ສປປ ລາວ ສຳເລັດການເຂົ້າຮ່ວມງານວາງສະແດງສິນຄ້ານຳເຂົ້າສາກົນ ຄັ້ງທີ 2

382

ງານວາງສະແດງສິນຄ້ານຳເຂົ້າສາກົນ ສປ ຈີນ ຄັ້ງທີ 2 ໄດ້ຈັດຂຶ້ນໃນລະຫວ່າງວັນທີ 5 – 10 ພະຈິກ 2019 ຜ່ານມາ ທີ່ນະຄອນຊຽງໄຮ້ ສປ ຈີນ ໂດຍການເປີດງານຂອງ ທ່ານ ສີ ຈິ້ນຜິງ ປະທານປະເທດ ສປ ຈີນ ເຊິ່ງການຈັດງານວາງສະແດງໃນປີນີ້ ແມ່ນໄດ້ເນັ້ນລົງເລິກການສ້າງອະນາຄົດຮ່ວມກັນໃນປະຊາຄົມໂລກ ແລະ ການຮ່ວມມືກັນທາງດ້ານການພັດທະນາສະພາບແວດລ້ອມທຸລະກິດຮ່ວມກັນ.

ຕາງໜ້າຈາກທາງລັດຖະບານ ສປປ ລາວ ໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ( ອຄ ) ພ້ອມທັງໄດ້ເຂົ້າຮ່ວມກອງປະຊຸມ ລັດຖະມົນຕີ ອົງການການຄ້າໂລກ, ກອງປະຊຸມສຳມະນາລະບຽບການ ແລະ ສະພາບແວດລ້ອມດຳເນີນທຸລະກິດ ແລະ ການຢ້ຽມຊົມການພັດທະນາເຂດເສດຖະກິດການຄ້າໃນນະຄອນຊຽງໄຮ້.

ທ່ານ ສີ ຈິ້ນຜິງ ກ່າວວ່າ: ການຈັດງານວາງສະແດງສິນຄ້ານໍາເຂົ້າສາກົນປີນີ້ ເນັ້ນ 5 ຫົວຂໍ້ ຄື: 1). ສປ ຈີນ ຈະສືບຕໍ່ເປີດຕະຫຼາດທັງພາຍໃນ ແລະ ຕ່າງປະເທດ ເພື່ອເລັ່ງພັດທະນາເສດຖະກິດໃຫ້ຂະຫຍາຍຕົວ ແລະ ມີຄວາມສະຖຽນລະພາບ; 2). ຈະສືບຕໍ່ປັບປຸງໂຄງສ້າງການເປີດໂຕທາງດ້ານການເຊື່ອມໂຍງ ໂດຍເລັ່ງໃສ່ການເປີດເຂດເສດຖະກິດພິເສດໃນແຕ່ລະເຂດ ແລະ ຍົກລະດັບຄຸນນະພາບການພັດທະນາໃຫ້ເຂັ້ມແຂງ; 3). ຈະສືບຕໍ່ພັດທະນາສະພາບແວດລ້ອມການດຳເນີນທຸລະກິດ ໂດຍການຕັດສິ່ງກີດຂວາງ ແລະ ຂັ້ນຂອດ ເພື່ອພັດທະນາເສດຖະກິດໃຫ້ເຕີບໂຕ ໂດຍສະເພາະໃນການເຊື່ອມໂຍງ, ການເຂົ້າເຖິງຕະຫຼາດ, ການຫັນເປັນທັນສະໄໝ ທີ່ມີຄຸນນະພາບສູງ ບົນພື້ນຖານຫຼັກການຂອງຕະຫຼາດ; 4). ຈະລົງເລິກຮັດແໜ້ນພັດທະນາການຮ່ວມມືຫຼາຍຝ່າຍ ແລະ ສອງຝ່າຍ ເພື່ອສ້າງອະນາຄົດຮ່ວມກັນ ໂດຍການເຮັດສັນຍາການຄ້າເສລີກັບຫຼາຍປະເທດເພີ່ມຂຶ້ນ ແລະ 5). ຈະສືບຕໍ່ໃນການຮ່ວມມືໃນຂອບ ໜຶ່ງທາງ ໜຶ່ງເສັ້ນທາງ ໃຫ້ເພີ່ມຂຶ້ນ ໂດຍການຮ່ວມກັນປະກອບສ່ວນ, ຮ່ວມກັນໄດ້ຮັບຜົນປະໂຫຍດ ແລະ ຮ່ວມກັນສົ່ງເສີມການຮ່ວມມືໃນຂອບດັ່ງກ່າວໃຫ້ໄດ້ຄຸນນະພາບ.

