ເປີດໂອກາດຫາຄູ່ຮ່ວມການຄ້າລາວ-ຈີນ ໃນງານວາງສະແດງສິນຄ້າທີ່ໄອເຕັກລະະຫວ່າງ 25 – 28 ພະຈິກນີ້

408

ງານວາງສະແດງສິນຄ້າເສດຖະກິດເຕັກນິກການຮ່ວມມືແມ່ນໍ້າຂອງ – ແມ່ນໍ້າລ້ານຊ້າງ ຈະຈັດຂຶ້ນລະຫວ່າງ 25 – 28 ພະຈິກ ທີ່ສູນການຄ້າ ລາວ – ໄອເຕັກ ( ຕຶກເກົ່າ ) ນະຄອນຫຼວງວຽງຈັນ ຄາດຄະເນຈະມີພາກທຸລະກິດເຂົ້າຮ່ວມວາງສະແດງທັງໝົດ 40 ກວ່າຫົວໜ່ວຍ. ງານດັ່ງກ່າວຈະເປີດໂອກາດໃຫ້ພາກທຸລະກິດຂອງສອງປະເທດ ລາວ – ຈີນ ສືບຕໍ່ໄດ້ແລກປ່ຽນຂໍ້ມູນ – ຂ່າວສານເພື່ອຊຸກຍູ້ດ້ານການຄ້າ, ການເຊື່ອມໂຍງການຮ່ວມມືໃນປັດຈຸບັນ ແລະ ສຶກສາຄວາມເປັນໄປໄດ້ໃນການລົງທຶນຮ່ວມກັນໃນອະນາຄົດ.

ວັນທີ 21 ພະຈິກ 2019 ໄດ້ມີພິທີຖະແຫຼງຂ່າວ ໂດຍການເຂົ້າຮ່ວມຂອງ ທ່ານ ໄຊສົມເພັດ ນໍຣະສິງຫ໌ ຫົວໜ້າກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ ( ອຄ ), ທ່ານ ຫຼິວ ປິ່ນ ຫົວໜ້າພະແນກວາງສະແດງສະພາການຄ້າສາກົນ ສປ ຈີນ, ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ມີບັນດາຫົວໜ່ວຍທຸລະກິດ, ພາກສ່ວນກ່ຽວຂ້ອງ ພ້ອມດ້ວຍສື່ມວນຊົນເຂົ້າຮ່ວມ.

ທ່ານ ໄຊສົມເພັດ ນໍຣະສິງຫ໌ ກ່າວວ່າ: ງານວາງສະແດງສິນຄ້າເສດຖະກິດເຕັກນິກການຮ່ວມມືແມ່ນໍ້າຂອງ – ແມ່ນໍ້າລ້ານຊ້າງ ຈັດຂຶ້ນເປັນຄັ້ງທໍາອິດໃນລາວ ທີ່ມີການຮ່ວມມືຂອງ 4 ພາກສ່ວນ ຄື: ກົມສົ່ງເສີມການຄ້າ ກະຊວງ ອຄ, ສະພາສົ່ງເສີມການຄ້າສາກົນ ສປ ຈີນ ( CCPIT ), ສະການຄ້າ ແລະ ອຸດສາຫະກໍາແຫ່ງຊາດລາວ ແລະ ສະພາການຄ້າຈີນ ສາກົນຈີນ ( CCOIC ) ເຊິ່ງເປົ້າໝາຍຫຼັກຂອງການຈັດງານວາງສະແດງສິນຄ້າໃນຄັ້ງນີ້ ກໍເພື່ອເສີມສ້າງສາຍພົວພັນການຮ່ວມມືດ້ານເສດຖະກິດຂອງສອງປະເທດ ໂດຍສະເພາະກໍເພື່ອສົ່ງເສີມການຄ້າໃຫ້ຂະຫຍາຍຕົວຢ່າງຕໍ່ເນື່ອງ, ເປີດໂອກາດໃຫ້ພາກທຸລະກິດຂອງສອງປະເທດ ລາວ – ຈີນ ສືບຕໍ່ໄດ້ແລກປ່ຽນຂໍ້ ມູນ – ຂ່າວສານ ເພື່ອຊຸກຍູ້ດ້ານການຄ້າ, ການເຊື່ອມໂຍງການຮ່ວມມືໃນປັດຈຸບັນ ແລະ ສຶກສາຄວາມເປັນໄປໄດ້ໃນການລົງທຶນຮ່ວມກັນໃນອະນາຄົດ.

ທ່ານ ນາງ ຈັນທະຈອນ ວົງໄຊ ໃຫ້ຮູ້ຕື່ມວ່າ: ນອກຈາກການວາງສະແດງສິນຄ້າ ແລະ ຜົນງານຂອງຫົວໜ່ວຍທຸລະກິດແລ້ວ, ພາຍໃນງານຍັງຈະມີການຈັດກອງປະຊຸມພົບປະທຸລະກິດ ລາວ – ຈີນ ເພື່ອສ້າງເວທີປຶກສາຫາລືໃຫ້ແກ່ນັກທຸລະກິດທັງ 2 ຝ່າຍ ໃຫ້ໄດ້ມີໂອກາດພົບ ພ້ອມສ້າງເຄືອຂ່າຍ ແລະ ປຶກສາຫາລືຫາຊ່ອງທາງຮ່ວມມືດ້ານການຄ້າ ແລະ ການລົງທຶນຮ່ວມກັນ.

ຂໍ້ມູນຈາກ: ໜັງສືພິມເສດຖະກິດ ການຄ້າ