ຮ່ວມມືຄົ້ນຄວ້າພື້ນຖານໂຄງລ່າງຂໍ້ມູນກາງຫາວພູມສາດ

327

ກົມແຜນການ ແລະ ຮ່ວມມື, ກະຊວງວິທະຍາສາດ ແລະ ເຕັກໂນໂລຊີ (ກວຕ) ຮ່ວມກັບມະຫາວິທະຍາ ໄລວິສະວະກຳ ແລະ ເຕັກໂນໂລຊີ, ມະຫາວິທະຍາໄລແຫ່ງຊາດ, ສສ ຫວຽດນາມ ໄດ້ຈັດພິທີເຊັນບົດບັນ ທຶກຄວາມເຂົ້າໃຈວ່າດ້ວຍການຮ່ວມມືດ້ານການຄົ້ນຄວ້າພັດທະນາພື້ນຖານໂຄງລ່າງຂໍ້ມູນກາງຫາວພູມສາດ ໃນຕອນແລງວັນທີ 15 ພະຈິກ 2019 ຢູ່ ກວຕ. ຈຸດປະສົງຂອງບົດບັນທຶກດັ່ງກ່າວ ແມ່ນເພື່ອສົ່ງເສີມໂຄງການຮ່ວມມືຄົ້ນຄວ້າ ໃນຂະແໜງການຄົ້ນຄວ້າ ແລະ ພື້ນຖານໂຄງລ່າງຂໍ້ມູນກາງຫາພູມສາດ (SDI-Spatila Data Infrastructure).

 

ຜູ້ລົງນາມໃນບົດບັນທຶກດັ່ງກ່າວ ມີທ່ານ ປອ. ຄຳເພັດ ວົງດາລາ, ຫົວໜ້າກົມແຜນການ ແລະ ຮ່ວມມື ແລະ ທ່ານ ສຈ. ປອ. ຫງຽນຫວຽດຮ່າ, ຜູ້ອຳນວຍການມະຫາວິທະຍາໄລວິສະວະກຳ ແລະ ເຕັກໂນໂລຊີ, ມະຫາວິທະຍາໄລແຫ່ງຊາດ ຮ່າໂນ້ຍ. ພິທີລົງນາມຄັ້ງນີ້ ໄດ້ຮັບກຽດການເຂົ້າຮ່ວມເປັນປະທານຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກວຕ. ທ່ານ ສັນຍາ ປຣະເສິດ, ຮອງປະທານກຳມະທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ບັນດາທ່ານ ຮອງ ລັດຖະມົນຕີ, ຫົວໜ້າຫ້ອງການ, ກົມ, ສະຖາບັນ, ແຂກຈາກພາກສ່ວນຕ່າງໆ ແລະ ພະນັກງານວິຊາການທັງສອງຝ່າຍ ເຂົ້າຮ່ວມເປັນສັກຂີພິຍານ.

ທ່ານ ຫົວໜ້າກົມແຜນການ ແລະ ຮ່ວມມື ກ່າວວ່າ: ການພັດທະນາເສດຖະກິດ-ສັງຄົມ ປັດຈຸ ບັນ ມີຄວາມຈຳເປັນຕ້ອງໄດ້ນຳໃຊ້ວິທະຍາສາດ ແລະ ເຕັກໂນໂລຊີ ໃນການພັດທະນາຂອງທຸກຂະແໜງການ, ດັ່ງນັ້ນ ຈຶ່ງຮຽກຮ້ອງໃຫ້ມີການຍົກລະດັບດ້ານຄວາມຮູ້ຄວາມສາມາດ ແລະ ພັດທະນາຊັບພະຍາ ກອນມະນຸດເພື່ອຊຸກຍູ້ເຂົ້າໃນການຄົ້ນຄວ້າຂົງເຂດວຽກງານວິທະຍາສາດ ແລະ ເຕັກໂນໂລຊີ. ວຽກງານວິທະຍາສາດ ແລະ ເຕັກໂນໂລຊີ ນັບມື້ນັບພັດທະນາຢ່າງກ້າວໄກ ໂດຍສະເພາະວຽກງານການພັດທະນາດ້ານພື້ນຖານໂຄງລ່າງຂໍ້ມູນກາງຫາວພູມສາດ ມີຄວາມສຳຄັນໃນການພັດທະນາ ແລະ ບໍລິຫານຂໍ້ມູນໃຫ້ໄດ້ຮັບປະສິດທິພາບສູງສຸດເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ກໍຄືການພັດທະນາສ້າງຖາມຂໍ້ມູນກາງຫາວພູມສາດ ຂອງ ສປປ ລາວ ໃຫ້ເປັນລະບົບໂດຍນຳໃຊ້ເຕັກໂນໂລຊີທີ່ທັນສະໄໝເພື່ອສະດວກໃນການເຂົ້າເຖິງ.

