ພະຍາດອະຫິວາໝູອາຟຣິກາ ລະບາດຢູ່ບ້ານໂຮງເລື່ອຍ ເມືອງຫຼວງນໍ້າທາ

344

ທ້າຍອາທິດຜ່ານມາຫ້ອງການກະສິກຳ ແລະ ປ່າໄມ້ເມືອງຫຼວງນໍ້າທາ ຮ່ວມກັບອຳນາດການປົກຄອງບ້ານໂຮງເລື່ອຍ ທຳລາຍໝູທີ່ຕິດເຊື້ອພະຍາດອະຫິວາໝູອາຟຣິກາ.

ທ່ານ ບຸນໄຊ ບຸນທິບ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຫຼວງນໍ້າທາ ແຂວງຫຼວງນ້ຳທາ ໃຫ້ສຳພາດວັນທີ 1 ພະຈິກ ຜ່ານມາວ່າ: ກ່ຽວກັບການລະບາດພະຍາດອະຫິວາໝູອາຟຣິກາ ຢູ່ບ້ານໂຮງເລື່ອຍ ເມືອງຫຼວງນໍ້າທາ ຕາມການໄດ້ຮັບແຈ້ງຂ່າວຈາກອົງການປົກຄອງບ້ານດັ່ງກ່າວ ວ່າມີໝູເຫງົາ ແລະ ຕາຍ ເປັນຈຳນວນຫຼາຍໂຕ. ຈາກນັ້ນ, ຫ້ອງການກະສິກຳ ແລະ ປ່າໄມ້ ເມືອງຫຼວງນໍ້າທາ ຈຶ່ງໄດ້ສົມທົບກັບຂະແໜງລ້ຽງສັດ ແລະ ການປະມົງ ພະແນກກະສິກຳ ແລະ ປ່າໄມ້ແຂວງ ລົງຕິດຕາມກວດກາຕົວຈິງເຫັນວ່າພົບເຊື້ອພະຍາດອະຫິວາໝູອາຟຣິກາແທ້.

ມາໃນວັນທີ 31 ຕຸລາ 2019 ນໍາໂດຍ ທ່ານ ບຸນໄຊ ບຸນທິບ ຫົວໜ້າຫ້ອງການກະສິກໍາ ແລະ ປ່າໄມ້ເມືອງ, ພ້ອມດ້ວຍພະນັກງານວິຊາການທີ່ກ່ຽວຂ້ອງ ຕະຫຼອດຮອດອົງການປົກຄອງບ້ານໂຮງເລື່ອຍ ໄດ້ພາກັນກຳຈັດໝູຢູ່ພາຍໃນບ້ານ ຈໍານວນ 40 ກວ່າຄອບຄົວ, ມີໝູທັງໝົດ 80 ໂຕ ທໍາລາຍຕົວຈິງ 28 ໂຕ ລວມມູນຄ່າ 75,6 ລ້ານ ກວ່າກີບ.

[ ຂ່າວ: ມຸນຕີ ]

ທີ່ມາ: ໜັງສືພິມ ເສດຖະກິດ-ການຄ້າ