ມີ 27 ບໍລິສັດ ເຂົ້າມາລົງທຶນຢູ່ເຂດເສດຖະກິດບຶງທາດຫຼວງ ມູນຄ່າ 300 ກວ່າລ້ານໂດລາ

425

ເຂດເສດຖະກິດສະເພາະບຶງທາດຫຼວງ ສາມາດດຶງດູດເອົານັກລົງທຶນໄດ້ແລ້ວ 27 ບໍລິສັດ ລວມມູນຄ່າການລົງທຶນ 306 ລ້ານໂດລາສະຫະລັດ. ໃນນັ້ນ, ຜູ້ພັດທະນາ 248 ລ້ານໂດລາສະຫະລັດ, ຜູ້ລົງທຶນລາຍຍ່ອຍ 57 ລ້ານໂດລາສະຫະລັດ ປະຕິບັດພັນທະຊົດເຊີຍທີ່ດິນ ແລະ ອາກອນຕ່າງໆ 10 ກວ່າລ້ານໂດລາສະຫະລັດ.

ອີງຕາມການເປີດເຜີຍຂອງ ທ່ານ ສຸບັນ ຈຸນລາຊາ ຫົວໜ້າຄະນະຄຸ້ມຄອງເສດຖະກິດພິເສດນະຄອນຫຼວງວຽງຈັນ ໃຫ້ຮູ້ວ່າ: ເຂດເສດຖະກິດສະເພາະບຶງທາດຫຼວງ ໄດ້ສ້າງຂຶ້ນຕາມສັນຍາ ຄັ້ງວັນທີ 28 ທັນວາ 2011, ແຜນແມ່ບົດ ແລະ ແຜນຜັງລວມຂອງເຂດເສດຖະກິດດັ່ງກ່າວໄດ້ຖືກຮັບຮອງຈາກລັດຖະບານ ເຊິ່ງຕາງໜ້າໂດຍນະຄອນຫຼວງວຽງຈັນ ໃນວັນທີ 9 ເມສາ 2019 ລະຫວ່າງລັດຖະບານ ສປປ ລາວ ກັບນັກລົງທຶນຈາກນະຄອນຊຽງໄຮ້ ສປ ຈີນ ເຊິ່ງມີເນື້ອທີ່ທັງໝົດຕາມສັນຍາ 365 ເຮັກຕາ, ມີທຶນທັງໝົດຈໍານວນ 1,7 ຕື້ໂດລາສະຫະລັດ, ທຶນຈົດທະບຽນ 90 ລ້ານໂດລາສະຫະລັດ ແລະ ແຜນການລົງທຶນ 1,6 ຕື້ໂດລາສະຫະລັດ.

ປະກອບດ້ວຍ 8 ກິດຈະກໍາ ຄື:

1 ເຂດສວນທຳມະຊາດ, ເຂດສີຂຽວ, ສວນດອກໄມ້, ສະຖານທີ່ສາທາລະນະເພື່ອການພັກຜ່ອນ;

2 ໜອງນ້ຳໃຫຍ່ໃຈກາງເມືອງພ້ອມທັງລະບົບລະບາຍນ້ຳ;

3 ພັດທະນາໂຄງລ່າງພື້ນຖານ ເປັນຕົ້ນ: ຖະໜົນຫົນທາງຜ່ານໃນເຂດ, ທາງເຂົ້າເຂດ, ປະຕູໂຂງເຂົ້າ – ອອກເຂດທີ່ໄດ້ມາດຕະຖານ;

4 ເຂດສູນກາງກີລາ, ສູນການຄ້າ ແລະ ການບໍລິການທີ່ປະກອບມີໂຮງແຮມລະດັບ 5 ດາວ, ໂຮງແຮມຂະໜາດນ້ອຍ, ຮ້ານສັບພະສິນຄ້າຂະໜາດ ໃຫຍ່, ຮ້ານອາຫານ ແລະ ສະຖານທີ່ພັກຜ່ອນ;

5 ເຂດທີ່ຢູ່ອາໄສ ເຊິ່ງປະກອບດ້ວຍ: ເຮືອນວິນລາລະດັບສູງ ແລະ ອອກແບບຕາມວັດທະນະທຳລາວ, ແບບເອີຣົບ, ເຮືອນພັກແບບອາພາດເມັ້ນ ແລະ ອື່ນໆ;

6 ສິ່ງປຸກສ້າງເພື່ອສະໜອງແກ່ກິດຈະການທ່ອງທ່ຽວ ທີ່ຕິດພັນກັບປະຫວັດສາດ ແລະ ວັດທະນະທໍາຂອງລ້ານຊ້າງ;

7 ຫ້ອງການສໍານັກງານຂອງເຂດ;

8 ກໍ່ສ້າງສະຖານທີ່ບຳບັດນ້ຳເປື້ອນ ແລະ ກໍາຈັດສິ່ງເສດເຫຼືອ.

