ຜູ້ວ່າການ ທຫລ ຊີ້ນຳໃຫ້ບັນດາທະນາຄານທຸລະກິດ ສ້າງເງື່ອນໄຂໃຫ້ຊາວກະສິກອນເຮັດການຜະລິດ

371

ອາທິດຜ່ານມາ ທ່ານ ສອນໄຊ ສິດພະໄຊ ຜູ້ວ່າການທະນາຄານ ແຫ່ງ ສປປ ລາວ ( ທຫລ ) ພ້ອມຄະນະ ໄດ້ເຄື່ອນໄຫວຊຸກຍູ້ຕິດຕາມວຽກງານທະນາຄານຢູ່ພາກກາງ ແລະ ພາກໃຕ້ ໂດຍໄດ້ພົບປະກັບບັນດາການນຳຂອງ   ແຂວງສະຫວັນນະເຂດ, ສາລະວັນ ແລະ ແຂວງຈຳປາສັກ ເພື່ອຮັບຟັງສະພາບຜົນເສຍຫາຍຈາກໄພພິບັດນໍ້າຖ້ວມທີ່ສົ່ງຜົນກະທົບຢ່າງໜັກໜ່ວງຕໍ່ຊີວິດ, ຊັບສິນ, ສັດລ້ຽງ ແລະ ຜົນລະປູກຂອງປະຊາຊົນ.

ໃນການເຄື່ອນໄຫວຄັ້ງນີ້ ທ່ານຍັງໄດ້ຮັບຟັງການລາຍງານຈາກສາຂາ ທຫລ ປະຈຳພາກໃຕ້  ແລະ ການລາຍງານຂອງສາຂາທະນາຄານທຸລະກິດ ໃນການປະກອບສ່ວນຊ່ວຍເຫຼືອທາງດ້ານການເງິນ, ວັດຖຸສິ່ງຂອງບັນເທົາທຸກແກ່ບັນດາແຂວງທີ່ໄດ້ຮັບຜົນກະທົບ ແລະ ພ້ອມດຽວກັນນັ້ນ, ຍັງໄດ້ຮັບການລາຍງານສະພາບຂໍ້ມູນຜົນເສຍຫາຍຂອງລູກຄ້າທີ່ທະນາຄານໄດ້ປ່ອຍສິນເຊື່ອໃນຂະແໜງການຜະລິດ, ປູກຝັງ ແລະ ລ້ຽງສັດ.

ສຳລັບການປະກອບສ່ວນຊ່ວຍເຫຼືອບັນເທົາທຸກ, ຂະແໜງທະນາຄານໄດ້ລະດົມໃຫ້ການຊ່ວຍເຫຼືອ ເງິນ, ວັດຖຸ ແລະ ປັດໄຈນໍາບັນດາທະນາຄານທຸລະກິດ ແລະ ສັງຄົມຈຳນວນຫຼວງຫຼາຍ ໂດຍສະເພາະທະນາຄານການຄ້າຕ່າງປະເທດລາວ ມະຫາຊົນ ໄດ້ຊື້ເຂົ້າສານຊ່ວຍເຫຼືອຜູ້ປະສົບໄພໃນວົງເງິນ 600 ລ້ານກີບ ຈຳນວນ 1.464 ເປົາ ( ເປົາລະ 50 ກິໂລ ) ເພື່ອຊ່ວຍເຫຼືອບັນດາແຂວງທີ່ໄດ້ຮັບຜົນກະທົບ; ສຳລັບຜົນເສຍຫາຍເບື້ອງຕົ້ນຂອງທະນາຄານທຸລະກິດຕິດພັນກັບການປ່ອຍສິນເຊື່ອມີຈຳນວນເງິນທັງໝົດ 168,43 ຕື້ກີບ, ບັນຫາຄວາມຈໍາເປັນອັນຮີບດ່ວນຈາກການລາຍງານ ແມ່ນສະພາບການຂາດເຂົ້າກິນ, ຄວາມຕ້ອງການແນວພັນເຂົ້າ ແລະ ເມັດພັນພືດເພື່ອປູກທົດແທນ ເຊິ່ງປະຊາຊົນກໍາລັງຄອງຄອຍການສະໜອງຈາກພາກລັດໃຫ້ການຊ່ວຍເຫຼືອ ແລະ ມີປະຊາຊົນຈຳນວນໜຶ່ງ ກໍໄດ້ມີການຊອກຫາດ້ວຍຕົນເອງ ກໍຄືການເຂົ້າຫາແຫຼ່ງທຶນນຳທະນາຄານເພື່ອຊື້ແນວພັນ.

