ເຈົ້າໜ້າທີ່ ກົມມາດຕະຖານ ລົງກວດສອບປະລິມານສຸດທິ ທີ່ບັນຈຸໃນສິນຄ້າຫຸ້ມຫໍ່

610

ໂດຍປະຕິບັດຕາມ ລະບຽບການ, ຫຼັກການກວດສອບສິນຄ້າຫຸ້ມຫໍ່ ແລະ ມາດຕະການກ່ຽວກັບການຄຸ້ມຄອງ, ກວດສອບຜະລິດຕະພັນ ແລະ ສິນຄ້າຫຸ້ມຫໍ່ທີ່ຜະລິດ, ນຳເຂົ້າ, ສົ່ງອອກ ແລະ ຈຳໜ່າຍຢູ່ ສປປ ລາວ ໃຫ້ຖືກຕ້ອງຕາມລະບຽບການທີ່ກຳນົດໃວ້ ຢູ່ ສປປ ລາວ ແລະ ສາກົນ ທັງເປັນການສ້າງເງື່ອນໄຂອັນສະດວກໃນການຊື້-ຂາຍ, ແນໃສ່ເຮັດໃຫ້ສັງຄົມມີຄວາມຍຸດຕິທຳ, ປອດໄພ ແລະ ມີຄວາມເປັນເອກະພາບໃນການຈັດຕັ້ງປະຕິບັດ ໃນຂອບເຂດທົ່ວປະເທດ ແລະ ເຊື່ອມໂຍງກັບຫຼັກການກວດສອບຂອງພາກພື້ນ ແລະ ສາກົນ, ເພື່ອບໍ່ໃຫ້ເອົາປຽບລະຫວ່າງຜູ້ຊື້ ແລະ ຜູ້ຂາຍ ແລະ ລະຫວ່າງໂຮງງານກັບໂຮງງານ ແນໃສ່ໃຫ້ການຊື້ຂາຍໃນສັງຄົມໃຫ້ມີຄວາມຍຸດຕິທຳ ບໍ່ໃຫ້ເອົາລັດເອົາປຽບກັນ.

ສະນັ້ນ, ໃນຕົ້ນເດືອນ ຕຸລາ 2019 ຜ່ານມາ, ສູນວັດແທກ ກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ໄດ້ລົງເຄື່ອນໄຫວກວດສອບປະລິມານສຸດທິ ທີ່ບັນຈຸໃນສິນຄ້າຫຸ້ມຫໍ່ (ປະເພດ ນໍ້າດື່ມຫົວເສືອ, ແປບຊີ, ມີຣິນດ້າ, ໂຊດາ, ເບຍລາວ), ຢູ່ທີ່ ບໍລິສັດ ເບຍລາວ ຈຳກັດ ຕັ້ງຢູ່ ບ້ານ ໜອງແວງ ເມືອງ ປະທຸມພອນ ແຂວງ ຈຳປາສັກ, ບໍລິສັດ ຈຸງຢາອິຊີຊີມັງລາວ ຈຳກັດ ( ຊີມັງກາຊ້າງ ສາລະວັນ ) ຕັ້ງຢູ່ ບ້ານ ຕົ້ງຊວຍ ເມືອງ ສາລະວັນ ແຂວງ ສາລະວັນ ແລະ ບໍລິສັດ ຄຳມ່ວນຊີມັງ ຈຳກັດ (ຊີມັງກາເສືອ ແລະ ກາຊ້າງ SCG ) ຕັ້ງຢູ່ ບ້ານ ໂພວາ ເມືອງ ມະຫາໄຊ ແຂວງ ຄຳມ່ວນ ນໍາພາໂດຍ ທ່ານ ອານຸສອນ ສີຫາປັນຍາ ຮອງຫົວໜ້າ ສູນວັດແທກ ພ້ອມດ້ວຍພະນັກງານວິຊາການ.

ເຊີ່ງໄດ້ທຳການກວດສອບສິນຄ້າຫຸ້ມຫໍ່ ດ້ວຍການຊັ່ງປະລິມານ ນ້ຳດື່ມຫົວເສືອ ຄື: ຂະໜາດ 1500 ml, 600 ml, 350 ml, 235 ml, ຜະລິດຕະພັນ ແປບຊີ ຂະໜາດ 280 ml, 480 ml, 1225 ml, 2000 ml, ໂຊດາ 330 ml ແລະ ເບຍລາວ 640 ml, ຊັ່ງນໍ້າໜັກ ຊີມັງກາຊ້າງ ສາລະວັນ ຂະໜາດ 50 kg ແລະ ຊິງມັງກາເສືອ SCG ຂະໜາດ 40 kg, ຊີມັງກາຊ້າງ SCG ຂະໜາດ 50 kg, ເຫັນວ່າ ປະລິມານ ແລະ ບໍລິມາດທີ່ບັນຈຸແມ່ນໄດ້ຕາມມາດຕະຖານທີ່ກຳນົດໄວ້.

ຂໍ້ມູນ: ສູນວັດແທກ ກົມມາດຕະຖານ ແລະ ວັດແທກ