ແມ່ຄ້າຄົນກາງສະເໜີພາກລັດ ຕ້ອງສົ່ງເສີມຜູ້ຜະລິດຢ່າງຈິງຈັງ ເພື່ອຫຼຸດຜ່ອນການນຳເຂົ້າ

326

ຕະຫຼອດໄລຍະຫຼາຍປີຜ່ານມາ ສິນຄ້າຫຼາຍປະເພດທີ່ຈຳໜ່າຍຢູ່ຕາມທ້ອງຕະຫຼາດແມ່ນນຳເຂົ້າຈາກປະເທດເພື່ອນບ້ານ ເຮັດໃຫ້ຕົວເລກການນຳເຂົ້າເພີ່ມຂຶ້ນທຸກປີ, ສົ່ງຜົນກະທົບຕໍ່ຄວາມເຂັ້ມແຂງຂອງລະບົບເສດຖະກິດແຫ່ງຊາດ, ຂະນະທີ່ແມ່ຄ້າຄົນກາງ ຫຼື ຜູ້ປະກອບການສະເໜີ ຫາກຕ້ອງການຫຼຸດຜ່ອນການນຳເຂົ້າພາກລັດຕ້ອງສົ່ງເສີມຂອດການຜະລິດຢ່າງຈິງຈັງ ເຮັດໃຫ້ສາມາດສະໜອງສິນຄ້າໄດ້ທຸກລະດູການ.

ວັນທີ 7 ພະຈິກ 2019 ກະຊວງກະສິກໍາ ແລະ ປ່າໄມ້ ໄດ້ຈັດກອງປະຊຸມປຶກສາຫາລືພົບປະກັບພໍ່ຄ້າ – ແມ່ຄ້າຄົນກາງ  ຊື້ – ຂາຍຜັກຢູ່ຕະຫຼາດລາວອົດຊີ ນະຄອນຫຼວງວຽງຈັນ, ນໍາໂດຍ ທ່ານ ພວງປາຣິສັກ ປຣະວົງວຽງຄໍາ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ມີບັນດາກົມກ່ຽວຂ້ອງ, ເຈົ້າຂອງຕະຫຼາດ, ພໍ່ຄ້າ – ແມ່ຄ້າຄົນກາງ ແລະ ພາກສ່ວນກ່ຽວຂ້ອງເຂົ້າຮ່ວມແລກປ່ຽນ ຄວາມຄິດເຫັນເຊິ່ງກັນ ແລະ ກັນ.

ທ່ານ ພວງປາຣິສັກ ປຣະວົງວຽງຄໍາ ໄດ້ປະກອບຄໍາເຫັນຕໍ່ກອງປະຊຸມ ໂດຍມີບາງຕອນກ່າວວ່າ: ສໍາລັບການພົບປະກັນໃນຄັ້ງນີ້ມີຈຸດປະສົງເພື່ອຮັບຟັງບັນຫາທີ່ພໍ່ຄ້າ – ແມ່ຄ້າຄົນກາງ ຫຼື ບັນຫາຕ່າງໆທີ່ເກີດຂຶ້ນຢູ່ຕະຫຼາດ ເນື່ອງຈາກຮັບຟັງຈາກກອງປະຊຸມຄັ້ງຜ່ານມາ ແມ່ນມີຫຼາຍພາກສ່ວນສະເໜີຫຼາຍບັນຫາ ທັງກ່ຽວກັບການຖືກແມ່ຄ້າຄົນກາງເອົາປຽບ, ການເກັບພາສີອາກອນທີ່ບໍ່ສະເໝີພາບ ຫຼື ຄ່າໃຊ້ຈ່າຍຕ່າງໆ ແຕ່ທັງນີ້ທັງນັ້ນກໍຕ້ອງໄດ້ຮັບຟັງທັງສອງຝ່າຍ ເພື່ອການແກ້ໄຂບັນຫາທີ່ຖືກຕ້ອງ ແລະ ຖ່ວງທັນ.