ຕໍ່ການປະກອບສ່ວນຂອງຂະແໜງທະນາຄານໃນການຟື້ນຟູໄພພິບັດດັ່ງກ່າວ, ທ່ານຜູ້ວ່າການ ທຫລ ໄດ້ຊີ້ນຳໃຫ້ບັນດາສາຂາທະນາຄານທຸລະກິດ ຈົ່ງເອົາໃຈໃສ່ຊ່ວຍເຫຼືອທາງດ້ານແຫຼ່ງທຶນ ເພື່ອຟື້ນຟູການຜະລິດ, ຊື້ແນວພັນ ແລະ ສ້າງເງື່ອນໄຂໃຫ້ຊາວກະສິກອນ ສາມາດດຳເນີນການຜະລິດ ແລະ ຟື້ນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິໂດຍໄວ. ພ້ອມນີ້, ທ່ານຍັງໄດ້ຊີ້ນຳໃຫ້ມີການປະເມີນ ແລະ ຕີລາຄາຜົນເສຍຫາຍຂອງລູກຄ້າ ທີ່ໄດ້ຮັບສິນເຊື່ອຈາກທະນາຄານໃຫ້ຖືກຕ້ອງກັບສະພາບຄວາມເປັນຈິງ, ຫຼີກລຽງການສວຍໂອກາດບໍ່ໃຫ້ເອົາບັນຫາສະພາບໄພນ້ຳຖ້ວມເປັນຂໍ້ອ້າງເວລາເກີດບັນຫາໜີ້ສິນ NPLໃນຕໍ່ໜ້າ; ສຳລັບມາດຕະການຂອງທະນາຄານ ເພື່ອແກ້ໄຂຜົນເສຍຫາຍຈາກໄພທຳມະຊາດນັ້ນ ແມ່ນໃຫ້ບັນດາທະນາຄານທຸລະກິດຈັດຕັ້ງປະຕິບັດຕາມນະໂຍບາຍສິນເຊື່ອ ເພື່ອແກ້ໄຂຜົນກະທົບຈາກໄພທໍາມະຊາດທີ່ ທຫລ ໄດ້ກຳນົດ ໂດຍເລື່ອນເວລາຊຳລະໜີ້ທັງຕົ້ນທຶນ ແລະ ດອກເບ້ຍ; ສະໜອງເງິນກູ້ໃໝ່ໃຫ້ຊາວກະສິກອນຜູ້ທີ່ມີເງື່ອນໄຂ ສາມາດຊຳລະເງິນກູ້ຄືນໃຫ້ທະນາຄານ  ແລະ ປັບປຸງສັນຍາເງິນກູ້ຄືນໃໝ່, ໃນກໍລະນີແຫຼ່ງທຶນບໍ່ພຽງພໍ ທະນາຄານທຸລະກິດສາມາດສະເໜີຄວາມຕ້ອງການທາງດ້ານແຫຼ່ງທຶນມາຍັງ ທຫລ.

[ ຂ່າວ: ຣັດສະໝີ ດວງສັດຈະ ]

ທີ່ມາ: ໜັງສືພິມ ເສດຖະກິດ-ການຄ້າ