ເມືອງລະມາມ ເປີດຂະບວນສັກຢາກັນພະຍາດສັດລ້ຽງ ພ້ອມເປີດການຜະລິດລະດູແລ້ງ ສົກປີ 2019-2020

403

ເມືອງລະມາມ ແຂວງ ເຊກອງ ໄດ້ຈັດກິດຈະກໍາສັກຢາປ້ອງກັນພະຍາດສັດລ້ຽງແຫ່ງຊາດວັນທີ 11 ພະຈິກ ແລະວັນເປີດນໍ້າຊົນລະປະທານແຫ່ງຊາດວັນທີ 3 ພະຈິກ,ເປີດຂະບວນການຜະລິດລະດູແລ້ງສົກ 2019-2020 ຂື້ນໃນວັນທີ 11 ພະຈິກ 2019 ນີ້ ຢູ່ທີ່ບ້ານໜອງບົງ-ຫ້ວຍຂຽວ ໂດຍເປັນກຽດເຂົ້າຮ່ວມເປັນປະທານຂອງທ່ານ ຂັນຕີ ສີລະວົງສາ ກຳມະການພັກແຂວງ ເລຂາພັກເມືອງ ເຈົ້າເມືອງລະມາມ,ທ່ານ ສົມຫວັງ ຂ່ຳມະວົງ ກຳມະການພັກແຂວງ ຫົວໜ້າພະແນກ ກະສິກຳ ແລະ ປ່າໄມ້ແຂວງ,ມີຄະນະນຳຂັ້ນເມືອງ-ຂັ້ນແຂວງ,ຫົວໜ້າພະແນກ-ຮອງພະແນກ,ຫົວໜ້າຫ້ອງການ-ຮອງຫ້ອງການອ້ອມຂ້າງເມືອງ,ມີອຳນາດການປົກຄອງບ້ານພ້ອມດ້ວຍປະຊາຊົນບ້ານດັ່ງກ່າວເຂົ້າຮ່ວມ.

ທ່ານ ຄຳສວນ ທອງດີມະນີວົງ ຮອງຫົວໜ້າຫ້ອງການກະສິກໍາ ແລະ ປ່າໄມ້ເມືອງລະມາມ ໄດ້ຂື້ນກ່າວປະຫວັດຄວາມເປັນມາຂອງວັນສັກຢາປ້ອງກັນພະຍາດສັດລ້ຽງແຫ່ງຊາດແລະວັນເປີດນໍ້າຊົນລະປະທານ,ເປີດຈະບວນການຜະລິດລະດູແລ້ວເຊິ່ງທ່ານກ່າວວ່າ: ໂດຍສືບຕໍ່ປະຕິບັດຕາມທິດນໍາສາມສ້າງຂອງພັກ,ລັດວາງອອກ,ໂດຍຕິດພັນກັບແຜນພັດທະນາກະສິກໍາແລະປ່າໄມ້ເມືອງໃນແຕ່ລະໄລຍະ,ເຊີ່ງພັກແລະລັດຖະບານແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ຄວາມໝາຍສໍາຄັນຕໍ່ກັບການສັກຢາປ້ອງກັນພະຍາດ ໂດຍໄດ້ກໍານົດເອົາວັນທີ 11 ພະຈິກຂອງທຸກໆປີ ເປັນວັນສັກຢາປ້ອງກັນພະຍາດແຫ່ງຊາດ,ເຊິ່ງໃນແຕ່ລະປີເມື່ອເຖິງວັນດັ່ງກ່າວ ຫຼາຍທ້ອງຖິ່ນກໍ່ໄດ້ຈັດພິທີຂື້ນ ເພື່ອສ້າງຂະບວນການຮັກສາສຸຂະພາບສັດລ້ຽງຢ່າງເປັນຂະບວນການຝົດຟື້ນ.ເວົ້າລວມ,ເວົ້າສະເພາະ ເມືອງລະມາມ ໂດຍແນໃສ່ໃຫ້ແຕ່ລະເຂດປອດພະຍາດສັດລ້ຽງ ທັງເປັນການປົກປັກຮັກສາສັດລ້ຽງເພື່ອບໍ່ໃຫ້ຕິດພະຍາດລະບາດຕາມລະດູການ.ອັນຜົ້ນເດັ່ນທີ່ສະແດງອອກໃນການເຄື່ອນໄຫວ ສາມາດເຮັດໃຫ້ຝູງສັດນ້ອຍ,ສັດໃຫຍ່ເພີ່ມຂຶ້ນ 729,033 ໂຕ, ສັກຢາກັນພະຍາດສະເລ່ຍທົ່ວເມືອງ ໄດ້ 90%,ນອກຈາກນີ້ການກໍ່ສ້າງພື້ນຖານໂຄງລ່າງດ້ານຊົນລະປະທານ ນັບທັງລັດລົງທຶນ,ອົງການຈັດຕັ້ງສາກົນ ແລະ ຝາຍຊຸມຊົນທົ່ວແຂວງໄດ້ທັງໝົດ 158 ແຫ່ງ,ສາມາດຕອບສະໜອງນ້ຳລະດູແລ້ງໄດ້ 1.400 ຮຕ,ແລະລະດູຝົນໄດ້ 6.500 ຮຕ.ສຳລັບເມືອງລະມາມມາຮອດປະຈຸບັນມີລະບົບຊົນລະປະທານທັງໝົດ 18 ແຫ່ງ ສາມາດສະໜອງນໍ້າໃນລະດູແລ້ງໄດ້1.097 ຮຕ ແລະລະດູຝົນໄດ້ 2.675 ຮຕ ,ພ້ອມນີ້ຍັງໄດ້ເຮັດກິດຈະກຳສັກຢາກັນພະຍາດສັດລ້ຽງ ແລະ ເປີດນໍ້າຊົນລະປະທານ ຕື່ມອີກ.

