ແລກປ່ຽນບົດຮຽນ ການສ້າງຄວາມເຂັ້ມແຂງໃຫ້ ສະຫະກອນກະເຟ

521

ກອງປະຊຸມແລກປ່ຽນບົດຮຽນກ່ຽວກັບ “ການສ້າງຄວາມເຂັ້ມແຂງໃຫ້ກັບສະຫະກອນກາເຟ ໃນດ້ານການຄຸ້ມຄອງຕ່ອງໂສ້ມູນຄ່າ ແລະ ການຢັ້ງຢືນຖິ່ນກໍາເນີດຂອງສິນຄ້າ” ຈັດຂຶ້ນໃນວັນທີ 11 ພະຈິກ 2019 ຢູ່ທີ່ໂຮງແຮມຈໍາປາສັກ ແກຣນ ນະຄອນປາກເຊ ແຂວງຈໍາປາສັກ ສປປ ລາວ ໃຫ້ກຽດເຂົ້າຮ່ວມຂອງທ່ານ ກອງແກ້ວ ວົງປະເສີດ ຫົວໜ້າກົມພັດທະນາຊົນນະບົດ ແລະ ສະຫະກອນ ກະຊວງກະສິກໍາ-ປ່າໄມ້, ທ່ານ ຟິກເຕີ ຫົວໜ້າຈຸດປະສານງານສະຫະກອນອາຊຽນ, ມີຕາງໜ້າອົງການຈັດຕັ້ງສາກົນພາຍໃນ ແລະ ຕ່າງປະເທດ, ຄູ່ຮ່ວມພັດທະນາສະຫະກອນກາເຟ, ຕາງໜ້າສະຫະກອນຜູ້ຜະລິດກາເຟອາຊຽນ, ບັນດາປະເທດອາຊຽນ ເຊັ່ນ: ອິນໂດເນເຊຍ, ມາເລເຊຍ, ຟິລິບປິນ, ມຽນມາ, ໄທ, ກໍາປູເຈຍ, ຫວຽດນາມ, ລາວ ເຂົ້າຮ່ວມ.

ທ່ານ ກອງແກ້ວ ວົງປະເສີດ ໃຫ້ຮູ້ວ່າ: ກອງປະຊຸມຄັ້ງນີ້ບັນດາປະເທດອາຊຽນໄດ້ນໍາເອົາບົດຮຽນ ປະສົບການ, ສິ່ງທ້າທາຍຕ່າງໆມາແລກປ່ຽນເຊິ່ງກັນ ແລະ ກັນ ເພື່ອສະໜັບສະໜູນການສ້າງແຜນດໍາເນີນ ງານຮ່ວມກັນຂອງສະຫະກອນກະສິກໍາອາຊຽນໃຫ້ມີຄວາມເຂັ້ມແຂງ ແລະ ເຂົ້າເຖິງຕະຫຼາດ, ປັດຈຸບັນ ສປປ ລາວ ມີສະຫະກອນທັງໝົດ 49 ສະຫະກອນ,

ໃນນັ້ນສະຫະກອນກະສິກໍາ 22 ສະຫະກອນ, ສະຫະກອນສິນເຊື່ອ 27 ສະຫະກອນ, ພ້ອມນີ້ກອງປະຊຸມຍັງມີຄວາມໝາຍຄວາມສໍາຄັນສໍາລັບສະມາຊິກສະຫະກອນ, ຜູ້ປະກອບການ ສະເພາະແມ່ນຊາວສວນກາເຟ ຈະໄດ້ນໍາເອົາບົດຮຽນທີ່ດີຂອງແຕ່ລະປະເທດມາຜັນຂະຫຍາຍເຂົ້າໃນການຈັດຕັ້ງປະຕິບັດຕົວຈິງໃຫ້ເກີດປະໂຫຍດສູງສຸດ.

ຫົວຂໍ້ທີ່ນໍາມາສະເໜີແລກປ່ຽນໃນກອງປະຊຸມມີຄື: ການແລກປ່ຽນປະສົບການໃນການພັດທະນາສະຫະກອນ, ມາດຕະຖານກາເຟອາຊຽນ ແລະ ຂໍ້ມູນຂ່າວສານການຕະຫຼາດ, ການຢັ້ງຢືນທີ່ມາຂອງກາເຟ ແລະ ການສົ່ງອອກ, ຄົ້ນຄ້ວາການທົດລອງເຮັດກາໝາຍກາເຟຂອງອາຊຽນ.

ໂອກາດນີ້ຄະນະຜູ້ແທນກອງປະຊຸມຍັງໄດ້ເຄື່ອນໄຫວເບິ່ງໂຮງງານ ແລະ ຫ້ອງທົດລອງສະຫະກອນຜູ້ຜະລິດກາເຟ ເຂດພູພຽງບໍລະເວນ , ຕິດຕາມເບິ່ງການຜະລິດກາເຟຂອງຊາວກະສິກອນຢູ່ເຂດເມືອງປາກຊ່ອງ.

*** ຂ່າວ-ພາບ: ຈັນທະວີສັກ ***