ເມືອງໄຊສະຖານ ມີດິນແຕກຍະ-ເຈື່ອນ 15 ຈຸດຈາກແຜ່ນດິນໄຫວ, ເສຍຫາຍເກືອບ 1 ຕື້

405

ຜົນກະທົບເບື້ອງຕົ້ນຈາກເຫດການແຜ່ນດິນໄຫວໃນຄັ້ງ ວັນທີ 21 ພະຈິກ 2019 ທີ່ແຂວງໄຊຍະບູລີ. ທີ່ມີຄວາມແຮງສັ່ນສະເທືອນເຖິງ 6,4 ຣິກເຕີ ຈຸດສູນກາງຢູ່ເມືອງຫົງສາ ແຂວງໄຊຍະບູລີ, ຮູ້ສຶກແຮງສັ່ນສະເທືອນຢູ່ບັນດາແຂວງພາກເໜືອຂອງລາວລົງໄປຮອດນະຄອນຫຼວງວຽງຈັນ.

ຕາມການລາຍງານຈາກນັກຂ່າວຂອງເມືອງໃນວັນທີ 22 ພະຈິກ 2019 ສໍາລັບຢູ່ເມືອງຫົງສາ ແຂວງໄຊຍະບູລີ ຕາມການລົງເກັບກຳຂໍ້ມູນເບື້ອງຕົ້ນ ຂອງຄະນະຮັບຜິດຊອບປ້ອງກັນ ແລະ ຄວບຄຸມໄພພິບັດຂັ້ນເມືອງ ໄດ້ປະເມີນຜົນເສຍຫາຍເບື້ອງຕົ້ນຕໍ່ເຫດການແຜ່ນດິນໄຫວຢູ່ເຂດເມືອງຫົງສາໃນຄັ້ງນີ້ ມີຈຳນວນ 14 ບ້ານໄດ້ຮັບຜົນເສຍຫາຍ, ມີ 89 ຫຼັງຄາເຮືອນ, ເສຍຫາຍສົມຄວນ ຈຳນວນ 4 ຫຼັງຄາເຮືອນ, ປະຊາຊົນໄດ້ຮັບບາດເຈັບເລັກນ້ອຍ 7 ຄົນ, ຍິງ 5 ຄົນ, ນອກນັ້ນຍັງມີວັດ ຈຳນວນ 5 ແຫ່ງ, ໂຮງຮຽນ 3 ແຫ່ງ, ອາຄານຫ້ອງການຂອງລັດ, ຮ້ານບັນເທີງ, ຮ້ານຂາຍເຄື່ອງ, ຕະຫຼາດ ແລະ ໂຮງໝໍຈຳນວນໜຶ່ງ, ປະເມີນຄວາມເສຍຫາຍເບື້ອງເກືອບ 100 ລ້ານກີບ.

ສ່ວນຢູ່ເມືອງໄຊສະຖານ ມີຈໍານວນ 18 ບ້ານ, ມີ 169 ຄອບຄົວ,ສໍານັກງານອົງການຂອງລັດຈໍານວນ 8 ຫຼັງ, ມີຄົນໄດ້ຮັບບາດເຈັບເລັກນ້ອຍ 3 ຄົນ, ລະບົບໄຟຟ້າມີການເປ່ເພ ເສັ້ນທາງຄົມມະນາຄົມ ແລະ ພື້ນດິນຫຼາຍຈຸດມີການແຕກຍະ ແລະ ເຈື່ອນ 15 ຈຸດ ລວມມູນເສຍທັງໝົດ 976.135.000 ກີບ, ຕໍ່ສະພາບການດັ່ງທາງອໍານາດການປົກຄອງ ຂອງແຂວງ ແລະ ເມືອງກໍ່ພວມເລັງເອົາໃຈໃສ່ຊ່ວຍເຫຼືອປະຊາຊົນທີ່ໄດ້ຮັບຜົນກະທົບ ແລະ ສ້ອມແປງເສັ້ນທາງຈຸດທີ່ເຈື່ອນໃຫ້ທ່ຽວໄດ້ສະດວກໃນເບື້ອງຕົ້ນ.

ທີ່ມາ: Media Laos