ມອບເຮືອນ 1 ຫຼັງ ໃຫ້ແມ່ຍິງທຸກຍາກ ແລະ ຂາດທີ່ຢູ່ອາໄສ

358

ສະຫະພັນແມ່ຍິງແຂວງເຊກອງ ຮ່ວມກັບສະຫະພັນແມ່ຍິງເມືອງທ່າແຕງ ໄດ້ມອບເຮືອນ 1 ຫຼັງ ໃຫ້ ນາງ ຈັນ ເຊິ່ງຜູ້ກ່ຽວແມ່ນແມ່ຍິງທຸກຍາກ, ດ້ອຍໂອກາດ, ໂດດດ່ຽວປ່ຽວພອຍ ແລະ ຂາດທີ່ຢູ່ອາໄສ ຢູ່ບ້ານໜອງບົວໃສ່ ເມືອງທ່າແຕງ ແຂວງເຊກອງ.

ພິທີດັ່ງກ່າວໄດ້ຈັດຂຶ້ນໃນວັນທີ 8 ພະຈິກ 2019 ນີ້ ທີ່ເຮືອນຂອງຜູ້ກ່ຽວບ້ານໜອງບົວໃສ່, ເຮືອນທີ່ມອບໃຫ້ ນາງ ຈັນ ໃນຄັ້ງນີ້ແມ່ນສະຫະພັນແມ່ຍິງແຂວງເຊກອງ ໄດ້ຮັບທຶນສະໜັບສະໜູນຈາກສະມາຄົມສະຫະພັນແມ່ຍິງສາທາລະນະລັດ ສັງຄົມນິຍົມຫວຽດນາມ ແຂວງກວາງນາມ ຈຳນວນ 50 ລ້ານດົງ ຫຼື 18 ລ້ານກີບ, ທຶນສົມທົບຈາກໂຮງງານຜະລິດເຫຼົ້າບອງໂສມກາດອກຮັກ ແຂວງເຊກອງ ຈໍານວນ 2 ລ້ານກີບ, ທຶນສົມທົບຈາກສະຫະພັນແມ່ຍິງເມືອງທ່າແຕງ ຈໍານວນ 3 ລ້ານກີບ ແລະ ຮັບຈາກທຶນສົມທົບພາຍໃນບ້ານໜອງບົວໃສ່ ຈໍານວນ 11 ລ້ານ 5 ແສນກີບ ລວມມູນຄ່າການກໍ່ສ້າງທັງໝົດ 34 ລ້ານ 5 ແສນກີບ ເພື່ອແກ້ໄຂນະໂຍບາຍປຸກສ້າງເຮືອນຢູ່ອາໄສໃຫ້ ນາງ ຈັນ ເຊິ່ງເປັນແມ່ຍິງທຸກຍາກ, ດ້ອຍໂອກາດ, ໂດດດ່ຽວປ່ຽວພອຍ ແລະ ຂາດທີ່ຢູ່ອາໄສ ຈຳນວນ 1 ຫຼັງ.

ປະຊາຊົນພາຍໃນບ້ານໜອງບົວໃສ່ ເປັນຜູ້ຮັບເໝົາກໍ່ສ້າງ ເພື່ອຊ່ວຍເຫຼືອເຊິ່ງກັນ ແລະ ກັນ, ເຮືອນດັ່ງກ່າວມີຂະໜາດ 5×8 ແມັດ, ໂຄງສ້າງປະກອບດ້ວຍໄມ້, ມຸງດ້ວຍສັງກະສີ, ປູດ້ວຍແປ້ນ, ແອ້ມແປ້ນ, ມີ 1 ຫ້ອງນອນ, 1 ຫ້ອງຮັບແຂກ ແລະ 1 ຫ້ອງນໍ້າ, ໃຊ້ເວລາໃນການກໍ່ສ້າງ 11 ວັນ ເຊິ່ງເລີ່ມແຕ່ວັນທີ 2 – 12 ສິງຫາ 2019 ຈຶ່ງສຳເລັດ.

ທີ່ມາ: ໜັງສືພິມ ເສດຖະກິດ-ການຄ້າ