ໂອກາດນີ້ ທ່ານ ຂັນຕີ ສີລະວົງສາ ກຳມະການພັກແຂວງ ເລຂາພັກ ເຈົ້າເມືອງລະມາມກໍ່ໄດ້ກ່າວສະແດງຍ້ອງຍໍຊົມເຊີຍມາຍັງທຸກພາກສວ່ນທີ່ໄດ້ເອົາໃຈໃສ່ປະສານສົມທົບກັບພາກສວນຕ່າງໆ ທີ່ກ່ຽວຂ້ອງ ພ້ອມດ້ວຍພະນັກງານວິຊາການທີ່ໄດ້ເອົາໃຈໃສ່ໄກ້ຊິດຕິດແທດ ເພື່ອເຮັດໃຫ້ວັນທີ 11 ພະຈິກຂອງທຸກໆປີ ເປັນວັນສັກຢາປ້ອງກັນພະຍາດສັດລ້ຽງແຫ່ງຊາດໃຫ້ມີບັນຍາກາດຟົດຝື້ນ. ພ້ອມຮຽກຮ້ອງມາຍັງແຕ່ລະເຂດທົ່ວເມືອງລະມາມ, ຈົ່ງນໍາເອົາເນື້ອໃນຈິດໃຈຄັ້ງນີ້ ນໍາໄປຈັດຕັ້ງປະຕິບັດ,ຜັນຂະຫຍາຍເນື້ອໃນຢ່າງຮັດກຸ່ມ ໂດຍກໍານົດເອົາລະບຽບການ,ມາດຕະການ,ແນວທາງນະໂຍບາຍຂອງພັກ,ລະບຽບກົດໝາຍຂອງລັດ ເພື່ອປຸກລະດົມໃຫ້ປະຊາຊົນລາວບັນດາເຜົ່າ,ນັກຮຽນຮູ້ປັນຍາຊົນມີຈິດສໍານຶກ,ເປັນເຈົ້າການຄຸ້ມຄອງ-ຮັກສາສຸຂະພາບສັດລ້ຽງຂອງຕົນໃຫ້ດີຂື້ນກວ່າເກົ່າ.

ຂ່າວ:ດາວສະຫວັນ