ນອກຈາກນັ້ນ ຍັງຊ່ວຍສ້າງຄວາມເຂັ້ມແຂງດ້ານວິຊາການ ໃຫ້ແກ່ພະນັກງານ ກວຕ, ສປປ ລາວ ແລະ ຍັງເປັນການສົ່ງເສີມວຽກງານຮ່ວມມືດ້ານວິທະຍາສາດ ແລະ ເຕັກໂນໂລຊີ ຂອງສອງປະເທດ ລາວ-ຫວຽດນາມ ໃຫ້ນັບມື້ແໜ້ນແຟ້ນ ແລະ ພັດທະນາຂຶ້ນໄປເລື້ອຍໆ.

ທ່ານ ຜູ້ອຳນວຍການມະຫາວິທະຍາໄລວິສະວະກຳ ແລະ ເຕັກໂນໂລຊີ, ມະຫາວິທະຍາໄລແຫ່ງຊາດ ຮ່າໂນ້ຍ ໄດ້ກ່າວສະແດງຄວາມຂອບໃຈມາຍັງ ທ່ານລັດຖະມົນຕີ, ຮອງລັດຖະມົນຕີ, ບັນດາການນຳ, ພະນັກງານຂອງ ກວຕ ທີ່ໄດ້ຈັດພິທີອັນສະຫງ່າລາສີນີ້ ເພື່ອເປັນຂີດໝາຍການເລີ່ມຕົ້ນທີ່ດີລະຫວ່າງ ກວຕ ແລະ ມະຫາວິທະຍາໄລວິສະວະກຳ ແລະ ເຕັກໂນໂລຊີ – ມະຫາວິທະຍາໄລແຫ່ງຊາດ ຮ່າໂນ້ຍ ໃນດ້ານການຄົ້ນຄວ້າ ແລະ ພັດທະນາພື້ນຖານໂຄງລ່າງຂໍ້ມູນກາງຫາວພູມສາດ ສຳລັບ ສປປ ລາວ.

ທ່ານ ກ່າວຕື່ມວ່າ ປັດຈຸບັນນີ້, ພື້ນຖານໂຄງລ່າງດ້ານຂໍ້ມູນກາງຫາວພູມສາດ ໄດ້ຖືກ ປຽບທຽບເປັນຄື “ກະດູກສັນຫຼັງ” ຂອງເອເລັກໂຕຼນິກ, ແມ່ນໂຄງສ້າງພື້ນຖານແລະ ເປັນພື້ນຖານໂຄງລ່າງສໍາຄັນ ຊຶ່ງໃຫ້ການບໍລິການເອເລັກໂຕຼນິກໄດ້ຖືກພັດທະນາ ແລະ ໃຫ້ບໍລິການແກ່ປະຊາຊົນ, ນັກທຸລະກິດ ແລະ ອົງການຈັດຕັ້ງທັງພາຍໃນ ແລະ ຕ່າງປະເທດ. ພື້ນຖານໂຄງລ່າງຂໍ້ມູນທາງພູມສາດໄດ້ຮັບການພັດທະນາຢ່າງແຂງແຮງ ແລະ ວ່ອງໄວຢູ່ຫລາຍພາກສ່ວນຂອງໂລກ, ຈາກປະເທດທີ່ພັດທະນາຈົນເຖິງປະເທດທີ່ກຳລັງພັດທະນາ.

ຂ່າວ ແລະ ຮູບພາບ: ກະຊວງ ກວຕ