ສາເຫດມອບຂັນວາງລົງພື້ນ ອາດມາຈາກ ທີມເປຕັງຍິງ A ແລະ B ຂອງຝຣັ່ງ ເສຍໃຫ້ທີມເປຕັງຍິງຂອງລາວໃນຮອບຄັດເລືອກ

421

ເພຈໜັງສືພິມວຽງຈັນທາຍ ໃຫ້ຮູ່້ວ່າ: ສະຫະພັນເປຕັງແຫ່ງຊາດລາວຈະປຶກສາຫາລືກັບສະຖານທູດຝຣັ່ງປະຈຳ ລາວ ໃນກໍລະນີພຶດຕິກຳທີ່ບໍ່ເໝາະສົມຂອງປະທານສະຫະພັນເປຕັງນານາຊາດ Claude Azema ທີ່ໄດ້ວາງ ຂັນລາງວັນຂອງທີມຊາດລາວລົງພື້ນ ໃນເວລາມອບລາງວັນ ທີ່ປະເທດກຳ ປູເຈຍ.

ທ່ານ ຄຳຫຼ້າ ວິນໄລທອງ ປະທານ ສະຫະພັນເປຕັງແຫ່ງຊາດລາວໄດ້ໃຫ້ສຳພາດ ໃນມື້ວານນີ້ 26 ພະຈິກ 2019 ວ່າ ພາຍຫຼັງທີ່ພວກເຮົາກັບ ມາຈາກ ການແຂ່ງຂັນຊີເກມທີ່ປະ ເທດຟີລິບປິນແລ້ວ ພວກເຮົາຈະເຮັດ ໜັງສືສະເໜີພາກສວ່ນທີ່ກ່ຽວຂ້ອງໂດຍສະເພາະ ຫ້ອງສຳນັກງານນາຍົກລັດຖະມົນຕີ, ກະຊວງການຕ່າງປະເທດ ແລະ ພາກສວ່ນອື່ນໆ ກ່ອນຈະເອົາເອກະສານໄປຢຶ່ນສະຖານທູດຝຣັ່ງປະຈຳລາວ ເພື່ອຂໍປຶກສາຫາລືວ່າເປັນ ຫຍັງ ປະທານສະຫະພັນເປຕັງນານາ ຊາດຈຶ່ງເຮັດແບບນັ້ນ ແກ່ນັກກິລາເປ ຕັງຍິງທີມຊາດຂອງພວກເຮົາ ແລະ ຈະຊອກຫາວິທີທາງບໍ່ໃຫ້ເຫດການດັ່ງກ່າວໄດ້ເກີດຂຶ້ນອີກ.

ທ່ານ ຄຳຫຼ້າ ກ່າວຕື່ມອີກວ່າ ສາເຫດ ທີ່ເກີດເຫດການນີ້ ອາດຈະມາຈາກ ທີມເປຕັງຍິງ A ແລະ B ຂອງຝຣັ່ງ ເສຍໃຫ້ທີມເປຕັງຍິງຂອງລາວໃນຮອບຄັດເລືອກ, ສະນັ້ນນີ້ກໍ່ອາດເປັນໜຶ່ງ ເຫດຜົນທີ່ເຮັດໃຫ້ປະທານສະຫະພັນ ເປຕັງນານາຊາດ ໄດ້ເຮັດແບບນັ້ນ.

