ໂຮ້ຍອານ ສ້າງລາຍຮັບຈາກການທ່ອງທ່ຽວ 5 ຕື້ດົງຕໍ່ປີ

324

ນະຄອນໂຮ້ຍອານ ແຂວງ ກວາງນາມ ສສ ຫວຽດນາມ ເປັນອີກສະຖານທີ່ທ່ອງທ່ຽວໜຶ່ງທີ່ດຶງດູດເມັດເງິນມະຫາສານມາສູ່ຊຸມຊົນ ສະເລ່ຍຕໍ່ປີມີນັກທ່ອງທ່ຽວເຂົ້າມາ 5 ແສນເທື່ອຄົນ ສ້າງລາຍຮັບ 5 ຕື້ດົງ.

ທ່ານ ຫງຽນ ວັນ ເຊິນ ຮອງປະທານຄະນະກໍາມະການປະຊາຊົນນະຄອນໂຮ້ຍອານໄດ້ຕ້ອນຮັບຄະນະສື່ມວນຊົນລາວ ແລະ ລາຍງານສະພາບພົ້ນເດັ່ນການພັດທະນາເສດຖະກິດ – ສັງຄົມ. ໃນນັ້ນ, ທ່ານໄດ້ຍົກໃຫ້ເຫັນວ່າ ນະຄອນໂຮ້ຍອານມີເນື້ອທີ່ 60   ກິໂລຕາແມັດ ມີທ່າແຮງດ້ານການທ່ອງທ່ຽວ ເນື່ອງຈາກມີສະຖານທີ່ທ່ອງທ່ຽວຄຸ້ມເມືອງເກົ່າຂຶ້ນທະບຽນເປັນມໍລະດົກໂລກ ທີ່ອົງການຢູເນສໂກຮັບຮອງ ເຊິ່ງມີວັດຖຸບູຮານທີ່ເປັນຂອງລໍ້າຄ່າເຖິງ 1.500 ອັນໄດ້ກາຍເປັນສະຖານທີ່ທ່ອງທ່ຽວສຳຄັນຂອງນະຄອນແຫ່ງນີ້. ພ້ອມນັ້ນ, ຍັງມີໝູ່ບ້ານປັ້ນດິນເຜົາ, ໝູ່ບ້ານຫັດຖະກໍາ ແລະ ສະຖານທາງດ້ານປະຫວັດສາດອື່ນໆ ທີ່ເປັນທີ່ນິຍົມຂອງນັກທ່ອງທ່ຽວທັງຫວຽດນາມ ແລະ ຊາວຕ່າງປະເທດ.

ທ່ານກ່າວຕື່ມວ່າ: ໃນແຕ່ລະປີມີນັກທ່ອງທ່ຽວເຂົ້າມາບໍ່ຕ່ຳ   ກວ່າ 5 ແສນເທື່ອຄົນ, ສາມາດສ້າງລາຍຮັບ 5 ຕື້ດົງ, ປັດໄຈທີ່ເຮັດໃຫ້ຂະແໜງທ່ອງທ່ຽວດ້ານວັດທະນະທໍາມີຄວາມສໍາເລັດເປັນທີ່ສົນໃຈນອກຈາກທາງປູຊະນີຍະສະຖານແລ້ວຍັງແມ່ນການຈັດງານເທດສະການຕ່າງໆທີ່ເປັນລັກສະນະຊາດ ແລະ ແບບສາກົນ ເປັນຕົ້ນແມ່ນເທດສະການອາຫານຫວຽດນາມ – ຍີ່ປຸ່ນ, ສ.ເກົາຫຼີ ເຊິ່ງການດຶງດູດໄດ້ເປັນຢ່າງດີ ລວມທັງພາກລັດ ກໍຄືນະຄອນໂຮ້ຍອານ ໄດ້ຈັດນັກສະແດງໄປສະແດງຢູ່ຕ່າງປະເທດ ເປັນຕົ້ນແມ່ນເຢຍລະມັນ, ອິຕາລີ. ພ້ອມນັ້ນ, ຍັງໄດ້ແຮງສະໜັບສະໜູນຈາກພາກເອກະຊົນ ເປັນຕົ້ນແມ່ນໂຮງແຮມ, ຮ້ານອາຫານ, ບໍລິສັດທ່ອງທ່ຽວ ໂດຍໂຄສະນາຜ່ານເວັບໄຊຂອງເຂົາເຈົ້າ.

ໂອກາດດັ່ງກ່າວ ທ່ານ ສົມສະຫວາດ ພົງສາ ຮອງຫົວໜ້າກົມສື່ມວນຊົນ ຫົວໜ້າຄະນະສື່ມວນຊົນລາວ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ໝາກຜົນທີ່ການນໍານະຄອນໂຮ້ຍອານຍາດມາໄດ້ໃນຫຼາຍປີຜ່ານມາ ພ້ອມທັງໄດ້ແລກປ່ຽນບົດຮຽນ ສະພາບການຄຸ້ມຄອງສະຖານທີ່ທ່ອງທ່ຽວ, ການຄຸ້ມຄອງບັນດາຮ້ານອາຫານ, ໂຮງແຮມ, ການຮັກສາຄວາມສະຫງົບ, ການບູລະນະປະຕິສັງຂອນວັດຖຸບູຮານ, ການສ້າງທ່າແຮງປິ່ນອ້ອມສະຖານທີ່ທ່ອງທ່ຽວທັງໝົດເພື່ອນໍາເອົາບົດຮຽນກັບຄືນມາເປັນແຜນພັດທະນາ ແລະ ຍຸດທະສາດ ປັບປຸງສະຖານທີ່ທ່ອງທ່ຽວຂອງລາວເຮົາລວມທັງຜູ້ປະກອບການ ໃຫ້ມີ ຄວາມພ້ອມຮອງຮັບນັກທ່ອງທ່ຽວທີ່ເພີ່ມຂຶ້ນ.

ການພົບປະມີຂຶ້ນໃນວັນທີ 8 ພະຈິກ 2019 ທີ່ນະຄອນໂຮ້ຍອານ ແຂວງກວາງນາມ ຕ້ອນຮັບໂດຍ ທ່ານ ຫງຽນ ວັນ ເຊິນ ພ້ອມຄະນະ.

ທີ່ມາ: ໜັງສືພິມ ເສດຖະກິດ-ການຄ້າ