ຈຸດປະສົງຂອງການສ້າງເຂດເສດຖະກິດດັ່ງກ່າວ ເພື່ອໃຫ້ກາຍເປັນຕົວເມືອງທ່ອງທ່ຽວທີ່ທັນສະໄໝ, ໃຫ້ກາຍເປັນເຂດເສດຖະກິດທີ່ພຽບພ້ອມໄປດ້ວຍສິ່ງອຳນວຍ ຄວາມສະດວກເພື່ອຮອງຮັບໃຫ້ແກ່ຜູ້ລົງທຶນ, ນິຕິບຸກຄົນ, ບຸກຄົນທັງພາຍໃນ ແລະ ຕ່າງປະເທດ, ເປັນເຂດຕົວເມືອງທ່ອງທ່ຽວທີ່ທັນສະໄໝ, ສະຫງົບປອດໄພ, ເປັນຕົວເມືອງສີຂຽວ ແລະ ມີໜອງນ້ຳໃຫຍ່, ມີພື້ນຖານເສດຖະກິດທີ່ເຂັ້ມແຂງ, ວັດທະນະທຳສັງຄົມສີວິໄລ ແລະ ຍຸຕິທຳ, ເສີມສ້າງອະລິຍະທຳ, ວັດທະນະທຳຂອງຊາດ ແລະ ຕິດພັນກັບຮ່ອງຮອຍປະຫວັດສາດ, ອະນຸຮັກສິ່ງແວດລ້ອມ ແລະ ຮັບປະກັນພາລະບົດບາດການກັກເກັບ – ລະບາຍນ້ຳຂອງບຶງທາດຫຼວງ ແລະ ເປັນຕົວເມືອງພັດທະນາໃໝ່ທີ່ມີການພັດທະນາແບບຍືນຍົງ, ຫັນໄປສູ່ການບໍລິຫານ ແລະ ຄຸ້ມຄອງແບບອຸດສາຫະກຳທີ່ທັນສະໄໝສາມາດກວດສອບໄດ້ ແລະ ມີຄວາມໂປ່ງໃສ, ໃຫ້ກາຍເປັນພື້ນຖານການສ້າງແຫຼ່ງລາຍຮັບທີ່ໝັ້ນຄົງຂອງລັດ, ສ້າງວຽກເຮັດງານ ທຳ, ນຳເຂົ້າເຕັກໂນໂລຊີທີ່ທັນສະໄໝ ເພື່ອນຳໃຊ້ເຂົ້າໃນວຽກງານບໍລິຫານ ແລະ ຄຸ້ມຄອງເຮັດໃຫ້ເຂດເສດຖະກິດດັ່ງກ່າວເຊື່ອມໂຍງກັບພາກພື້ນ ແລະ ສາກົນເທື່ອລະກ້າວ; ທ່ານ ສຸບັນ ຈຸນລາຊາ ກ່າວ .

ທ່ານ ສຸບັນ ຈຸນລາຊາ ກ່າວຕື່ມວ່າ: ນັບແຕ່ມື້ສ້າງຕັ້ງມາຮອດປັດຈຸບັນສາມາດດຶງດູດການລົງທຶນໄດ້ທັງໝົດ 27 ບໍລິສັດ ມີມູນຄ່າການລົງທຶນຕົວຈິງຈຳນວນ 306 ລ້ານໂດລາສະຫະລັດ. ໃນນັ້ນ, ແບ່ງອອກເປັນຜູ້ພັດທະນາ 248 ລ້ານໂດລາສະຫະລັດ, ຜູ້ລົງທຶນລາຍຍ່ອຍ 57 ລ້ານໂດລາສະຫະລັດ ແລະ ໄດ້ປະຕິບັດພັນທະຊົດເຊີຍທີ່ດິນ ແລະ ອາກອນຕ່າງໆໃນໄລຍະຜ່ານມາ ເປັນຈຳນວນເງິນ 10 ກວ່າລ້ານໂດລາສະຫະລັດ.

( ຂ່າວ: ສົມລົດ; ຮູບ: ສົມສະຫວິນ )

ທີ່ມາ: ໜັງສືພິມ ເສດຖະກິດ-ການຄ້າ