ພຶດຕິກຳທີ່ບໍ່ເໝາະສົມຂອງປະທານສະຫະພັນເປຕັງນານາຊາດ ທີ່ໄດ້ປະຕິບັດຕໍ່ກັບນັກກິລາທີມຊາດລາວ ແມ່ນ ໃນເວລາມອບລາງວັນໃຫ້ ຮອງແຊ້ມໂລກ ປະເພດທີມຊຸດຍິງ ໃນການແຂ່ງຂັນກິລາເປຕັງຊີງແຊ້ມ ໂລກຄັ້ງທີ 17 ທີ່ປະເທດ ກຳປູເຈຍ ໃນວັນທີ 23 ພະຈິກ 2019, ທີມຊາດລາວດັ່ງກ່າວມີທັງໝົດ 4 ຄົນ ແລະ ບັນດາຄູຝຶກ ໄດ້ຢືນລໍການຮັບລາງວັນທີ່ ແທ່ນອັບດັບສອງ ພ້ອມກັບທີມຊາດໄທ ທີ່ໄດ້ແຊ້ມໂລກ ແລະ ທີມເຈົ້າພາບທີ່ໄດ້ອັນດັບສາມ ຂອງການແຂ່ງຂັນດັ່ງກ່າວ. ທ່ານປະທານເປຕັງນານາຊາດ Claude Azema ຊຶ່ງເປັນຄົນສັນຊາດຝຣັ່ງ ໄດ້ໃຫ້ກຽດຂຶ້ນມາມອບຫຼຽນເງິນໃຫ້ແລ້ວ, ຈາກນັ້ນ ເພິ່ນກໍ່ໄດ້ມອບຂັນ ສາມໜ່ວຍໃຫ້ກັບມືຂອງນັກກິລາຍິງຄົນອື່ນ ແຕ່ເມື່ອມາຮອດ ນາງ ໂບວິລັກ ເທພະກັນ ນັກກິລາເປຕັງຍິງທີມຊາດລາວຜູ້ສຸດທ້າຍ ທ່ານ Azema ຊໍ້າພັດວາງຂັນຂອງ ໄວ້ຢູ່ເທິງພື້ນແທ່ນດັ່ງກ່າວ ເຮັດໃຫ້ມີຫາງສຽງວິພາກວິຈານຫຼາຍໃນສື່ສັງຄົມອອນລາຍ.

ນາງ ໂບວິລັກ ກ່າວໃນຕອນເຊົ້້າມື້ນີ້ 27 ພະຈິກ 2019 ວ່າ : ເຫດການດັ່ງກ່າວເຮັດໃຫ້ນ້ອງຊຶງໄປໜ້ອຍໜຶ່ງ ແລະ ກໍ່ແປກໃຈຫຼາຍວ່າ ເພິ່ນຄືເຮັດຈັ່ງຊັ້ນ. “ນ້ອງເອງກໍ່ເສຍໃຈທີ່ພົບເຫດການເຊັ່ນນັ້ນ, ແຕ່ນ້ອງກໍ່ບໍ່ໄດ້ໃສ່ໃຈຫຍັງກັບພຶດຕິກຳຂອງ ທ່ານປະທານເປຕັງນານາຊາດ ຄົນນີ້. ເວລາທີ່ເພິ່ນວາງລົງແທ່ນແລ້ວ ເພິ່ນກໍ່ເວົ້າໜ້ອຍໜຶ່ງແຕ່ນ້ອງບໍ່ເຂົ້າໃຈພາສາຂອງເພິ່ນວ່າເວົ້າຢອກຫຼືເວົ້າຫຍັງ. ເຖິງແມ່ນວ່າ ນາງ ໂບວິລັກ ຈະບໍ່ໄດ້ໃສ່ໃຈກັບເຫດການທີ່ເກີດຂຶ້ນ, ແຕ່ເຊື່ອວ່າພາບວີດີໂອຄລິບທີ່ອອກມາຜ່ານສື່ສັງຄົມອອນລາຍນັ້ນ ເຮັດໃຫ້ມີສຽງວິພາກວິຈານຈາກຄົນລາວຫຼາຍຄົນ ເຖິງເລື່ອງສັກສີຂອງຊາດລາວ ບໍ່ແມ່ນຈະໃຫ້ຄົນອື່ນມາດູຖູກດູໝີ່ນປະໝາດໄດ້.

ຄະນະນັກກິລາເປຕັງທີມຊາດລາວໄດ້ເຂົ້າຮ່ວມການແຂ່ງຂັນກິລາເປຕັງຊີງແຊ້ມ ໂລກ ຄັ້ງທີ 17 ທີ່ປະເທດ ກຳປູເຈຍ ໃນວັນທີ 17-24 ພະຈິກ 2019 ແລະ ສ້າງຜົນງານໄດ້ເກີນຄາດໝາຍຄື ໄດ້ຮັບລາງວັນຮອງແຊ້ມໂລກ ອັນດັບ 2 ປະເພດ ທີມຊຸດຕີຍິງ, ຮອງແຊ້ມໂລກ ອັນດັບ 2 ປະເພດ ທີມຊຸດເຍົາວະຊົນ ແລະ ຮອງແຊ້ມ ໂລກ ອັນດັບ 2 ປະເພດທີມຊຸດຍິງ.

ພາບ: ສະຫະພັນເປຕັງແຫ່ງຊາດລາວ

ທີ່ມາ: ວຽງຈັນທາຍ