ພະແນກ ຍທຂ ແຂວງບໍ່ແກ້ວ ປະກາດປັບປຸງການຈັດຕັ້ງໃໝ່.

440

ພະແນກໂຍທາທິການ ແລະ ຂົນສົ່ງແຂວງບໍ່ແກ້ວ ໄດ້ມີພິທີເຊື່ອມຊຶມກົດໝາຍລັດຖະກອນ ພ້ອມທັງປະກາດປັບປຸງການຈັດຕັ້ງຮອງຫົວໜ້າຂະແໜງພາຍໃນພະແນກ ຍທຂ ຄືນໃໝ່, ທັງນີ້ກໍ່ເພື່ອໃຫ້ສອດຄ່ອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ.

ໃນນີ້, ໄດ້ອ່ານຂໍ້ຕົກລົງຂອງທ່ານເຈົ້າແຂວງບໍ່ແກ້ວ ວ່າດ້ວຍການປັບປຸງການຈັດຕັ້ງພາຍໃນພະແນກ ຍທຂ ແຂວງບໍ່ແກ້ວ ເຊິ່ງຕົກລົງເຫັນດີໃຫ້ທ່ານ ທອງພັນ ພົມມະຫານ ເປັນຮອງຂະແໜງ ຂົວທາງ, ທັງເປັນຮອງຫົວໜ້າປູຢາງ 2 ຊັ້ນ (ເມືອງປາກທາ-ເມືອງຜາອຸດົມ); ແຕ່ງຕັ້ງ ທ່ານ ເພັດນະຄອນ ວົງລໍຄໍາ ຫົວໜ້າຫ້ອງການຈັດຕັ້ງປະຕິບັດໂຄງການ (PIU) ຂອງໂຄງການ ADB ໃຫ້ເປັນຮອງຫົວໜ້າຂະແໜງເຄຫາ-ຜັງເມືອງ ແລະ ນໍ້າປະປາ; ແຕ່ງຕັ້ງ ທ່ານ ພູວຽງ ເພັດສົມພອນ ເປັນຫົວໜ້າໜ່ວຍງານຄຸ້ມຄອງຂົວ ແລະ ອາຄານ, ກອງຄຸ້ມຄອງມິດຕະພາບລາວ-ໄທ ແຫ່ງທີ 4 (ຫ້ວຍຊາຍ-ຊຽງຂອງ).

ໂອກາດນີ້, ທ່ານ ໂຈມ ໄຊສົງຄາມ ຫົວໜ້າພະແນກໂຍທາທິການ ແລະ ຂົນສົ່ງແຂວງ ຍັງໃຫ້ກຽດເຜີຍແຜ່ເອກະສານກົດໝາຍຂອງລັດຖະກອນ ເຊິ່ງທ່ານຍັງໄດ້ຍົກໃຫ້ເຫັນພຶດຕິກໍາຂອງພະນັກ ງານ-ລັດຖະກອນຕ້ອງຮັບຮູ້ເປັນຕົ້ນແມ່ນ ພາກ III ໝວດທີ 1 ວ່າດ້ວຍສິດຂອງພະນັກງານ-ລັດຖະ ກອນ, ມາດຕາ 5 ສິດໃນການປະຕິບັດໜ້າທີ່ທາງງລັດຖະກອນ, ສິດ, ໜ້າທີ່, ພັນທະ, ຈັນຍາບັນ ແລະ ການສິ້ນສຸດການເປັນພະນັກງານ-ລັດຖະກອນ. ພາກທີ V ຂໍ້ຫ້າມຂອງພະນັກງານ; ພາກທີ VIII ນະໂຍບາຍຕໍ່ຜູ້ທີ່ມີຜົນງານ ແລະ ມາດຕະການຕໍ່ຜູ້ລະເມີດ.

ພິທີດັ່ງກ່າວ ຈັດຂຶ້ນໃນວັນທີ 7 ພະຈິກ 2019 ທີ່ພະແນກ ຍທຂ ແຂວງບໍແກ້ວ ພາຍໃຕ້ການເປັນປະທານຂອງທ່ານ ໂຈມ ໄຊສົງຄາມ ກໍາມະການພັກແຂວງ ຫົວໜ້າພະແນກໂຍທາທິການ ແລະ ຂົນສົ່ງແຂວງ, ມີບັນດາຫົວໜ້າຂະແໜງ, ຮອງຂະແໜງ, ພະນັກງານສະມາຊິກພັກ-ລັດຖະກອນເຂົ້າຮ່ວມ.

ເນື້ອໃນ-ຮູບພາບ: ຍທຂ ແຂວງບໍ່ແກ້ວ