ຂົວໄມ້ປ່ອງຂ້າມນໍ້າຄານ ໜຶ່ງສີສັນດຶງດູດການທ່ອງທ່ຽວປາກນໍ້າຄານເຊື່ອມຕໍ່ແມ່ນໍ້າຂອງ

314

ຂົວຂ້າມແມ່ນໍ້າຄານເຮັດດ້ວຍໄມ້ປ່ອງ ມີຄວາມຍາວ 100 ກວ່າແມັດ ໃນມູນຄ່າ 20 ລ້ານກວ່າກີບ ເພື່ອເຊື່ອມຈອດສອງຟາກຝັ່ງຈຸດແຈແຫຼມປາກນໍ້າຄານ ( ອ້າຍຕົ່ງກວ້າງ ) ຫາ ບ້ານຄີລີ ( ໂຮງແຮມແມ່ຂອງວີວ ) ແນໃສ່ສ້າງສິ່ງອໍານວຍຄວມສະດວກໃຫ້ແກ່ນັກທ່ອງທ່ຽວຍ່າງຂ້າມເພື່ອຊົມທິວທັດທໍາມະຊາດເຂດປາກນໍ້າຄານຕໍ່ໃສ່ແມ່ນໍ້າຂອງ ແລະ ໄປທ່ຽວຊົມບ້ານຫັດຖະກໍາຊ່າງຄ້ອງ ໂດຍໃຊ້ເວລາສັ້ນກວ່າຂີ່ລົດໂຄ້ງອອກໄປທາງຂົວໃໝ່.

ທ່ານ ບຸນເຫຼືອ ສິນທະວົງ ນາຍບ້ານໂພນສະອາດໃຫ້ຮູ້ວ່າ: ສໍາລັບໂຄງການສ້າງຂົວໄມ້ປ່ອງຂ້າມນໍ້າຄານ ( ຈຸດປາກນໍ້າຄານ ) ແມ່ນໂຄງການໜຶ່ງຂອງບ້ານໂພນສະອາດ ເພື່ອເປັນການສ້າງສີສັນສົ່ງເສີມການທ່ອງທ່ຽວ ແລະ ສ້າງລາຍຮັບໃຫ້ກັບບ້ານ ເຊິ່ງໂຄງການສ້າງຂົວໄມ້ປ່ອງແມ່ນໄດ້ເລີ່ມມາແຕ່ປີ 2006 ເປັນຕົ້ນມາ ລວມ 10 ກວ່າປີແລ້ວ ເຊິ່ງທ່ານຈະໄດ້ເຫັນພາບຂົວໄມ້ປ່ອງຢູ່ທີ່ປາກນໍ້າຄານແຫ່ງນີ້ແຕ່ລະປີນັບແຕ່ເດືອນຕຸລາໄປຮອດເດືອນມິຖຸນາເທົ່ານັ້ນ. ອີກຢ່າງກໍ່ເພື່ອແນໃສ່ສ້າງສິ່ງອໍານວຍຄວາມສະດວກໃຫ້ແກ່ນັກທ່ອງທ່ຽວຍ່າງຂ້າມໄປ – ມາເພື່ອຊົມທິວທັດທໍາມະຊາດເຂດປາກນໍ້າຄານຕໍ່ໃສ່ແມ່ນໍ້າຂອງ, ຊົມພູທ້າວ – ພູນາງຟາກແມ່ນໍ້າຂອງທາງເມືອງຈອມເພັດ ແລະ ໄປທ່ຽວຊົມບ້ານຫັດຖະກໍາຊ່າງຄ້ອງ ໂດຍໃຊ້ເວລາສັ້ນກວ່າຂີ່ລົດໂຄ້ງອອກໄປທາງຂົວໃໝ່ ເຊິ່ງໃນແຕ່ລະປີໄດ້ມີແຂກນັກທ່ອງທ່ຽວຈາກທັງພາຍໃນ ແລະ ຕ່າງປະເທດໄປໃຊ້ບໍລິການເປັນຈໍານວນຫຼາຍ ສາມາດສ້າງລາຍຮັບໃຫ້ກັບບ້ານໂພນສະອາດປີໜຶ່ງປະມານ 30 – 40 ລ້ານກວ່າກີບ. ສໍາລັບຄ່າປີ້ຜ່ານຂົວນັກທ່ອງທ່ຽວຕ່າງປະເທດເກັບຄົນລະ 10 ພັນກີບໄປ – ກັບ, ຄົນລາວ 2.000 ກີບ.

ທ່ານນາຍບ້ານຍັງໃຫ້ຮູ້ຕື່ມວ່າ: ບ້ານໂພນສະອາດ ຕັ້ງຢູ່ລະຫວ່າງກາງແມ່ນໍ້າຂອງ ແລະ ແມ່ນໍ້າຄານ ມີ 193 ຄອບຄົວ, ພົນລະເມືອງ 1.159 ຄົນ, GDP ບັນລຸ 17 ຕື້ກວ່າກີບ, ສະເລ່ຍໃສ່ຫົວຄົນໜຶ່ງປະມານ 17 ລ້ານກວ່າກີບຕໍ່ຄົນຕໍ່ປີ.

ສະນັ້ນ, ຫາກທ່ານໃດທີ່ໄດ້ມາທ່ຽວຊົມ ນະຄອນຫຼວງພະບາງ ໄລຍະລະດູການນີ້ເປັນຕົ້ນໄປກໍຢ່າລືມໄປໃຊ້ບໍລິການເດີ ຮັບຮອງວ່າທ່ານຈະມີພາບມູມງາມໆຈາກປາກນໍ້າຄານເຊື່ອມຕໍ່ແມ່ນໍ້າຂອງໄວ້ໃນມືຖືຂອງທ່ານເພື່ອໄວ້ເບິ່ງເວລາກັບບ້ານບໍ່ຜິດຫວັງແນ່ນອນ ໂດຍສະເພາະແມ່ນພາບຍາມແລງ.

ທີ່ມາ: ໜັງສືພິມ ເສດຖະກິດ-ການຄ້າ