ສານຕັດສິນຈຳຄຸກ ອະດີດພະນັກງານໄປສະນີລາວ 17 ຄົນ

417

ຂປລ.ໃນວັນທີ 3 ຕຸລາ 2019 ສານປະຊາຊົນນະຄອນຫລວງວຽງຈັນ, ໄດ້ພິຈາລະນາຄະດີການສໍ້ລາດບັງຫລວງ ຕໍ່ອະດີດພະນັກງານ ບໍລິສັດ ລັດວິສາຫະກິດໄປສະນີລາວ ຈຳນວນ 17 ຄົນ.

ໃນນັ້ນເປັນຄົນນອກ 3 ຄົນ ໃນຈຳນວນທັງໝົດ 29 ຄົນ, ໃນຂໍ້ຫາສົມຮູ້ຮ່ວມຄິດຍັກຍອກເງິນຂອງບໍລິສັດ ໂດຍຕັດສິນລົງໂທດສູງສຸດຈຳຄຸກຕະຫລອດຊີວິດ 1 ຄົນ

ສ່ວນຜູ້ອື່ນໄລ່ລຽງກັນໄປ 15 ປີ, 09 ປີ, 04 ປີ, 03 ປີ ແລະ 02 ປີ ຕາມສະຖານໜັກ ຫລື ເບົາ. ພ້ອມທັງປັບໄໝ ແລະ ໃຫ້ຊົດໃຊ້ຄ່າເສຍຫາຍຄືນ ໃຫ້ແກ່ບໍລິສັດ ຕາມກົດໝາຍ ວ່າດ້ວຍການສໍ້ລາດບັງຫລວງ ສະບັບປັບປຸງໃໝ່ ປີ 2013, ສ່ວນທີ່ເຫລືອຍັງຢູ່ຂັ້ນຕອນການດຳເນີນຄະດີ ຂອງອົງການໄອຍະການປະຊາຊົນ ຈຳນວນ 12 ຄົນ.

ການລົງໂທດ ຕໍ່ຜູ້ກະທຳຜິດດ້ວຍການສໍ້ລາດບັງຫລວງຄັ້ງນີ້, ແມ່ນປະຕິບັດຕາມໃບແຈ້ງການ ຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 1671/ຫສນຍ, ລົງວັນທີ 23 ກັນຍາ 2019 ແລະ ເຫັນດີຕາມຜົນການກວດກາ ຂອງຄະນະກວດກາສູນກາງ ໂດຍສົມທົບກັບ ກະຊວງໄປສະນີ ໂທລະຄົມມະນາຄົມ ແລະ ການສື່ສານ

ເຊິ່ງໄດ້ຕົກລົງໃຫ້ດຳເນີນຄະດີຕາມກົດໝາຍ ວ່າດ້ວຍການສໍ້ລາດບັງຫລວງ ຕໍ່ອະດີດພະນັກງານ ບໍລິສັດ ລັດວິສາຫະກິດໄປສະນີລາວ ຈຳນວນທັງໝົດ 29 ຄົນ.