ພຣູເດັນໂຊລ໌ ເປີດໂຕຜະລິດຕະພັນໃໝ່ “ພຣູດຣີມ ໂພຣເທັກເຕີ”

376

ບໍລິສັດ ພຣູເດັນໂຊລ໌ ປະກັນໄພຊີວິດ (ລາວ) ຈໍາກັດ ສືບຕໍ່ຂະຫຍາຍຜະລິດຕະພັນຂອງຕົນເພື່ອຕອບໂຈດຄວາມຕ້ອງການລູກຄ້າຫຼາຍຂຶ້ນໃນຍຸກປັດຈຸບັນ. ຫຼ້າສຸດ, ໄດ້ມີການແນະນໍາຜະລິດຕະພັນໃໝ່ທີ່ມີຊື່ວ່າ: “ພຣູດຣີມ ໂພຣເທັກເຕີ” ທີ່ເນັ້ນໃສ່ຄຸ້ມຄອງຊີວິດດ້ວຍຄ່າທໍານຽມທີ່ທຸກຄົນສາມາດຈ່າຍໄດ້ ພ້ອມກັບຖະແຫຼງຂ່າວໂຄງການ “WE DO”. ດ້ານປະທານສະພາບໍລິຫານເປີດເຜີຍ ຜະລິດຕະພັນໃໝ່ນີ້ຈະເລີ່ມໃຫ້ບໍລິການນັບແຕ່ມື້ນີ້ເປັນຕົ້ນໄປ ເພື່ອໃຫ້ເຂົ້າເຖິງລູກຄ້າຢ່າງທົ່ວເຖິງ.

ທ່ານ ເດວິດ ນັດແມນ ປະທານສະພາບໍລິຫານຂອງບໍລິສັດ ພຣູເດັນໂຊລ໌ ປະກັນໄພຊີວິດ (ລາວ) ຈໍາກັດ ກ່າວວ່າ: ພູເດັນໂຊລາວໄດ້ດໍາເນີນທຸລະກິດກ່ຽວກັບການປະກັນໄພໃນ ສປປ ລາວ ນັບແຕ່ເດືອນພຶດສະພາ 2016 ເປັນຕົ້ນມາ ເພື່ອຕອບສະໜອງຄວາມດ້ານປະກັນໄພແກ່ລູກຄ້າໃນສັງຄົມລາວ ເຊິ່ງໄລຍະຜ່ານມາ ພວກເຮົາມີການບໍລິການທີ່ຫຼາກຫຼາຍບໍ່ວາຈະເປັນການປະກັນໄພສຸຂະພາບ, ການວາງແຜນການເງິນ, ການໃຊ້ຊີວິດ, ການສະສົມທຶນ ແລະ ອື່ນໆ.

ສໍາລັບຜະລິດຕະພັນໃໝ່ນີ້ ມີຊື່ວ່າ: “ພຣູດຣີມ ໂພຣເທັກເຕີ” ຫຼື (PRU Dream Protector) ກໍ່ເປັນອີກທາງເລືອກໜຶ່ງຕອບສະໜອງຄວາມຕ້ອງການລູກຄ້າໃຫ້ຫຼາຍຂຶ້ນ ດ້ວຍລາຄາຖຶກ, ທຸກຄົນສາມາດຈາຍໄດ້ ແລະ ມີຂັ້ນຕອນທີ່ງ່າຍດາຍ ເຊິ່ງພວກເຮົາພ້ອມແລ້ວທີ່ຈະຕອບສະໜອງສັງຄົມລາວນັບແຕ່ມື້ນີ້ເປັນຕົ້ນໄປ.

ທ່ານກ່າວຕື່ມວ່າ: ນອກຈາກຜະລິດຕະພັນໃໝ່ແລ້ວ ພວກເຮົາຍັງມີໂຄງການທີ່ມີຊື່ວ່າ: “WE DO” ເຊິ່ງເປັນໂຄງການໜຶ່ງທີ່ຊີ້ໃຫ້ເຫັນເຖິງຄວາມໄວ້ເນື້ອເຊື່ອໃຈໃຫ້ກັບລູກຄ້າພາຍໃຕ້ຄໍາຂວັນທີ່ວ່າ: “ຮັບຟັງ, ເຂົ້າໃຈ ແລະ ມອບສິ່ງທີ່ດີໃຫ້ແກ່ທ່ານ” ເພາະການຮັບຟັງ ແລະ ເຂົ້າໃຈລູກຄ້າ ຖືເປັນສິ່ງທີ່ໜຶ່ງທີ່ພວກເຮົາຈະຕອບສະໜອງ ແລະ ໃຫ້ຄວາມສໍາຄັນໃນການເຊື່ອມໂຍງລະຫວ່າງຜູ້ຄົນກັບເຄື່ອງມືທີ່ທັນສະໄໝ ໂດຍເນັ້ນເອົາໃສ່ໃຈຄວາມຕ້ອງການຂອງລູກຄ້າຫຼາຍຂຶ້ນ.

ພິທີຖະແຫຼງຂ່າວຈັດຂຶ້ນໃນວັນທີ 4 ພະຈິກ 2019 ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງທ່ານ ນາງ ຈັນສຸກ ຜາລີວັນ ຕາງໜ້າຈາກກົມຄຸ້ມຄອງພັດທະນາວິສາຫະກິດ ແລະ ປະກັນໄພ ກະຊວງການເງິນ, ທ່ານ ຈອນ ເພລເຊິນ (Jhon Pearson) ອັກຄະລັດຖະທູດອັງກິດປະຈໍາລາວ, ມີຜູ້ຕາງໜ້າຈາກ ທຄຕລ, ທະນາຄານເອຊີລິດາ ແລະ ແຂກຖຶກເຊີນເຂົ້າຮ່ວມ.

[ຂ່າວ: ສົມສະຫວິນ, ພາບ: ວິລະສັກ]

ທີ່ມາ: ໜັງສືພິມ ເສດຖະກິດ-ການຄ້າ