ຊ່າງແຕ່ງໜ້າ ອາຊີບທີ່ສ້າງລາຍໄດ້ດີແຕ່ຕ້ອງມີຄວາມຮັກ ແລະ ອົດທົນ

395

ອີກໜຶ່ງອາຊີບທີ່ສາມາດເຮັດໄດ້ແບບອິດສະຫຼະທີ່ບໍ່ຄວນເບິ່ງຂ້າມ ທັງສາມາດສ້າງລາຍໄດ້ຕໍ່ປີບໍ່ໜ້ອຍກວ່າອາຊີບອື່ນ ນັ້ນກໍຄືຊ່າງແຕ່ງໜ້າ ເຊິ່ງອາຊີບນີ້ນັບວ່າເປັນອາຊີບທີ່ໜ້າສົນໃຈ ແລະ ປັດຈຸບັນສັງເກດເຫັນໄດ້ຫຼາຍວ່າລາວເຮົາກໍເລີ່ມມີຜູ້ປະກອບອາຊີບດັ່ງກ່າວເກີດຂຶ້ນມາຫຼາຍ.

ອາຊີບຊ່າງແຕ່ງໜ້າສາມາດເຮັດໄດ້ທັງແບບອິດສະຫຼະ ຫຼື ເປັນລູກຈ້າງໃຫ້ແກ່ຮ້ານເສີມສວຍຕ່າງໆ ຫຼືລົງທຶນເຮັດທຸລະກິດຮ້ານເສີມສວຍກໍໄດ້ ແຕ່ມື້ນີ້ຜູ້ຂຽນຈະຍົກເອົາຊ່າງແຕ່ງໜ້າອິດສະຫຼະທີ່ເລີ່ມເຂົ້າວົງການການແຕ່ງໜ້າມາແຕ່ອາຍຸ 15   ປີ ,ພັດທະນາຕົນເອງມາຕະຫຼອດຈົນກາຍເປັນທີ່ຮູ້ຈັກໃນສັງຄົມ ພ້ອມສ້າງລາຍຮັບປະມານ 50 ລ້ານກີບຕໍ່ປີ ກໍຄື ທ້າວ ຕິ່ງຄໍາ ອ່ອນແສງເພັດ ອາຍຸ 23 ປີ ຊ່າງແຕ່ງໜ້າ ບ້ານຕານມີໄຊ ເມືອງໄຊທານີ ນະຄອນຫຼວງວຽງຈັນ.

ທ້າວ ຕິ່ງຄໍາ ອ່ອນແສງເພັດ ກ່າວວ່າ: ຕົນເອງເລີ່ມເຮັດອາຊີບແຕ່ງໜ້າດ້ວຍຄວາມຮັກ ຕັ້ງແຕ່ຮຽນຢູ່ ມ 5 ໂດຍເປັນການເລີ່ມຕົ້ນຈາກສູນບໍ່ໄດ້ຮຽນກ່ຽວກັບດ້ານນີ້, ບໍ່ມີຄວາມຮູ້ດ້ານນີ້ເລີຍ ແຕ່ຍ້ອນໃຈມັກບວກກັບພອນສະຫວັນ ແລະ ພອນສະແຫວງທີ່ມີຢູ່, ຊອກຄົ້ນຄວ້າເບິ່ງການແຕ່ງໜ້າໃນສື່ອອນລາຍຕ່າງໆ ຕິດຕາມການແຕ່ງໜ້າຂອງບັນດາຊ່າງແຕ່ງໜ້າທີ່ມີຊື່ສຽງທັງພາຍໃນ ແລະ ຕ່າງປະເທດ ຈຶ່ງເຮັດໃຫ້ສີມືການແຕ່ງໜ້າຂອງຕົນພັດທະນາຂຶ້ນມາເລື້ອຍໆ. ຫຼັງຈາກນັ້ນ, ກໍທົດລອງແຕ່ງໜ້າໃຫ້ໝູ່, ແຕ່ງໃຫ້ພີ່ນ້ອງໂດຍບໍ່ເອົາເງິນ, ເຮັດແບບນັ້ນມາເລື້ອຍໆຈົນຄົນອື່ນສັງເກດເຫັນພັດທະນາການທີ່ດີຂຶ້ນ, ແຕ່ງໜ້າໄດ້ງາມຂຶ້ນ. ຫຼັງຈາກນັ້ນ, ເຂົ້າຮຽນມະຫາວິທະຍາໄລ ປີ 2 ກໍເລີ່ມຮັບງານແຕ່ງໜ້າຢ່າງຈິງຈັງ ແລະ ເລີ່ມມີລາຍຮັບເຂົ້າມາ ເຮັດໃຫ້ສາມາດແບ່ງເບົາພາລະພໍ່ແມ່ໄດ້ຈໍານວນໜຶ່ງ.

