ຊົມເຊີຍ! ເມືອງຫົງສາ ຮັກສາໄດ້ການເຕີບໂຕຂອງເສດຖະກິດໃນລະດັບ 11,3% ຕໍ່ປີ

601

ກອງປະຊຸມໃຫຍ່ຄັ້ງທີ VIII ຜູ້ແທນອົງຄະນະບໍລິຫານງານພັກເມືອງຫົງສາ, ແຂວງໄຊຍະບູລີ ໄດ້ໄຂຂຶ້ນຢ່າງເປັນທາງການ ໃນວັນທີ 14 ພະຈິກ 2019 ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານຂອງ ທ່ານ ຄຳຫຼ້າ ຜິວວັນນາ ວ່າການເລຂາພັກເມືອງ ວ່າການເຈົ້າເມືອງໆຫົງສາ, ເປັນກຽດເຂົ້າຮ່ວມມີ ທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ, ມີຄະນະປະຈຳພັກແຂວງ, ກຳມະການພັກແຂວງ, ມີຄະນະປະຈຳພັກເມືອງ, ກຳມະການພັກເມືອງ, ມີຕ່າງໜ້າສະມາຊິກສະພາປະຊາຊົນແຂວງ ປະຈຳເມືອງຫົງສາ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງ ເຂົ້າຮ່ວມ.

ທ່ານ ຄຳຫຼ້າ ຜິວວັນນາ ກ່າວໄຂກອງປະຊຸມ ແລະ ພ້ອມທັງຜ່ານຮ່າງລາຍງານການເມືອງທັງສອງພາກ, ໂດຍພາຍໃຕ້ການຊີ້ນໍາ-ນຳພາຂອງອົງຄະນະພັກເມືອງ ແລະ ການໃກ້ຊິດຕິດແທດຂອງການນຳແຂວງ. ທົ່ວເມືອງຫົງສາ ສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ການພັດທະນາເສດຖະກິດ-ສັງຄົມ ໄດ້ເອົາໃຈໃສ່ປະຕິບັດຢ່າງຕັ້ງໜ້າ, ພື້ນຖານໂຄງລ່າງ ໄດ້ຮັບການເອົາໃຈໃສ່ ແລະ ສາມາດສືບຕໍ່ຮັກສາຈັ່ງຫວະເຕີບໂຕເສດຖະກິດຂະຫຍາຍຕົວໃນລະດັບ 11,3%, ຕໍ່ປີ, ລວມຍອດລາຍໄດ້ຜົນຜະລິດພາຍໃນເມືອງ ທັງໝົດ 644,32 ຕື້ກີບ, ສະເລ່ຍລາຍຮັບໃສ່ຫົວຄົນໜຶ່ງໄດ້ 21,96 ລ້ານກີບ ຫຼື ເທົ່າກັບ 2.745 ໂດລາສະຫະລັດ (ທຽບໃສ່ຄາດໝາຍຍັງບໍ່ບັນລຸ 255 ໂດລາຕໍ່ຄົນຕໍ່ປີ, ທຽບໃສ່ປີ 2014 ເພີ່ມຂຶ້ນ 1,142 ໂດລາສະຫະລັດ). ກອງປະຊຸມຄັ້ງນີ້, ຜູ້ແທນຈະໄດ້ພ້ອມກັນຄົ້ນຄ້ວາ, ປະກອບຄໍາເຫັນໃສ່ຮ່າງບົດລາຍງານການເມືອງ, ຮ່າງແຜນພັດທະນາເສດຖະກິດ – ສັງຄົມ 5 ປີ (2020-2024), ທິດທາງລວມ ແລະ ຄາດໝາຍສູ້ຊົນຕົ້ນຕໍ, ວຽກງານຈຸດສຸມແຕ່ລະດ້ານ ແລະ ບົດສໍາຫຼວດການນໍາພາລວມຂອງຄະນະບໍລິຫານງານພັກເມືອງ ຊຸດທີ VII, ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາຍເຫດ ແລະ ບົດຮຽນໃນການຊີ້ນໍາ-ນໍາພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII.

ພ້ອມນີ້, ກອງປະຊຸມຍັງຈະໄດ້ເປັນເອກະສັນປະຊາມັດຕິຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະກິດ – ສັງຄົມ 5 ປີ (2020-2024). ທີ່ສຳຄັນ ກອງປະຊຸມຈະໄດ້ມີການປ່ອນບັດຄັດເລືອກເອົາຄະນະບໍລິຫານງານພັກເມືອງຫົງສາ ຊຸດທີ VIII ແລະ ປ່ອນບັດຄັດເລືອກຕັ້ງເອົາຜູ່ແທນສົມບູນ-ສຳຮອງໄປຮ່ວມກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ແລະ ເປີດກອງປະຊຸມຄັ້ງປະຖົມມະລຶກ ເພື່ອຈະປ່ອນບັດຄັດເລືອກເອົາຄະນະປະຈຳພັກເມືອງ, ເລຂາ-ຮອງເລຂາພັກເມືອງ, ປະທານ-ຮອງປະທານກວດກາພັກຊຸດໃໝ່ຕື່ມອີກ.

ກອງປະຊຸມໃຫຍ່ຜູ້ແທນອົງຄະນະພັກເມືອງຫົງສາ ຄັ້ງທີ VIII ຍັງຈະໄດ້ຮັບຟັງການມີຄຳຄິດເຫັົນໂອ້ລົມຈາກ ທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ ແລະ ກອງປະຊຸມຈະໄດ້ດຳເນີນເປັນເວລາ 2 ວັນຄື: 14-15 ພະຈິກ ຈິ່ງຈະສຳເລັດ.

ຂ່າວ: ສະຖານີວິທະຍຸ-ໂທລະໂຄ່ງ ເມືອງຫົງສາ ແຂວງໄຊຍະບູລີ