3 ພາກສ່ວນ ຫາລືການຜະລິດພືດຜັກປ້ອນຕະຫຼາດ

355

ກະຊວງກະສິກໍາ ແລະ ປ່າໄມ້ ຮ່ວມກັບພາກສ່ວນກ່ຽວຂ້ອງຂອງພາກລັດ, ກຸ່ມຜູ້ຜະລິດພືດຜັກ ແລະ ແມ່ຄ້າຄົນກາງ ໄດ້ຈັດກອງປະຊຸມເພື່ອປຶກສາຫາລືກ່ຽວກັບທິດທາງການຜະລິດພືດຜັກ ສະໜອງໃຫ້ຕະຫຼາດນະຄອນຫຼວງວຽງຈັນ, ຂະນະທີ່ກຸ່ມຜູ້ຜະລິດລະບຸວ່າ: ໃນໄລຍະຜ່ານມາມັກຖືກແມ່ຄ້າຄົນກາງເອົາລັດເອົາປຽບມາຕະຫຼອດ.

ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 4 ພະຈິກນີ້ ທີ່ສູນຄົ້ນຄວ້າພືດຜັກ ແລະ ໄມ້ໃຫ້ໝາກຫາດດອກແກ້ວ ເມືອງຫາດຊາຍຟອງ ນະຄອນຫຼວງວຽງຈັນ ໂດຍມີ ທ່ານ ພວງປາຣິສັກ ປຣະວົງວຽງຄໍາ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ມີພາກສ່ວນກ່ຽວຂ້ອງເຂົ້າຮ່ວມ.

ທ່ານ ພວງປາຣິສັກ    ປຣະວົງວຽງຄໍາ ກ່າວວ່າ: ຈຸດປະສົງຂອງກອງປະຊຸມ ແມ່ນເພື່ອໃຫ້ມີຄວາມເຂົ້າໃຈເຊິ່ງກັນ ແລະ ກັນລະຫວ່າງຜູ້ຜະລິດ ແລະ ຜູ້ຊື້ ວ່າຄວນຈະມີການກໍານົດມາດຕະຖານ ແລະ ເງື່ອນໄຂຄືແນວໃດໃຫ້ຈອດກັນລະຫວ່າງຜູ້ຜະລິດ ແລະ ຜູ້ຈຳໜ່າຍ.

ກອງປະຊຸມຄັ້ງນີ້ຖືວ່າມີ ຄວາມສໍາຄັນກັບກຸ່ມຜູ້ຜະລິດ ແລະ ຜູ້ຊື້ ເພື່ອປັບປຸງຂອດການຜະລິດພາຍໃນໃຫ້ນັບມື້ດີຂຶ້ນ ໂດຍສະເພາະກຸ່ມຜູ້ຜະລິດເພື່ອປ້ອນຕະຫຼາດນະຄອນຫຼວງວຽງຈັນ ເຊິ່ງພາກລັດໄດ້ຊຸກຍູ້ສົ່ງເສີມກະສິກໍາສະອາດເພື່ອໃຫ້ການຜະລິດມີຄວາມຍືນຍົງ. ນອກຈາກການຜະລິດພືດຜັກສະອາດແລ້ວຍັງມີການຜະລິດໝາກໄມ້ ແລະ ໃນຕໍ່ໜ້າກໍຈະມີການສົ່ງເສີມການລ້ຽງສັດໃຫຍ່ໃນນະຄອນຫຼວງວຽງຈັນ.

ທ່ານ ສີວັນ ທອງທຸມມາ ຮອງນາຍບ້ານຫາດກັນຊາ ທັງເປັນຫົວໜ້າກຸ່ມຜະລິດກະສິກໍາສະອາດຫາດກັນຊາ ໃຫ້ສໍາພາດວ່າ: ເນື້ອທີ່ຂອງກຸ່ມມີ 120 ເຮັກຕາ ເຊິ່ງກຸ່ມຜູ້ຜະລິດແມ່ນກວມເອົາ 22 ຄອບຄົວ ເຊິ່ງໄດ້ເລີ່ມປູກພືດຜັກມາແຕ່ທ້າຍປີ 2013 – 2015 ໂດຍອົງການໄຈກາ ເປັນຜູ້ສະໜັບສະໜູນ, ຫຼັງຈາກຢຸດເຊົາໂຄງການກຸ່ມກໍໄດ້ຮັບການຊີ້ນໍາຈາກພະແນກກະສິກໍາ ແລະ ປ່າໄມ້ ນວ ກໍຄືຫ້ອງການກະສິກໍາ ແລະ ປ່າໄມ້ເມືອງຫາດຊາຍຟອງຄືນໃໝ່, ໄລຍະທີ່ຜ່ານມາຊາວກະສິກອນແມ່ນພົບກັບຄວາມຫຍຸ້ງຍາກຍ້ອນວ່າຜູ້ຜະລິດແມ່ນແລ່ນນໍາຕະຫຼາດ ເປັນຕົ້ນແມ່ນໄລຍະໃດພືດຜັກຊະນິດໃດລາຄາດີແມ່ນໄດ້ສຸມໃສ່ປູກພືດປະເພດນັ້ນໆ ເຮັດໃຫ້ຜົນຜະລິດຫຼາຍເກີນຄວາມຕ້ອງການຂອງຕະຫຼາດ.

ປັດຈຸບັນຜົນຜະລິດແມ່ນຂາຍໃຫ້ແມ່ຄ້າຄົນກາງແຕ່ວ່າຖືກເອົາປຽບ ( ໂກງ ) ຕະຫຼອດມາ ໂດຍສະເພາະຕາຊິງຂອງແມ່ຄ້າແຂງເກີນ ກວ່າຈະຮັບໄດ້ ຕົວຢ່າງ: 1 ໝື່ນເທົ່າກັບ 12 ກິໂລ ແຕ່ວ່າຕົວຈິງແລ້ວແມ່ຄ້າຈະໄດ້ເຖິງ 15 – 17 ກິໂລ.

ສະນັ້ນ, ຈຶ່ງຮຽກຮ້ອງມາຍັງພາກລັດ ຊ່ວຍແກ້ໄຂດ່ວນເລື່ອງສັນຍາຊື້ – ຂາຍກັບແມ່ຄ້າຄົນກາງ ກໍຄືໃຫ້ມີການເຊັນສັນຍາຊື້ – ຂາຍຄັກແນ່ວ່າແມ່ຄ້າຈະຮັບເກັບຊື້ໝື່ນເທົ່າໃດກັນແທ້ ແລະ ຢາກໄດ້ພືດຜັກປະເພດໃດແດ່, ຫົວໜ້າກຸ່ມຍັງຮັບປະກັນວ່າມີຄວາມພ້ອມປູກພືດຜັກຕາມຄວາມຕ້ອງການຂອງແມ່ຄ້າ ແລະ ສະໜອງຢ່າງພຽງພໍຕາມຄວາມຕ້ອງການຂອງຕະຫຼາດ ນະຄອນຫຼວງວຽງຈັນ ( ນວ ).

ທີ່ມາ: ໜັງສືພິມ ເສດຖະກິດ-ການຄ້າ