ເປີດນໍາໃຊ້ແລ້ວ! ເຂື່ອນໄຟຟ້າ ນໍ້າລົ້ນ ນໍ້າຜາໃຫຍ່

522

ພິທີສະເຫລີມສະຫລອງຜົນສຳເລັດໂຄງການກໍ່ສ້າງເຂື່ອນໄຟຟ້ານ້ຳລົ້ນ ນ້ຳຜາໃຫຍ່ 14.8 MW ແລະ ພາກຂະຫຍາຍ 4.4 MW ທີ່ບ້ານຜານ້ອຍ ເມືອງລ້ອງແຈ້ງ, ແຂວງໄຊສົມບູນ ໄດ້ຈັດຂື້ນ ໃນວັນທີ 22 ພະຈິກ 2019 ໂດຍການເຂົ້າຮ່ວມ ຂອງ ທ່ານ ຈັນສີ ໂພສີຄຳ, ກຳມະການກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ, ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ແລະ ພາກສ່ວນກ່ຽວຂ້ອງເຂົ້າຮ່ວມ

ທ່ານ ໄຊຍະສິງ ຊະນະແກ້ວ, ປະທານກຸ່ມບໍລິສັດ DSK (ດີເອສເຄ) ໄດ້ຂື້ນລາຍງານໂດຍຫຍໍ້ ກ່ຽວກັບຄວາມເປັນມາຂອງໂຄງການ ເຊິ່ງໄດ້ດຳເນີນການກໍ່ສ້າງໂຄງການເຂື່ອນໄຟຟ້ານ້ຳລົ້ນ ນ້ຳຜາໃຫຍ່, ທີ່ຕັ້ງຢູ່ບ້ານຜານ້ອຍ, ເມືອງລ້ອງແຈ້ງ, ແຂວງໄຊສົມບູນ. ເລີ່ມແຕ່ເດືອນຕຸລາ 2014 ແລະ ມາຮອດເດືອນ ກັນຍາ 2019 ໄດ້ສຳເລັດ 100% ເຊິ່ງເປັນເຂື່ອນເບຕົງ, ສູງ 65 m, ມີຄວາມຍາວ 160 m, ປະກອບດ້ວຍເຄື່ອງຈັກປັ່ນໄຟຟ້າ 7,4 MW 2 ເຄື່ອງ, ແລະ ມີພາກຂະຫຍາຍ 4,4 MW 1 ໜ່ວຍ, ມີກຳລັງຕິດຕັ້ງ 19, 2 MW. ສາມາດຜະລິດພະລັງງານໄຟຟ້າໄດ້ທັງໝົດ 167 ກິກະວັດໂມງ ຕໍ່ປີ ເພື່ອສົ່ງຂາຍເຂົ້າລະບົບ 115 kv (ກິໂລວັດ) ໄປເຖິງສະຖານີທົ່ງຄູນ 2 ໃຫ້ແກ່ລັດວິສາຫະກິດໄຟຟ້າລາວ ລວມມີມູນຄ່າການກໍ່ສ້າງທັງໝົດ 68 ລ້ານໂດລາສະຫະລັດ.

ເປັນໂຄງການທີ່ບໍ່ມີຜົນກະທົບຕໍ່ສິ່ງແວດລ້ອມ ແລະ ປະຊາຊົນ, ເປັນໂຄງການທີ່ໄດ້ນຳໃຊ້ມາດຕະຖານເຕັກນິກສາກົນ ໂດຍມີທີ່ປຶກສາຈາກປະເທດອົດສະຕາລີ ເປັນຜູ່ຊີ້ນຳຄວບຄຸມໂຄງການກໍ່ສ້າງ ຈົນສຳເລັດ. ເຊິ່ງເຂື່ອນໄຟຟ້ານ້ຳລົ້ນນີ້ ຈະໄດ້ປະກອບສ່ວນຢ່າງຫລວງຫລາຍ ໃຫ້ແກ່ການພັດທະນາເສດຖະກິດສັງຄົມ ຂອງເມືອງລ້ອງແຈ້ງ ກໍ່ຄືແຂວງໄຊສົມບູນ ໃຫ້ນັບມື້-ນັບຂະຫຍາຍຕົວ ດີຂື້ນເລື່ອຍໆ.

ຈາກນັ້ນ ປະທານບໍລິສັດໄດ້ ມອບທືນຊ່ວຍເຫຼືອກໍ່ສ້າງໂຮງຮຽນປະຖົມສົມບູນ, ບ້ານນາໂພ, ເມືອງລ້ອງຊານ, ແຂວງໄຊສົມບູນ ຈຳນວນ 300 ລ້ານກີບ ໂອກາດດັ່ງກ່າວນີ້ ທ່ານຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະປະທານ ໄດ້ພ້ອມກັນຂື້ນຕັດແຖບຜ້າ, ລັ່ນຄ້ອງ 9 ບາດ ແລະ ປ່ອຍປຸມເປົ້າ ເປີດນຳໃຊ້ ເຂື່ອນໄຟຟ້ານ້ຳລົ້ນ ນ້ຳຜາໃຫຍ່ ຢ່າງເປັນທາງການ.

ທີ່ມາ: ໜັງສືພິມເສດຖະກິດການຄ້າ