ທ່ານ ນາງ ເຂັມມະນີ ພົນເສນາ ກ່າວວ່າ: “ ຄຳປາໄສຂອງ ທ່ານ ສີ ຈິ້ນຜິງ ເຮັດໃຫ້ຂ້າພະເຈົ້າມີຄວາມປະທັບໃຈຫຼາຍ ໂດຍສະເພາະບົດລາຍງານກ່ຽວກັບສະພາບແວດລ້ອມການດຳເນີນທຸລະກິດປີ 2020 ທີ່ປະກາດໂດຍທະນາຄານໂລກ ເຊິ່ງໄດ້ຈັດເອົາສະພາບແວດລ້ອມການດຳເນີນທຸລະກິດຂອງ ສປ ຈີນ ດີຂຶ້ນຈາກອັນດັບ 46 ມາເປັນອັນດັບທີ 31 ມັນໄດ້ສະແດງໃຫ້ເຫັນວ່າ ສປ ຈີນ ໄດ້ມີການປະຕິຮູບ ແລະ ເປີດປະຕູສູ່ພາຍນອກ ແລະ ໄດ້ປັບປຸງສະພາບແວດລ້ອມການດຳເນີນທຸລະກິດໃຫ້ດີຂຶ້ນ ເຊິ່ງ ສປປ ລາວ ພວກເຮົາແມ່ນສາມາດໄດ້ຖອດຖອນບົດຮຽນນຳ ສປ ຈີນ ເພື່ອສ້າງສະພາບແວດລ້ອມດ້ານການລົງທຶນໃນລາວໃຫ້ດີຂຶ້ນ ເພື່ອດຶງດູດການລົງທຶນ ແລະ ເຮັດການຄ້າຮ່ວມກັນ ເພື່ອສາມາດແຂ່ງຂັນໃນເວທີສາກົນໄດ້.

ທັງນີ້, ງານວາງສະແດງສິນຄ້ານຳເຂົ້າສາກົນ ສປ ຈີນ ຄັ້ງທີ 2 ນີ້ ໄດ້ມີຫົວໜ່ວຍທຸລະກິດຈາກ ສປປ ລາວ ເຂົ້າຮ່ວມທັງໝົດ 13 ຫົວໜ່ວຍ ຄື: ຊາ, ກາເຟ, ເຂົ້າ, ເຟີນີເຈີ, ຫັດຖະກຳ, ເບຍລາວ, ອັນຍະມະນີ, ຜ້າໄໝ ຖືເປັນສິນຄ້າທ່າແຮງຂອງລາວ ເຊິ່ງກະຊວງ ອຄ ໄດ້ສ້າງໂອກາດໃຫ້ກັບຫົວໜ່ວຍທຸລະກິດທ່າແຮງເຫຼົ່ານີ້ໄດ້ມີໂອກາດເຂົ້າມາວາງສະແດງໂດຍບໍ່ເສຍຄ່າໃຊ້ຈ່າຍ ທີ່ລາວໄດ້ຮັບການຊ່ວຍເຫຼືອຈາກລັດຖະບານ ສປ ຈີນ ເພື່ອກະກຽມພັດທະນາທຸລະກິດຕົນເອງ ແລະ ປັບປຸງຜະລິດຕະພັນ, ຊອກຫາຄູ່ຮ່ວມທຸລະກິດໃນງານດັ່ງກ່າວ.

ພິເສດ ການເຂົ້າຮ່ວມງານວາງສະແດງຄັ້ງນີ້ ສປປ ລາວ ໄດ້ມີການລົງນາມຊື້ – ຂາຍເຂົ້າສານສົ່ງອອກໄປຈີນ ຈຳນວນ 8.000 ໂຕນ ໃນໂກຕາ 50.000 ໂຕນ ທີ່ລັດຖະບານ ສປປ ລາວ ໄດ້ລົງນາມໃນກາງປີ 2019 ແລະ ມາຮອດປັດຈຸບັນ ສປປ ລາວ ແມ່ນໄດ້ສຳເລັດການສົ່ງອອກເຂົ້າໄປ ສປ ຈີນ 1.350 ໂຕນ. ນອກຈາກສິນຄ້າເຂົ້າແລ້ວ ທຸລະກິດເຂົ້າຮ່ວມງານວາງສະແດງຄັ້ງນີ້ ຍັງໄດ້ມີການທາບທາມເຊັນບົດບັນທຶກການຊື້ – ຂາຍໝາກແຄນຈາກຫົວໜ່ວຍທຸລະກິດ ສປປ ລາວ.

ທີ່ມາ: ໜັງສືພິມ ເສດຖະກິດ-ການຄ້າ