ທ່ານ ນາງ ສຸດາໄລ ພັນທະມີໄຊ ຜູ້ຊ່ວຍຜູ້ບໍລິຫານຕະຫຼາດລາວອົດຊີ ໃຫ້ຮູ້ວ່າ: ຕະຫຼາດລາວອົດຊີ ເປັນຕະຫຼາດຂາຍຍົກຂາຍຍ່ອຍມີສິນຄ້າເກືອບທຸກປະເພດ, ແຕ່ຈະເດັ່ນໃນເລື່ອງສິນຄ້າກະສິກໍາທີ່ຜະລິດຢູ່ພາຍໃນ ແລະ ນຳເຂົ້າຈາກຕ່າງປະເທດ ( ຈາກປະເທດໄທ 15%, ຈາກຈີນ 10%, ຈາກຫວຽດນາມ 10% ) ປະເພດທີ່ນໍາເຂົ້າສ່ວນຫຼາຍແມ່ນສິນຄ້າທີ່ພາຍໃນເຮົາບໍ່ສາມາດຕອບສະໜອງໃຫ້ໄດ້ ເຊິ່ງລາຍລະອຽດຕ່າງໆກໍຕ້ອງເກັບກໍາຂໍ້ມູນຕື່ມ ໂດຍສະເພາະແມ່ນຄວາມຕ້ອງການຂອງຕະຫຼາດ, ແຕ່ສິ່ງທີ່ເປັນບັນຫາຂອງສິນຄ້າພາຍໃນແມ່ນເລື່ອງຄຸນນະພາບ, ລາຄາ, ປະລິມານ, ຜູ້ຜະລິດທີ່ປູກບໍ່ກົງກັບຄວາມຕ້ອງການຂອງຕະຫຼາດ.

ຂະນະທີ່ຜູ້ປູກພືດຜັກກຸ່ມບ້ານຫ້ອມ ເມືອງຫາດຊາຍຟອງ ທັງເປັນພໍ່ຄ້າຄົນກາງເກັບຊື້ພືດຜັກປ້ອນຕະຫຼາດ ໃຫ້ຮູ້ວ່າ: ປັດຈຸບັນການປູກພືດຜັກທີ່ພົ້ນເດັ່ນ ແລະ ສາມາດສະໜອງໄດ້ຫຼາຍແມ່ນປະເພດຫອມລາບ, ຫອມປ້ອມ, ຫອມບົ່ວ ແຕ່ມັນກໍເປັນການສະໜອງພຽງຕາມລະດູການເທົ່ານັ້ນ ບໍ່ສາມາດສະໜອງໄດ້ຕາມຄວາມຕ້ອງການຕະຫຼອດເວລາ ຍ້ອນການປູກຂອງປະຊາຊົນແມ່ນເຮັດຕາມແບບປະຖົມປະຖານປູກຕາມລະດູການເທົ່ານັ້ນ ຍັງບໍ່ມີຄວາມອາດສາມາດພຽງພໍເຮັດນອກລະດູການ ດັ່ງນັ້ນ, ຈຶ່ງເກີດມີການນໍາເຂົ້າເພື່ອສະໜອງຄວາມຕ້ອງການຂອງຕະຫຼາດ. ຫາກຢາກແກ້ໄຂບັນຫາການນໍາເຂົ້າແມ່ນສະເໜີໃຫ້ມີວິຊາການລົງຕິດຕາມແນະນໍາການຜະລິດນອກລະດູການຂອງປະຊາຊົນ ພ້ອມມີການປູກຢ່າງເປັນລະບົບ, ກໍານົດພື້ນທີ່ປູກພືດຜັກແຕ່ລະຊະນິດຢ່າງຊັດເຈນ ເພື່ອບໍ່ໃຫ້ມີການຜະລິດເຫຼືອ ຫຼື ບໍ່ພໍ, ຖ້າສາມາດເຮັດໄດ້ເຊື່ອວ່າການນໍາເຂົ້າກໍຈະຫຼຸດລົງ, ແຕ່ຫາກຈະນໍາເຂົ້າກໍຕ້ອງເນັ້ນສະເພາະພືດທີ່ເຮົາບໍ່ສາມາດຜະລິດໄດ້ ເປັນຕົ້ນແມ່ນ ຫົວກະຣົດ, ຫົວໄຊເທົ້າ ແລະ ອື່ນໆ.

ທ່ານຮອງລັດຖະມົນຕີກະຊວງກະສິກໍາ ແລະ ປ່າໄມ້ ກ່າວຕອນທ້າຍກອງປະຊຸມວ່າ: ຕໍ່ກັບວຽກງານຫຼຸດຜ່ອນການນໍາເຂົ້າສິນຄ້າທີ່ຜະລິດໄດ້ຈາກຕ່າງປະເທດນັ້ນ ຕ້ອງໄດ້ເກັບກຳຂໍ້ມູນທີ່ໜັກແໜ້ນເຖິງຄວາມຕ້ອງການຂອງຜູ້ບໍລິໂພກ ແລະ ຄວາມອາດສາມາດໃນການຜະລິດຂອງຊາວກະສິກອນ ເພື່ອແກ້ໄຂບັນຫາດັ່ງກ່າວ.

( ຂ່າວ: ເອຢິບ, ຮູບ: ວິລະສັກ )

ທີ່ມາ: ໜັງສືພິມ ເສດຖະກິດ-ການຄ້າ