ອີທີແອລ ໂສມໜ້າໃຫມ່ ເຄື່ອງໝາຍການຄ້າໃຫມ່, ເຄື່ອຂ່າຍໃຫມ່, ບໍລິການໃຫມ່

373

ບໍລິສັດ ອີທີແອລ ຈຳກັດ, ໄດ້ຈັດງານເປີດໂຕເຄື່ອງໝາຍການຄ້າໃຫມ່, ເຄືອຂ່າຍໃຫມ່່, ບໍລິການໃຫມ່ ແລະ ເປີດໃຫ້ບໍລິການ 4,5G ຢ່າງເປັນທາງການ. ໃນຕອນຄໍ່າວັນທີ 15 ພະຈິກ 2019, ທີ່ ໂຮງແຮມ ແລນມາກ. ພາຍໃຕ້ການເປັນປະທານຂອງ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ໄປສະນີຄົມມະນາຄົມ ແລະ ການສື່ສານ, ໂດຍເປັນກຽດເຂົ້າຮ່ວມມີ ທ່ານ ປອ ທັນສະໄໝ ກົມມະສິດລັດຖະມົນຕີ ກະຊວງ ໄປສະນີຄົມມະນາຄົມ ແລະ ການສື່ສານ, ທ່ານ ຮວງ ສູຢຸນ (Huang SHUYUN) ຜູ້ອຳນວຍການໃຫຍ່ ບໍລິສັດ ອີທີແອລ ຈໍາກັດ ພ້ອມດ້ວຍຄະນະ ແລະ ແຂກຜູ້ມີກຽດຈາກພາກລັດ ແລະ ເອກະຊົນ, ລູກຄ້າ ແລະ ຮ້ານຕົວແທນຈຳໜ່າຍ ຂອງ ອີທີແອລ ເຂົ້າຮ່ວມງານ.

ເຄື່ອຂ່າຍ ອີທີແອລ ເລີ່ມເປີດໃຫ້ບໍລິການແຕ່ປີ 2000 ເປັນຕົ້ນມາ, ໃນປີ 2001 ໄດ້ເປີດໃຫ້ບໍລິການລະບົບ 2G ແລະ ປີ 2009 ອີທີແອລ ເປີດໃຫ້ບໍລິການ 3G ມີການພັດທະນາເປັນ 3,5 G ໃນປີ 2015 ແລະ ມາໃນປີ 2019 ນີ້ ອີທີແອລ ໄດ້ເລີ່ມເປີດໃຫ້ບໍລິການໃນລະບົບ 4,5G ແລ້ວ ຈໍານວນ 1336 ຈຸດ ທົ່ວປະເທດ, ນອກຈາກນີ້ ອີທີແອລ ຍັງມີແຜນທີ່ຈະສືບຕໍ່ຂະຫຍາຍພື້ນທີໃຫ້ ບໍລິການ 4,5G ຕື່ມອີກເພື່ອຕອບສະໜອງຄວາມຮຽກຮ້ອງຕ້ອງການຂອງລູກຄ້າທີ່ເພີ່ມຫຼາຍຂຶ້ນແລະ ກຽມກ້າວເຂົ້າສູ່ 5G ໃນໄວໆນີ້.

ສຳລັບ 3 ສິ່ງໃຫມ່ ໃນອີທີແອລ ປີ 2019 ຮູບໂສມໃຫມ່ ໄດ້ແກ່:

1 ປັບປຸງເຄື່ອງໝາຍການຄ້າໃຫມ່ ຫຼື ໂລໂກ້ໃຫມ່: ການປັບປ່ຽນຮູບແບບເຄື່ອງໝາຍການຄ້າ ຫຼື ໂລໂກ້ໃຫມ່ນີ້ ກໍເພື່ອໃຫ້ແທດເໝາະກັບສະພາບການໃຫ້ບໍລິການໃຫມ່ ໂດຍເນັ້ນໝັກໃສ່ການບໍລິການ ທີ່ຈະເຮັດໃຫ້ ອີທີແອລ ກາຍເປັນສູນກາງຂອງການສື່ສານໂທລະຄົມມະນາຄົມ ແລະ ຕິດຕໍ່ທາງດ້ານທຸລະກິດ ແລະ ມີການບໍລິການດ້ວຍຮອຍຍີ້ມ ແລະ ຈິງໃຈ ເຊິ່ງໂຕ ແອລ ທີ່ເຮັດຂຶ້ນມາໃຫມ່ ປຽບສະເໜືອນພາບຮອຍຍິ້ມແລະ ການບໍລິການທີ່ຈິງໃຈຂອງ ອີທີແອລ

2 ເຄືອຂ່າຍໃຫມ່: ອີທີແອລບໍ່ໄດ້ຢຸດຢັ້ງການພັດທະນາ ແລະ ໃນປີ 2019 ນີ້ ໄດ້ເປີດການບໍລິການເຄື່ອຂ່າຍທາງດ້ານໂທລະສັບມືຖື ບໍ່ວ່າຈະເປັນ 2G 3G 4G ແລະ 4,5G  ເຊິ່ງໃນປັດຈຸບັນນີ້ ເຄື່ອຂ່າຍຂອງ ອີທີແອລ ສາມາດຄວບຄຸມໄດ້ເຖິງ 89 ສ່ວນຮ້ອຍຂອງພື້ນທີ່ທົ່ວປະເທດລາວ. ໂດຍມີສະຖານີໂທລະສັບມືຖື 3.500 ສະຖານີຄວບຄຸມທົ່ວປະເທດ, ເປີດການບໍລິການ IR ຫຼາຍກວ່າ 42 ປະເທດ ຫຼື 65 ເຄື່ອຂ່າຍໃນທົ່ວໂລກ ເຊິ່ງອີທີແອລ ຮູບໂຊມໃຫມ່ນີ້ ຈະໄດ້ດຳເນີນການປະຕິຮູບທາງດ້ານລາຄາໃຫ້ຖືກລົງໃຫ້ທຸກຄົນສາມາດເຂົ້າເຖິງໄດ້ໃນເວລາທີ່ເດີນທາງໄປຕ່າງປະເທດ ດ້ວຍແພັກເກັດພິເສດ.

