ເປີດການນຳໄຊ້ໄຟຟ້າດ່ານທ້ອງຖິ່ນອາສົກ ແລະ ອາຈາ ເມືອງສະໝ້ວຍ ແຂວງສາລະວັນ

341
????????????????????????????????????

ພິທີເປີດການນຳໃຊ້ໄຟຟ້າ ດ່ານທ້ອງຖິ່ນອາສົກ ແລະ ດ່ານທ້ອງຖິ່ນອາຈາ ເມືອງສະໝ້ວຍ ແຂວງສາລະວັນ ຈັດຂຶ້ນໃນວັນທີ 4 ພະຈິກ 2019 ທີ່ດ່ານທ້ອງຖິ່ນອາສົກ​ ໂດຍການເຂົ້າຮ່ວມຂອງ ທ່ານ ວິຊຽນ ນະວິກຸນ ຮອງເຈົ້າແຂວງ ຜູ້ຊີ້ນຳຂົງເຂດເສດຖະກິດຂັ້ນແຂວງ, ທ່ານ ບຸນສຽງ ລັດຕະສິງ ຫົວໜ້າຝ່າຍປະຕິບັດການໄຟຟ້າພາກເໜືອ ແລະ ພາກໃຕ້, ທ່ານ ບຸນເຕີ້ຍ ດວງສຸລິຍະວົງສາ ຮັກສາການເຈົ້າເມືອງສະໝ້ວຍ ຕະຫຼອດຮອດຕາງໜ້າພະແນກການ, ຫ້ອງການທີ່ກ່ຽວຂ້ອງຂອງເມືອງເຂົ້າຮ່ວມ.

ທ່ານ ເດດສຸວັນ ມະໄລທອງ ຫົວໜ້າລັດວິສາຫະກິດໄຟຟ້າລາວ ສາຂາແຂວງສາລະວັນ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງຕາຂ່າຍໄຟຟ້າ 22 ກິໂລໂວນ ລວງຍາວເກືອບ 5 ກິໂລແມັດ ພ້ອມຕິດຕັ້ງໝໍ້ແປງ 3P 50 ກິໂລວັດອໍາແປ ເຂົ້າດ່ານທ້ອງຖິ່ນອາສົກ ແລະ ດ່ານທ້ອງຖິ່ນອາຈາ ເມືອງສະໝ້ວຍ ໄດ້ລົງມືຈັດຕັ້ງປະຕິບັດມາແຕ່ຕົ້ນເດືອນຕຸລາ 2019 ແລະ ສຳເລັດ 100% ໃນຕົ້ນເດືອນພະຈິກ 2019 ໂດຍແມ່ນລັດວິສາຫະກິດໄຟຟ້າລາວ ສາຂາແຂວງສາລະວັນ ເປັນຜູ້ຈັດຕັ້ງປະຕິບັດ ໃນມູນຄ່າ 700 ລ້ານກວ່າກີບ ເຊິ່ງສືບຕໍ່ດຶງຈາກຕາຂ່າຍໄຟຟ້າທີ່ມີແລ້ວຈາກ ບໍລິສັດ ເພັດໄລພອນການໄຟຟ້າ.

ໂອກາດດຽວກັນນີ້ ທ່ານ ບຸນນານ ປັນຍາຈັກ ຮອງເລຂາພັກເມືອງສະໝ້ວຍ ຕາງໜ້າໃຫ້ອຳນາດການປົກຄອງຂັ້ນເມືອງ ກໍໄດ້ສະແດງຄວາມດີໃຈພ້ອມກ່າວຄຳຂອບໃຈຕໍ່ລັດວິສາຫະກິດໄຟຟ້າລາວ ສາຂາແຂວງສາລະວັນ ທີ່ໄດ້ສຸມສະຕິປັນຍາ, ທຶນຮອນ ເພື່ອເຮັດໃຫ້ດ່ານມີໄຟຟ້າຊົມໃຊ້ທີ່ຖາວອນ. ພ້ອມດຽວກັນນັ້ນ, ທ່ານຍັງໄດ້ໃຫ້ຄຳໝັ້ນສັນຍາວ່າຈະສືບຕໍ່ປົກປັກຮັກສາຕາຂ່າຍ ກໍຄືອຸປະກອນໄຟຟ້າໃຫ້ນຳໃຊ້ໄດ້ຍາວນານ.

( ຂ່າວ: ທິດລານີ ໂຄດໂຍທາ )

ທີ່ມາ: ໜັງສືພິມ ເສດຖະກິດ-ການຄ້າ