ຕິ່ງຄໍາ ອ່ອນແສງເພັດ ກ່າວຕື່ມວ່າ: ການເຮັດອາຊີບດັ່ງກ່າວມັນບໍ່ແມ່ນເລື່ອງງ່າຍເລີຍ ເຮົາຕ້ອງມີ ຄວາມອົດທົນ, ໃຝ່ຮູ້ ໂດຍສະເພາະຄົນທີ່ເລີ່ມນັບໜຶ່ງໃໝ່, ຕ້ອງສະແຫວງຫາແບບການແຕ່ງໜ້າໃໝ່ໆຢູ່ຕະຫຼອດເພື່ອໃຫ້ທັນຕາມການປ່ຽນແປງຂອງຍຸກສະໄໝ. ນອກຈາກນີ້, ສິ່ງທີ່ສໍາຄັນແມ່ນການບໍລິການ ຫຼື ຮັບມືກັບລູກຄ້າທີ່ມາໃຊ້ບໍລິການ ເພາະເຮົາບໍ່ສາມາດຮູ້ໄດ້ວ່າລູກຄ້າທີ່ເຂົ້າມາແຕ່ງໜ້າກັບເຮົາແຕ່ລະຄັ້ງມີນິດໄສໃຈຄໍແບບໃດ, ບາງຄັ້ງຫາກໂຊກດີກໍໄດ້ລູກຄ້າທີ່ໃຈດີ, ບໍ່ຫຼາຍເລື່ອງ ແຕ່ຫາກໂຊກບໍ່ດີກໍອາດພົບກັບລູກຄ້າທີ່ຈູ້ຈີ້ຈຸກຈິກ ຢາກໄດ້ໃນສິ່ງທີ່ບໍ່ສາມາດເປັນໄປໄດ້ ທັງໝົດນີ້ເຮົາບໍ່ສາມາດເລືອກ ໄດ້.

ສິ່ງສໍາຄັນແມ່ນການສື່ສານເຮົາຕ້ອງສາມາດຕອບໂຈດສິ່ງທີ່ລູກຄ້າຕ້ອງການໄດ້ ຫຼື ຫາກເຮັດບໍ່ໄດ້ກໍຕ້ອງອະທິບາຍເຖິງເຫດຜົນ ພ້ອມແນະນໍາສິ່ງທີ່ເໝາະກັບລູກຄ້າໃຫ້ເຂົ້າໃຈ, ວິທີນີ້ນອກຈາກ   ຈະເຮັດໃຫ້ທັງສອງຝ່າຍມີ ຄວາມເພິ່ງພໍໃຈແລ້ວຍັງໝາຍເຖິງການໃສ່ໃຈທຸກລາຍລະອຽດຂອງລູກຄ້າ ເຮັດໃຫ້ເຂົາເຈົ້າເຊື່ອໃຈ ແລະ ກັບມາໃຊ້ບໍລິການເຮົາອີກ.

ຊ່າງແຕ່ງໜ້າອິດສະຫຼະເຜີຍໃຫ້ຮູ້ເຖິງລາຍຮັບວ່າ: ລາຍຮັບຈາກການປະກອບອາຊີບດັ່ງກ່າວສະເລ່ຍປະມານ 4 ລ້ານກີບຕໍ່ເດຶືອນ ປີໜຶ່ງປະມານ 50 ລ້ານກີບ ເຊິ່ງການຮັບງານສ່ວນຫຼາຍຈະເປັນໄລຍະອອກພັນສາ ໂດຍຮັບແຕ່ງໜ້າທົ່ວໄປ, ຮັບແຕ່ງໜ້າເຈົ້າສາວ ແລະ ຍັງຮັບງານຢູ່ເບື້ອງຫຼັງໃນເວທີສະແດງຕ່າງໆ. ພ້ອມດຽວກັນນັ້ນ, ຍັງໄດ້ເປັນຕົວແທນຊ່າງແຕ່ງໜ້າປະເທດລາວໄປແຂ່ງກັບອີກ 10 ປະເທດ ເພື່ອຄັດເອົາຕົວແທນຈາກອາຊີ ໄປແຂ່ງລະດັບໂລກເຊິ່ງໄດ້ຮັບລາງວັນຊະນະເລີດ karmart Asian Beauty Blogger 2018 Laos ແລະ ຍັງໄດ້ເປັນໜຶ່ງໃນຊ່າງແຕ່ງໜ້າຂອງລາວ ທີ່ໄດ້ເຂົ້າຮ່ວມໂຄງການ Young Makeup Artist Thailand season 1 by Nongchat ໂດຍຊ່າງແຕ່ງໜ້າແຖວໜ້າຂອງປະເທດເພື່ອນບ້ານນໍາອີກ.

( ໂດຍ: ເອຢິບ )

ທີ່ມາ: ໜັງສືພິມເສດຖະກິດບການຄ້າ