ການບໍລິການໃຫມ່:  ໄດ້ສ້າງຜະລິດຕະພັນໃຫມ່ ບົນພື້ນຖານຂອງຄຳວ່າ ETL ຄື:

ENHANCE: ຈະເຂົ້າມາຊ່ວຍເສີມສ້າງໃຫ້ທຸລະກິດຂອງທ່ານໃຫ້ເຕີບໃຫຍ່ຂະຫຍາຍຕົວຂຶ້ນຕື່ມອີກຢ່າງບໍ່ຢຸດຢັ້ງ, ສ້າງແພັກເກັດຜະລິດພັນຕ່າງໆເພື່ອຕອບສະໜອງກຸ່ມລູກຄ້າອົງກອນຂະໜາດນ້ອຍ, ກາງ ແລະ ໃຫຍ່ ໄດ້ສ້າງແພັກເກັດຕ່າງໆບໍ່ວ່າຈະເປັນ ແພັກເກັດການໂທ, ແພັກເກັດອິນເຕີເນັດ, ແພັກເກັດທາງດ້ານສາຍເຊົ່າ

TORCH: ເປັນຕົວຊ່ວຍເພື່ອນຳພາທຸລະກິດຂອງທ່ານໄປສູ່ຄວາມປະສົບຜົນສຳເລັດ ເນັ້ນໜັກໃສ່ບັນດາກຸ່ມທຸລະກິດຂອງຄົນລຸ້ນໃໝ່ໄຟແຮງ ເຊິ່ງໃນນີ້ ອີທີແອລ ກຽມພ້ອມແລ້ວ ທີ່ຈະຮ່ວມມືກັບບັນດາທຸລະກິດທີ່ເປັນ Startup ຕ່າງໆ ແລະ ໄດ້ມີແຜນການທີ່ຈະສ້າງບັນດາທຸລະກິດບໍ່ວ່າຈະເປັນເກມທີ່ທັນສະໄໝ, ແອັບພິເຄຊັນຕ່າງໆ ຫຼື ການເຂົ້າເຖິງບັນດkແອັບພິເຄຊັນພິເສດ ການໃຫ້ບໍລິການທາງດ້ານພາບສຽງທີ່ເປັນ Streaming  ທີ່ເຮັດໃຫ້ເຂົ້າເຖິງກຸ່ມບັນດາໄວລຸ້ນ. ນອກຈາກນີ້, ຍັງຈະມີແພັກເກັດການຮ່ວມມືກັບບັນດາໂຮງຮຽນ ແລະ ສະຖານບັນການສຶກສາ ເຊິ່ງເປັນການນຳໃຊ້ລະບົບການສຶກສາອອນໄລ໌ທີ່ທັນສະໄໝ.

LIVELY: ອີທີແອລຈະເຂົ້າມາປ່ຽນແປງຊີວິດຂອງທຸກຄົນໃຫ້ເປັນຊີວິດທີ່ສົດໃສ ສະດວກສະບາຍຍິ່ງຂຶ້ນ ໃຫ້ທຸກຄົນໃນສັງຄົມ ສາມາດເຊື່ອມຕໍ່ສື່ສານທາງອິນເຕີເນັດ ໂດຍບໍ່ມີຂີດຈຳກັດ  ເຊິ່ງຈະສ້າງສີສັນໃຫມ່ ຊີວິດໃຫມ່. ນອກຈາກນີ້, ກໍຍັງຈະໄດ້ກຽມພັດທະນາຮູບແບບ Smart Home, Smart Office ແລະ ກ້າວໄປສູ່ການຂະຫຍາຍຕົວເຮັດໃຫ້ສັງຄົມລາວເປັນສັງຄົມ Smart ຫຼາຍຂຶ້ນ;

ໂສມໜ້າໃຫມ່ ຂອງການບໍລິການ ອີທີແອລ 4,5G ພ້ອມແລ້ວທີ່ຈະເປີດປະສົບການໃຫມ່, ຜະລິດຕະພັນໃຫມ່ ແລະ ບໍລິການໃຫມ່ ແລະ ແນ່ນອນວ່າ  ອີທີແອລ  ຈະບໍ່ຢຸດຢັ້ງໃນການພັດທະນາທາງດ້ານການສື່ສານ ເພື່ອຕອບສະໜອງການຊົມໃຊ້ທີ່ປ່ຽນແປງໄປເລື່ອຍໆ ແລະ ກ້າວໄປສູ່ຍຸກຂອງ 5G ໃນອະນາຄົດອັນໃກ້ໆນີ້.

ທີ່ມາ: ວາລະສານ ທາເກັດ