໂອກາດຫ້ອງການ-ການເງິນເມືອງສຸຂຸມາ ຈັດກອງປະຊຸມສະຫຼຸບວຽກງານການເງິນ ປະຈຳປີ 2019 ໂດຍການເປັນປະທານຂອງທ່ານ ໜູພັດ ສີໄວຍະວົງ ຄະນະປະຈໍາພັກເມືອງ ຮອງເຈົ້າເມືອງໆສຸຂຸມາ, ມີກໍາມະການພັກເມືອງ,ຫົວໜ້າຫ້ອງການອ້ອມຂ້າງເມືອງ, ພະນັກງານຈາກແຂວງທີ່ຫັນລົງກໍ່ສ້າງຮາກຖານ,ຫ້ອງການທີ່ກ່ຽວຂ້ອງຂອງເມືອງ,ພະນັກງານວິຊາການຈາກຫ້ອງການໆເງິນເມືອງປະທານກຸ່ມບ້ານ 6 ກຸ່ມບ້ານ, ພາສີບ້ານ ແລະ ນາຍບ້ານທົ່ວເມືອງເຂົ້າຮ່ວມຈໍານວນ 132 ທ່ານ, ຍິງ 7 ທ່ານ.

ໃນກອງປະຊຸມທ່ານ ບຸນຍູ້ ປາລະມີ ຫົວໜ້າຫ້ອງການໆເງິນເມືອງ ໄດ້ຜ່ານບົດສະຫຼຸບລາຍງານການຈັດຕັ້ງປະຕິບັດວຽກງານການເງິນຂັ້ນບ້ານສົກປີ2019ແລະທິດທາງແຜນການປີ2020 ເຊິ່ງໄດ້ຍົກໃຫ້ເຫັນການຈັດເກັບລາຍຮັບເຂົ້າງົບປະມານໄດ້ທັງໝົດ 8,859 ຕື້ກີບ.

ໃນນັ້ນ, ຮັບດຸ່ນດ່ຽງຈາກແຂວງ 5.780ຕື້ກີບ, ເມືອງຈັດເກັບໄດ້ 3.079 ຕື້ກີບ,ທຽບໃສ່ແຜນການເທົ່າກັບ 84,47% ທຽບໃສ່ໄລຍະດຽວກັນຂອງປີກ່ອນເທົ່າກັບ 93,47%. ໃນນັ້ນ: ຈັດເກັບຈາກສ່ວຍສາອາກອນຈໍານວນ 2.777 ຕື້ກີບທຽບໃສ່ແຜນການເທົ່າກັບ 79,36% ທຽບໃສ່ໄລຍະດຽວກັນຂອງປີກ່ອນເທົ່າກັບ 93,18%, ຈັດເກັບຈາກໜ່ວຍງານຊັບສິນ 301,7 ລ້ານກີບ ທຽບໃສ່ແຜນການເທົ່າກັບ 206,91% ທຽບໃສ່ໄລຍະດຽວກັນຂອງປີກ່ອນເທົ່າກັບ 96,25%.

ຂ່າວ-ພາບ ປັນຍາ ແກ້ວພິລົມຖວທ ເມືອງ