ກອງປະຊຸມໃຫຍ່ ໜ່ວຍພັກກົມເຕັກໂນໂລຊີ ແລະ ນະວັດຕະກຳ

494

ກອງປະຊຸມໃຫຍ່ສະມາຊິກພັກຄັ້ງທີ II ຂອງໜ່ວຍພັກ ກົມເຕັກໂນໂລຊີ ແລະ ນະວັດຕະກຳ (ກຕນ), ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ເປີດຂຶ້ນໃນຕອນເຊົ້າຂອງວັນທີ 12 ພະຈິກ 2019 ນີ້ທີ່ຫ້ອງປະຊຸມ ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ ພາຍໃຕ້ການເປັນຄະນະປະທານຂອງ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກວຕ; ສະຫາຍ ສຸມານະ ຈຸລາມະນີ, ເລຂາໜ່ວຍພັກ ກຕນ ແລະສະຫາຍ ນ. ຄຳຍອງ ສີຈັນທະວົງ, ຮອງເລຂາໜ່ວຍພັກ ກຕນ.

ຜູ້ແທນກອງປະຊຸມ ໄດ້ຄົ້ນຄວ້າ ແລະ ປະກອບຄຳຄິດ, ຄຳເຫັນໃສ່ບົດລາຍງານການເມືອງ, ບົດສຳ ຫຼວດການນຳພາຂອງຄະນະໜ່ວຍພັກ ແລະ ໄດ້ເປັນເອກະພາບຕໍ່ການຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນໃນການຊີ້ນຳ-ນຳພາ ການຈັດຕັ້ງປະຕິບັດມະຕິກອງປະຊຸມໃຫຍ່ຂອງໜ່ວຍພັກ ກົມເຕັກໂນໂລຊີ ແລະ ນະວັດຕະກຳ ຄັ້ງທີ I ໄລຍະ 5 ປີຜ່ານມາ.

ຜູ້ແທນກອງປະຊຸມ ຍັງໄດ້ເປັນເອກະພາບຮັບຮອງເອົາທິດທາງ, ແຜນການໃນຊຸມປີຕໍ່ໜ້ານັບແຕ່ປີ 2020 ຮອດປີ 2024. ສະມາຊິກພັກສົມບູນ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ບົນພື້ນຖານ ຄວາມຖືກຕ້ອງສອດຄ່ອງກັບ ມາດຖານເງື່ອນ ໄຂທີ່ກຳນົດໄວ້ ຊຶ່ງມີຜູ້ສະໝັກເລືອກຕັ້ງ 05 ສະຫາຍ, ຍິງ 01 ສະຫາຍ ແລະ ເລືອກໄດ້ 03 ສະຫາຍ.

ກອງປະຊຸມຄັ້ງປະຖົມມະລຶກຂອງຄະນະໜ່ວຍພັກ ກຕນ ໄດ້ເປັນເອກະສັນເລືອກສະຫາຍ ສຸມານະ ຈຸລາມະນີ ເປັນເລຂາໜ່ວຍພັກ, ສະຫາຍ ວິໄລສອນ ບຸບຜາລັດ ເປັນຮອງເລຂາໜ່ວຍພັກ ແລະ ສະຫາຍ ນ. ຄຳຍອງ ສີຈັນທະວົງ ເປັນຄະນະ ແລະ ພ້ອມທັງເປັນປະທານກວດກາໜ່ວຍພັກ.

ໂອກາດດຽວກັນນີ້, ສະມາຊິກພັກສົມບູນ ຍັງໄດ້ປ່ອນບັດເລືອກເອົາຜູ້ແທນສົມບູນຈຳນວນ 11 ສະຫາຍ ແລະ ຜູ້ແທນສຳຮອງ ຈຳນວນ 3 ສະຫາຍ ເພື່ອເຂົ້້າ ຮ່ວມກອງປະຊຸມໃຫຍ່ອົງຄະນະພັກ ກວຕ ຄັ້ງທີ II.

ກອງປະຊຸມໃຫຍ່ຄັ້ງນີ້ ຍັງໄດ້ຮັບຟັງການໂອ້ລົມຂອງສະຫາຍບັນດິດ ສຈ. ບໍ່ວຽງຄຳ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກວຕ ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ-ນຳພາ ຂອງຄະນະ ພັກຊຸດເກົ່າ ທີ່ໄດ້ຊີ້ນຳ-ນໍາພາສະມາຊິກພັກ, ພະນັກງານປະຕິ ບັດໜ້າທີ່ການເມືອງໃນໄລຍະຊຸມ ປີຜ່ານມາ ໄດ້ຮັບຜົນສຳ ເລັດຫຼາຍດ້ານ.

ສະຫາຍ ໄດ້ຮຽກຮ້ອງໃຫ້ຄະນະໜ່ວຍພັກຊຸດໃໝ່ ສືບຕໍ່ເສີມຂະຫຍາຍຈຸດດີ, ປັບປຸງ, ແກ້ໄຂຂໍ້ຄົງຄ້າງ ແລະ ໄດ້ໃຫ້ທິດຊີ້ນໍາວຽກງານແຕ່ລະດ້ານ. ສະຫາຍ ເຊື່ອໝັ້ນຕໍ່ຄະນະໜ່ວຍພັກຊຸດໃໝ່ ຈະສືບຕໍ່ຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ II ຂອງໜ່ວຍພັກ ກຕນ ເພື່ອສ້າງຜົນງານຍິ່ງໃຫຍ່ກວ່າເກົ່າ.

ເຂົ້າຮ່ວມກອງປະຊຸມດັ່ງກ່າວ ມີຮອງເລຂາຄະນະພັກ, ບັນດາຄະນະພັກ ກວຕ, ບັນດາເລຂາໜ່ວຍພັກ, ຕາງໜ້າສາມອົງການຈັດຕັ້ງມະຫາຊົນພາຍໃນ ກວຕ ແລະ ສະມາຊິກພັກ ກຕນ, ລວມທັງໝົດຈຳນວນ 30 ສະຫາຍ.

ທີ່ມາ: ກະຊວງ ກວຕ